Azərbaycanda 50-dən çox qeydiyyatdan keçən siyasi partiya fəaliyyət göstərir. Ancaq nədənsə, partiyaların hansısa xeyriyyə xarakterli tədbirlərdə iştirakı müşahidə edilmir. Məsələn, bir dəfə eşitmədik ki, hansısa partiya sədri və yaxud da onun aparıcı funksioneri qazilərin probleminin həlli ilə bağlı YAŞAT Fonduna, yaxud da bu məqsədlə əlaqədar başqa formada ianə versin. Nəzərə almaq lazımdır ki, hakim Yeni Azərbaycan Partiyasından başqa, bir sıra digər kiçik partiyalar da dövlət büdcəsindən vəsait alır. Söhbət parlamentdə təmsil olunan partiyalardan gedir.
VI çağırış Milli Məclisdə 11 siyasi partiya təmsil olunur. Siyasi partiyalar haqqında qanuna görə, dövlət büdcəsindən ayrılan vəsaitin 40 faizi Azərbaycan Respublikasının Milli Məclisində təmsil olunan siyasi partiyalar arasında bərabər bölünür. Vəsaitin 50 faizlik hissəsi isə Azərbaycan Respublikası Milli Məclisinin say tərkibinə (125-ə) bölünür və bunun nəticəsində alınan məbləğ Milli Məclisdə təmsil olunan siyasi partiyalardan seçilmiş deputatların sayına vurulmaqla müəyyənləşən məbləğ həmin siyasi partiyalara ayrılır. Büdcədən ayrılan vəsaitin qalan 10 faizlik bölümünün 5 faizi Milli Məclisə keçirilmiş seçkilərdə etibarlı səslərin, ən azı, 3 faizini qazanmış, ancaq Milli Məclisdə təmsil olunmayan siyasi partiyalara verilir. Digər 5 faizinsə Milli Məclisə keçirilmiş təkrar və əlavə seçkilər nəticəsində, eləcə də fəaliyyətdə olan deputatların partiya mənsubiyyətinin yaranması (dəyişməsi) ilə əlaqədar parlamentdə təmsil olunan yeni siyasi partiyalara (hər siyasi partiyanın müvafiq rüb üzrə payına düşən həcmdə) ayrılması nəzərdə tutulub.
Bütün bu deyilənlərin fonunda maraqlıdır, niyə partiyalar, onların sədrləri qazilərlə bağlı ianə toplanılmasında passivdir?
MCP: “Gücümüz çatan qədər ianə məsələsində kömək edirik, sadəcə, bu kimi yardımları reklam etməyi sevmirik”
Məsələyə münasibət bildirən Milli Cəbhə Partiyasının sədr müavini Məhəmməd Əsədullazadə deyilənlərlə razılaşmadı. O qeyd etdi ki, istər partiya sədri, istərsə də partiya funksionerləri gücləri çatdığı qədər ianə məsələsində kömək edirlər: “Sadəcə, bu kimi yardımları reklam etməyi sevmirik. Hesab edirik ki, bundan təbliğat məqsədi kimi istifadə etmək doğru olmaz. MCP olaraq biz həm qazilərə, həm şəhid ailələrinə, həm də YAŞAT Fonduna ianə formasında yardımlar edirik. Partiya sədri Razi Nurullayev başda olmaqla, digər üzvlərlə əlimizdən gələni əsirgəmirik. Xüsusən də partiya sədri Razi Nurullayev bu işdə daha fəaldır. Daim şəhid ailələrini, qaziləri parlamentdə qəbul edir. Onların problemlərinin həlli istiqamətində səylər göstərir, müraciətləəri müvafiq qurumlara göndərir. Yəni imkanımız nəyə çatırsa onu edirik. O baxımdan parlament partiyası olaraq biz bu işdə passiv deyilik. Əksinə, deyərdim ki, daha fəalıq”.
ReAl Partiyası: “Qazilərin problemləri ilə bağlı 12 səhifəlik hesabat hazırladıq və əlaqədar orqanlara göndərdik”
ReAl Partiyasının funksioneri Natiq Cəfərli də qəzetimizə açıqlamasında bu işə dəstək verdiklərini qeyd etdi: “Partiya üzvlərimizdən şəhid olanlar var. Bir neçəsi qazi olub. Onları ziyarət etdik və bacardığımız qədər yardımlar da göstərdik. Ümumən, biz bu işdən kənarda deyilik. Bundan başqa, partiya sədri İlqar bəyin Ağdama səfəri oldu. Oradakı kəndlərdə qazilərlə görüşdük. Qazilərin problemləri ilə bağlı 12 səhifəlik hesabat hazırladıq və əlaqədar orqanlara göndərdik. Sevindirici hal o oldu ki, həmin müraciətlə əlaqədar problemlərin bir çoxu həll olundu. Deməyim odur ki, həm şəxsi, həm də ictimai təşəbbüslə səy göstərmişik. Ötən bir illik dönəmdə çalışmışıq ki, qələbəni bizə bəxş edən şəhidlərin və qazilərin problemini həll edək. Onların problemlərinin həllinə bacardığımız qədər yardımçı olaq”.
Vidadi ORDAHALLI
