Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə noyabrın 4-də “COVID-19-dan sonrakı dünya” mövzusunda növbəti Qlobal Bakı Forumunda dünyanı qayğılandıran, maraqlandıran bir sıra məsələlər müzakirə edilir.
Sayca 8-ci olan Bakı Forumunda qlobal əhəmiyyət kəsb edən məsələlərin müzakirəsi məqsədilə dünyanın 40-dan çox ölkəsindən ali və yüksək səviyyəli nümayəndələr, sabiq dövlət və hökumət başçıları, beynəlxalq və qeyri-hökumət təşkilatlarının rəsmiləri, eləcə də digər nüfuzlu qonaqlar iştirak edir. Hibrid formatda təşkil edilən tədbirdə 300-ə yaxın qonaq canlı və onlayn iştirak edir.
Bildirək ki, Prezident İlham Əliyev Qlobal Bakı Forumunda çıxışı zamanı işğaldan azad edilən ərazilərimizdə tikinti-quruculuq işlərinə start verildiyini də xüsusi vurğuladı: “...Hazırda biz azad edilmiş əraziləri fəal şəkildə bərpa edirik. Genişmiqyaslı bərpa proqramına başlanılıb. Əminəm ki, qısa müddət ərzində biz Ermənistanın işğalından əziyyət çəkmiş məcburi köçkünləri, bir milyondan çox insanı həmin yerlərə qaytara biləcəyik...”
VIII Qlobal Bakı Forumunda çıxış edən siyasətçilərin, xarici ölkələrin yüksək səviyyəli nümayəndələri, sabiq dövlət və hökumət başçıları, beynəlxalq və qeyri-hökumət təşkilatlarının rəsmiləri, eləcə də digər nüfuzlu qonaqların hamısı birmənalı olaraq Prezident İlham Əliyevin azad edilmiş rayonları tam bərpa edəcəyinə inandıqlarını ifadə etdilər. Bildirdilər ki, bu məsələdə Prezident İlham Əliyevə inanırlar.
Qlobal Bakı Forumunda çıxış edənlərin Azərbaycan Prezidentinə bu inamı haradandır?
“Azad rayonlarda başlanılan quruculuq prosesi beynəlxalq səviyyədə də dəyərləndirilir”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində vurğuladı ki, Qlobal Bakı Forumu iştirakçılarının azad ərazilərimizin, rayonlarımızın Prezident İlham Əliyev tərəfindən bərpa ediləcəyinə inanmaları və bunu açıq bəyan etmələri təsadüfi deyil, çünki İlham Əliyev bütün dünyada inanılan, sözünə etibar eidlən siyasi lider, dövlət başçısı kimi tanınır. Ş,Ağayev bildirdi ki, Azərbaycan Prezidenti indiyə qədər verdiyi hər bir vədi çox yüksək şəkildə doğruldub və dünyanın aparıcı simalarının da ona inamı məhz bu amildən qaynaqlanır: “Forumda çıxış edənlərin İlham Əliyev tərəfindən Qarabağın bərpa ediləcəyinə inandıqlarını dilə gətirmələri qətiyyən təsadüfi deyil, bu, söz xatirinə ifadə edilməyib. Azərbaycan Prezidenti verdiyi hər bir sözü əməlləri ilə sübut edir. Çox qısa zamanda azad edilmiş ərazilərdə başlanan tikinti-quruculuq, bərpa işləri də buna əyani nümunədir.
Bilirsiz ki, noybarın 8-də Qarabağ zəfərinin bir ili tamam olacaq. Bu bir il ərzində Azərbaycan işğaldan azad edilən ərazilərdə çox böyük işlər görüb, quruculuq, bərpa işləri həyata keçirilib, bu gün də o proses davam etdirilir.
Görülən ən mühüm işlərdən biri 8 aya Füzuli Beynəlxalq aereportunun açılmasıdır, Şuşaya Zəfər yolunun çəkilməsidir, Kəlbəcərə yolun çəkilişinin davam etdirilməsidir. Ağdam və Şuşa şəhərlərinin yenidən qurulması layihəsinin təsdiq edilməsi, Şuşada tikinti-quruculuq, bərpa işlərinin sürətlə davam etdirilməsi, Zəngilanda “Ağıllı kənd”in qurulması və sair görülən işlər çox qısa müddətdə baş verib. Əlbəttə, azad rayonlarda Prezident İlham Əliyevin rəhbərliyi ilə başlanılan tikinti-quruculuq, bərpa işləri dünyanın da diqqətindədir. Azad rayonlarda başlanılan quruculuq prosesi beynəlxalq səviyyədə də dəyərləndirilir. Prezidentin bu məsələyə xüsusi diqqət yetirməsi, bir ay ərzində bir neçə dəfə tikinti-quruculuq, bərpa işləri aparılan rayonlara səfərlər etməsi, bu məsələ ilə şəxsən maraqlanması, məşğul olması, prosesə özünün nəzarəti, görülən işələrin miqyası, prosesin sürətlə getməsi, bir sözlə, görülən bütün işlər bu inamı yaradıb ki, əgər 8 aya bu qədər işlərin görülməsi mümkün olubsa, demək Azərbaycan Prezidenti yaxın illərdə Qarabağı tam olaraq bərpa edəcək. Ermənilərin viran qoyduğu Qarabağ yenidən dünyanın ən gözəl guşələrindən birinə çeviləcək”. Ş.Ağayev qeyd edir ki, İlham Əliyevə bəslənən bu inam görülən praktik işlərdən irəli gəlir. “Sözsüz ki, Azərbaycan Prezidenti öz əməli, sözübütövlüyü, ortaya qoyduğu böyük siyasi iradə ilə sözünə, addımına inanılan, etibar edilən bir siyasi xadimdir, dövlət rəhbəridir” - deyə Ş.Ağayev qeyfd etdi.
İradə SARIYEVA
