Bris Rokfeyl ATƏT-in Minsk Qrupunun Fransadan yeni həmsədri təyin edilib. Bu barədə Fransa hökumətinin saytında məlumat yerləşdirilib.
Rokfeyl bu vəzifədə 2016-cı ilin oktyabrından vasitəçi kimi fəaliyyət göstərən Stefan Viskontini əvəz edir. B.Rokfeyl yeni təyinatdan əvvəl Fransanın Özbəkistanda, Panamada səfiri, Rio-de-Janeyroda baş konsul olub. 2000-ci illərdə Fransanın Rusiya və Türkiyədəki səfirliklərində siyasi məsləhətçi vəzifəsində çalışıb.
Qeyd edək ki, bu ilin iyulunda Rusiya da ATƏT-in Minsk Qrupunda həmsədrini dəyişib. İqor Popovun yerinə bu vəzifəni İqor Xovayev tutub.
Məlumat üçün onu da qeyd edək ki, ATƏT-in Minsk Qrupu 1992-ci ildə yaradılsa da, Fransa 1997-ci ildə həmsədr olub. O vaxt Fransada güclü erməni lobbisi mövcud olduğuna görə, Azərbaycan bu dövlətin həmsədr olmasında tərəddüd edirdi. Ancaq həmin vaxt Fransanın prezidenti olan Jak Şirak Azərbaycan tərəfini əmin etdi ki, rəsmi Paris tərəfsiz vasitəçi olacaq. Ermənilərlə yaxın dostluq münasibətlərdən istifadə edib Qarabağ münaqişəsinin həllinə töhfə verməyə çalışacaq. Ancaq bütün bunlar söz olaraq qaldı. Fransa bu istiqamətdə gərəkən addımlar atmadı. Əksinə, açıq və gizli formada Ermənistanın işğalçılıq siyasətini dəstəklədilər. Minsk Qrupunun mənasız vasitəçilik missiyasında Fransanın da az rolu olmayıb. Fransa siyasiləri hesab edirdilər ki, işğal müddətinin uzanması Ermənistanın xeyrinə işləyir. Ötən ilin 27 sentyabrında Vətən müharibəsi başlayandan sonra Fransa hökumətinin bütün iç üzü ortaya çıxdı. Fransa prezidenti Emmanuel Makron, həmsədr dövləti təmsil etməsinə rəğmən, bütün diplomatik normalara tüpürərək açıq formada Ermənistanın tərəfini tutdu. Ümumiyyətlə, İkinci Qarabağ müharibəsndən sonra Minsk Qrupunun fəaliyyət göstərməsinə ehtiyac qalmayıb. Ona görə ki, qurumun vasitəçiliyi fiaskoya uğrayıb. O üzdən, Azərbaycan haqlı olaraq Minsk Qrupunu prosesdən kənarda saxlamağa və sıradan çıxarmağa çalışır. Fransa isə yeni həmsədr təyin etməklə, onu yenidən canlandırmaq istəyir. Maraqlıdır, bununla nə demək istəyirlər?
“Fransanın bu addımının bizim üçün heç bir əhəmiyyəti yoxdur”
Məsələyə münasibət bildirən sabiq diplomat, politoloq Fikrət Sadıqovun fikrincə, Fransanın məqsədi Minsk Qrupunu yenidən aktivləşdirməkdir: “Bununla demək istəyirlər ki, Minsk Qrupunun tarix olmasını istəmirlər. Vasitəçilik çətiri altında regionda öz təsir rıçaqlarını saxlamaq istəyirlər. Xüsusən də Fransa bu işdə daha çox fəallıq göstərir. Həmsədr dövlətlər diplomatları dəyişə bilərlər, bu onların öz işidir. Ancaq bu o demək deyil ki, MQ bundan sonra fəaliyyət göstərəcək. Qətiyyən belə deyil. Ona görə ki, artıq MQ-nin fəaliyyəti fəaliyyətsizliyə bərabərdir. Çünki indiyə qədər nə ediblər ki, bundan sonra nəsə etsinlər? O baxımdan Fransanın bu addımının bizim üçün heç bir əhəmiyyəti yoxdur. Azərbaycan MQ-nin vasitəçiliyi ilə danışıqların aparılmasının tərəfdarı deyil. Bu o deməkdir ki, əvvəlki formatda iştirak etmək fikrində deyilik. Sadəcə olaraq, onlar postmünaqişə dövründə bizə kömək etmək istəyirlərsə, buyursunlar. Söhbət ondan gedir ki, sülh sazişinin imzalanmasına, delimitasiya məsələlərinə hansısa töhfə vermək istəyirlərsə, bu ancaq humanitar xarakterli ola bilər. Buna etirazımız olmaz. Ancaq əvvəlki formatdan söhbət gedə bilməz”.
Politoloq onu da əlavə etdi ki, bundan sonra danışıqlarda Qarabağın statusu məsələsi də müzakirə obyekti ola bilməz.
Vidadi ORDAHALLI
