2020-ci il sentyabrın 27-də Ermənistan silahlı qüvvələrinin cəbhəboyu təxribat törətməsinin ardınca Azərbaycan Ordusu əks-hücum əməliyyatına başladı. 44 gün davam edən Vətən müharibəsi, təxminən 30 illik işğala son qoyulması və ərazi bütövlüyümüzün bərpası ilə nəticələndi. Düşmən Azərbaycan Ordusunun zərbələrinə tab gətirməyərək noyabrın 10-da təslim aktını imzaladı. Azərbaycanın şanlı zəfərindən 1 il ötür.
Ötən bir ildə bir sıra proseslərin şahidi olduq. İlk növbədə Azərbaycanın beynəlxalq miqyasda nüfuzu daha da artdı. Digər tərəfdən, dünyanın bir sıra ölkələri Azərbaycanın hərb taktikasını öyrənir. Etiraf edirlər ki, Azərbaycan Ordusu istənilən vəzifəni icra etməyə qadirdir. II Qarabağ müharibəsi zamanı istifadə olunan döyüş taktikası dünya hərb tarixində yenilik hesab olunur və müvafiq ali hərbi məktəblərin dərsliklərinə salınaraq öyrənilir. ABŞ Hərbi Akademiyası və Pentaqonun rəsmiləri Azərbaycan Ordusunun hərbi əməliyyatlarının öyrənilməsinin aktuallığını qeyd edirlər. O cümlədən, dünyanın digər aparıcı ölkələri bunu öyrənir. Çünki bu, müasir hərb tarixində bir yenilik idi. Bütün bu deyilənlərin fonunda, Qarabağ zəfəri bu bir ildə Azərbaycanın dünyadakı hörmətinin möhkəmlənməsinə necə təsir etdi?
“Artıq bütün böyük güclər yeni reallıqları qəbul edir və ölkəmizlə hesablaşırlar”
Məsələyə münasibət bildirən AMİP-in sədr müavini Afsəddin Nəbiyevin fikrincə, Qarabağ Zəfəri Azərbaycan tarixinə qızıl hərflərlə yazılmış qəhrəmanlıq salnaməsidir: “Erməni işğalına son qoyan rəşadətli Azərbaycan Ordusu XXI əsrin ən son hərbi texnoloji savaşını həyata keçirərək öz gücünü bütün dünyaya sübut etdi. Müharibə ən ağır və ən mürəkkəb əməliyyatları özündə birləşdirən güc meydanıdır. Bu meydanda nəticə olaraq qalib və məğlub dövlətlər olur. Son 30 ildə bir çox dövlətlərin siyasi oyuncağına çevrilmiş Ermənistan Azərbaycanın ərazi bütövlüyə qəsd edərək torpaqımızı işğal altında saxlayırdı. Ermənistan nəinki işğala "haqq qazandırır", eyni zamanda yeni işğallarla Azərbaycan dövlətini hədələməkdən çəkinmirdi. Azərbaycan dövləti bu illər ərzində səbrlə, müharibə olmasın deyə, bütün qüvvəsini sərf edərək münaqişənin sülh yolu ilə həll olunmasına çalışdı. Ancaq qarşı tərəf sülhə yaxınlaşacaq heç bir real addım atmadı. Beynəlxalq təşkilatlar və böyük dövlətlər Ermənistanın işğalçı addımlarına göz yumdu. Belə bir deyim var: "Haqq nazirlər üzülməz". Haqq günü 27 sentyabr 2020 -ci ildə yetişdi. Azərbaycan xalqı misli görünməmiş bir birlik nümayiş etdirdi. Müharibənin ilk günündən son gününədək elə bir birlik nümayiş olundu ki, dünya tarixçiləri bu barədə hələ çox danışacaqlar. 44 günlük savaş nəticəsində Azərbaycan Ordusu erməni ordusunu tamamilə sıradan çıxardı. Xalqımız böyük Zəfərə imza atdı. Bu möhtəşəm sevincli günləri görmək bütün nəsillərə qismət olmur. Bu dövrü yaşayan nəsillər doğrudan da çox şanslıdı. Xalqımızı bütün sahələrdə elə bir birlik nümayiş etdirdi ki, hər bir vətəndaşımız özünü Azərbaycan əsgərinin yanında səngərdə hiss edirdi. Qələbəmizi şərtləndirən ən mühüm amillərdən biri də bu oldu. Yüz minlərlə gənc döyüşlərə könüllü yazıldı. Onların əksəriyyəti hərbi səfərbərlik idarəsinin əməkdaşlarından israrla döyüşlərə qatılmaqlarına şərait yaratmağı tələb edirdilər. Bir sözlə, Qarabağ Zəfəri Azərbaycanı bütün dünyaya güclü bir dövlət kimi tanıtdı. Onun beynəlxalq nüfuzunu daha da artırdı. Artıq bütün böyük güclər yeni reallıqları qəbul edir və ölkəmizlə hesablaşırlar. 8 noyabr rəmzi rəqəm olaraq həm də sonsuzlyğu ifadə edir. Bu o deməkdir ki, 8 noyabr Azərbaycan dövlətinin rəmzi simvoluna çevrilərək dövlət atributlarımız qədər çox dəyərli bir təqvimə çevrilib”.
Sədr müavini onu da qeyd etdi ki, xalqın bu birliyi davam etdikcə hələ çox qələbələrin şahidi olacağıq.
Vidadi ORDAHALLI
