ABŞ-ın Azərbaycandakı səfiri Örl Litzenberger Ermənistana gedib. Bu barədə ABŞ səfirliyindən məlumat verilib.
Bildirilib ki, səfir İrəvanda keçirilən Regional Missiyalarının Rəhbərlərinin görüşündə iştirak edib. Qeyd olunub ki, Litzenbergerlə yanaşı ABŞ-ın səfirləri Treysi, Dengan, Dövlət Katibinin müavini Olson, Qafqazda danışıqlar üzrə müşavir Andryu Şofer və USAID təşkilatı administratorunun köməkçisinin müavini Aleksadr Sokolovski ABŞ-ın İrəvandakı səfirliyinin ev sahibliyi etdiyi Regional Missiyalarının Rəhbərlərinin görüşündə iştirak ediblər: "COVID-19 pandemiyası səbəbindən biz keçən il bu tədbiri həyata keçirə bilməmişdik. Bu il ənənəvi olan görüşü keçirməkdən və həm bölgədə çalışan, həm də Vaşinqtondan gələn həmkarlarımız arasında fikir müdadiləsini təşkil etməkdən məmnunuq. Pandemiyadan öncə ABŞ-ın Bakıdakı və Tiflisdəki səfirlikləri müvafiq olaraq 2018-ci və 2019-cu illərdə bu görüşlərə ev sahibliyi ediblər. Biz Ermənistan, Azərbaycan və Gürcüstanla yaratdığımız diplomatik münasibətlərin 30-cu ildönümünə yaxın olan zamanda regionda daha təhlükəsiz, sabit və firavan gələcəyin qurulması naminə tərəfdaşlığımıza sadiq olduğumuzu yenidən vurğulayırıq".
Çox maraqlıdır ki, biz ABŞ-ın Azərbaycandakı və Ermənistandakı səfirlərinin fəaliyyətində təzadlı məqamları görürük. Sanki Ermənistandakı ABŞ səfiri bu regionda ölkəsinin koordinatoru qısmındə çıxış edir. ABŞ-ın bizdəki səfiri isə işğaldan azad edilən ərazilərə təşkil olunan səfərlərə getməkdən imtina edir. Bu halda onun “qaça-qaça” İrəvana getməsini nə ilə əlaqələndirə bilərik?
Politoloq Yeganə Hacıyeva “Bakı-Xəbər”ə açıqlamasında bildirdi ki, Bakıdakı səfirliyin əməkdaşlarının İrəvanda təşkil olunan bir toplantıda iştirak etməsi faktdır: “Oxşar məzmunlu toplantı 2018-ci ildə Tiflisdə, 2019-cu ildə isə Bakıda olub. Ancaq ondan sonra keçirilmədi. Çünki qarşılıqlı qıcıqlar yarandı. Bu yaxınlarda ABŞ Dövlət Departamentinin yüksək səviyyəli rəsmisi hər üç Cənubi Qafqaz ölkəsində səfərdə oldu. Sözügedən toplantı da həmin rəsminin İrəvanda olduğu dönəmə təsadüf edir. Faktiki olaraq ABŞ-ın bu coğrafiyadakı ölkələrdə olan səfirləri Departament rəsmisi ilə məhz İrəvanda görüşüb. ABŞ-ın Ermənistandakı səfiri özünü həmin ölkənin Cənubi Qafqazdakı nümayəndəsi kimi aparır. Biz onun, səlahiyyətlərini aşaraq, ermənilərə statusun verilməsinin zəruriliyindən danışdığını da görmüşük. Həmin səfirin bəyanatları ilə Paşinyanın fikirləri bir sinxronluq təşkil edirdi. Səfirin Ermənistanda biznes maraqlarının olması da dəqiq faktdır. ABŞ-ın bizdəki səfiri yalnız daxildəki mövzuları qabardır. Ermənistandakı səfir isə bir dəfə də olsun həmin ölkədə insan haqlarının pozulmasından danışmayıb. Həbsxanada qəzet redaktorunu acından öldürdülər, səfitərin səsi çıxmadı. Qanunvericiliyin sərtləşməsinə də reaksiyasını görmədik. ABŞ-ın bizdəki səfiri isə xırda bir məsələni də şişirdərək təqdim edir. Buradan görünür ki, səfirin Ermənistanla bağlı bir, Azərbaycanla əlaqəli isə başqa prioriteti var. Bizdəki səfir Qərb maliyyəsi əsasında fəlaliyyət göstərən QHT-lərə əməkdaşlıqda açıqdır, ancaq müstəqil və hökümətyönümlülərlə məsafə saxlayır. Ermənistandakı səfir isə bütün spektrlə əlaqədədir. Postsovet ölkələrinin hamısında QHT və media sahəsində izlənilən bir tendensiya var. Bu ölkələrdə Qərbin maliyyəsi ilə formalaşmış QHT və media şəbəkəsi daha sonra elə Qərbin öz nüfuzunun, maraqlarının əleyhinə işlədi. Son həftələr İranla baş verən gərginlik bunu sübüt etdi. Ayrı zamanların səsli-küylü dövlət institutlarının tənqidçiləri İranla bağlı bir kəlmə də danışmadı. Bir qismi isə ümumiyyətlə İranın maraqlarının müdafiəçisi qismində çıxış etdi. Bizdəki səfirin məhz belə dairələrlə əməkdaşlığı da maraqlıdır”.
Məhəmmədəli QƏRİBLİ
