Avropa İnsan Haqları Məhkəməsi Ermənistanın sərhədyanı kəndlərinin iki sakini Mamikon Xocayan və Karen Petrosyanın işləri üzrə qərar verib. Erməni mediasının verdiyi məlumata görə, güya 2014-cü ildə hər ikisi təsadüfən Azərbaycan ərazisinə keçib, saxlanılaraq işgəncələrə məruz qalıb. Məhkəmə Azərbaycan üzərinə hər bir iş üzrə 40 min avro kompensasiya ödəmək öhdəliyi qoyub. Qərarlar AİHM-nin saytında dərc olunub.
Avropa Məhkəməsi Azərbaycanın erməni əsirlərin yaşamaq hüququnu, azadlıq hüququnu və toxunulmazlıq hüququnu, işgəncə və ayrıseçkilik tətbiq etməmək haqda öhdəliyini pozduğunu təsbit edib. Tavuş vilayəti Verin Karmiraxpür kənd sakini 77 yaşlı Mamikon Xocayan 2014-cü ilin yanvarında saxlanılıb. Azərbaycan tərəfi onu martın 4-də geri qaytarıb. Amma bir müddət sonra Mamikon Xocayan vəfat edib. Məhkəmə-tibbi ekspertizanın rəyinə əsasən, ölüm səbəbi orqanizmin ümumi intoksikasiyası olub.
Tavuş vilayətinin Çinari kənd sakini Karen Petrosyan 2014-cü il avqustn 7-də yolu azıb, bir müddət sonra Azərbaycan kəndlərinin birində tapılıb və saxlanılıb. Saxlanılandan bir gün sonra onun ürək tutmasından vəfat etdiyi bildirilib.
Təbiidir ki, bu, Ermənistanın təqdim etdiyi versiyadır. Əslində isə həmin adamlar ərazini yaxşı tanıdıqları üçün erməni diversiya qruplarına bələdçilik ediblər. Onların güya işgəncə nəticəsində ölməsilə bağlı Azərbaycan əleyhinə çıxardığı qərar Avropanın növbəti ikili standartlı yanaşmasından xəbər verirmi?
Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov “Bakı-Xəbər”ə açıqlamasında bildirdi ki, bu açıq şəkildə ikili standartdır: “Çünki müharibənin bitməsindən bir il keçib. Erməni tərəfi bu müddətdə “hərbi əsir” saydıqları hərbçilərlə bağlı Azərbaycana qarşı təzyiqlərini davam etdirir. Biz isə onları hərbi əsir yox, terrorçu və diversant sayırıq. Çünki həmin adamlar bizim ərazi bütövlüyümüzə xələl gətirmək istəyərkən ələ keçiblər. Bizim qanunlara uyğun olaraq onlar mühakimə edildi və barələrində ittiham hökmü çıxarıldı. Onların da əksəriyyəti ölkələrinə təhvil verilib. Avropa İnsan Haqları Məhkəməsinin bu məsələdə qərəzli qərar çıxarması ədalətsiliyin pik nöqtəsidir. Hərbi və mülki əsirlərlə bağlı ən çox əziyyət çəkən məhz Azərbaycandır. Bizim 90-cı illərdən indiyə kimi 3888 vətəndaşımız itkin düşmüş sayılır. Onların taleyindən heç bir məlumat yoxdur. Azərbaycan dəfələrlə bu məsələni beynəlxalq təşkilatlar səviyyəsində qaldırsa da, heç bir reaksiya görmürük. Hətta bununla bağlı Avropadan Ermənistana ünvanlanan açıqlamalar, çağırışlar belə olmayıb. Dilqəm Əsgərov bə Şahbaz Quliyevlə bağlı məhz bu məhkəməyə etdiyimiz müraciətə baxmadı. Sadəcə kommunikasiya apardı. Həmin adamlar 7 il erməni girovluğunda qalıb. Həmin girovları biz öz gücümüzə, yaratdığımız reallıqlar hesabına geri aldıq. Necə ola bilir ki, Azərbaycana qarşı konkret cinayətlər etmiş şəxslərlə bağlı bizi cərimələyən qərar verilir? Bizim minlərlə vətəndaşımızla bağlı niyə biganələk göstərirlər? Bir hüquq müdafiəçisi kimi bu halı kəskin pisləyirəm. Mən onların qərəzini daima görmüşəm. Bəzən bunu isbatlamağa sübutlar olmurdu. Verdikləri son qərar onların hansı səviyyədə qərəzli olduğunu ortaya çıxardı. Bu, sırf siyasi mövqedir. Bununla onlar özlərinin tam qərəzli olduqlarını göstərdilər”.
Məhəmmədəli QƏRİBLİ
