“Qlobal Bakı Forumu qeyri-bərabər vaksinasiya probleminin həlli yollarının tapılmasına kömək edəcək”. Bunu ABŞ-ın Azərbaycandakı sabiq səfiri Robert Sekuta “COVID-19-dan sonrakı dünya” mövzusunda VIII Qlobal Bakı Forumu çərçivəsində çıxışı zamanı deyib.
R.Sekutanın qeyd etdiyinə görə, Qlobal Bakı Forumunun faydası ondan ibarətdir ki, burada sabiq baş nazirlər, prezidentlər, yüksək vəzifəli diplomatlar, müxtəlif sahələr üzrə ekspertlər toplanır və bizim bu gün üzləşdiyimiz başlıca problemlərin müzakirəsinə yol açır: “Biz COVID-19-dan sonrakı dünya haqqında danışırıq. Bizim səhiyyə ilə bağlı problemlərimiz var, iqtisadiyyatda, neft və qazın tədarükündə qüsurlar mövcuddur. ABŞ-da vaksin kifayət qədərdir, amma Afrikada yalnız üç faiz əhali tam vaksinlənib. Bunlar həll edilməli olan ciddi problemlərdir və bu platforma həll yollarını tapmaqda kömək edəcək”.
Məlum olduğu kimi, dünyada vaksin ədalətsizliyinin mövcud olduğunu və bu problemin aradan qaldırılması zərurətini gündəmə Azərbaycan Prezidenti gətirib və dəfələrlə beynəlxalq tribunalardan bu barədə çağırışlar edib. Qlobal Bakı Forumunda iştirak edən beynəlxalq ekspertlərin, diplomatların bir çoxunun rəyi belədir ki, Bakı Forumu vaksin ədalətsizliyinin ləğv edilməsində əhəmiyyətli rol oyanyacaq, prosesi sürətləndirəcək.
“…Bütövlükdə Azərbaycan Prezidentinin “vaksin millətçiliyinə” qarşı apardığı qlobal mübarizənin nəticəsinə böyük inamın ifadəsidir”
Siyasi şərhçi Azər Həsrət “Bakı-Xəbər”ə şərhində bildirdi ki, Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə carı ilin 4-6 noyabr tarixlərində “COVID-19-dan sonrakı dünya” mövzusunda növbəti Qlobal Bakı Forumu öz əhəmiyyəti və hədəfləri baxımından bütün dünyanın diqqətindədir. ABŞ-ın sabiq səfirinin vaskin ədalətsiziliyinin aradan qaldırılması istiqamətində bu platformanın oynayacağı rolu qabartmasının təsadüfi olmadığını deyən A.Həsrət hesab edir ki, bu tədbirdə səsləndirlən mesajların bütün dünya üçün dəyəri, əhəmiyyəti böyükdür: “Noyabrın 4-də fəaliyyətə başlayan 8-ci Qlobal Bakı Forumu həqiqətən nəinki Azərbaycanda, Azərbaycandan kənarda da çox ciddi diqqət cəlb etməkdədir, orada səsləndirilən bütün fikirlər izlənilməkdədir. Özəlliklə də Prezident İlham Əliyevin kifayət qədər əsaslandırılmış çıxışı, əlbəttə, diqqət çəkməyə bilməzdi və burada da diqqətin daha çox COVID-19-un üzərinə yönəldilməsi başadüşüləndir. Zatən, forumun özü də COVID-19 sonrası dünyaya həsr olunub və təbiidir ki, burada bu sahədə müzakirələr daha geniş yer almaqdadır. ABŞ-ın Azərbaycandakı sabiq səfirinin məsələyə münaisbətinə gəlincə, bu da başadüşüləndir. Çünki istər-istəməz bu məsələ ilə bütün dünya məşğul olur.
Azərbaycan Prezidenti COVID-19 pandemiyasının başladığı ilk gündən bu prosesdə ən fəal yanaşması ilə diqqət çəkib. Yəni bu sadəcə olaraq Azərbaycan üçün deyildi, Prezident İlham Əliyev qlobal səviyyədə COVİD-ə qarşı mübarizənin öncüllərindən biri idi, faktiki olaraq o dövrdə birinci addım olaraq Azərbaycanda önləyici tədbirlərin görülməsi üçün böyük işlər görürdü. Azərbaycan mümkün qədər zərəri azaltmağı bacardı. İlkin dövrlərdə də, indi də bu davam edir. Digər tərəfdən də, Azərbaycan Prezidenti təşəbbüslərlə çıxış edərək dünyada COVID-19-a qarşı mübarizədə ədalətin bərqərar olunması üçün öz töhfəsini verdi”.
A.Həsrət deyir ki, bu çağırışlar, çıxışlar arasında Azərbaycan Prezidentinin Qoşulmama Hərəkatına üzv ölkələri səfərbər etməsi, COVID-19-a həsr edilən böyük, qlobal toplantının keçirilməsi, onun ardınca BMT Baş Assambleyasının xüsusi sessiyasının çağırılması baş verdi, bu, Prezident ilham Əliyevin təşəbbüsü ilə baş tutub: “Eyni zamanda, müxtəlif beynəlxalq paltformalarda bu məsələnin gündəmə gətirilməsi və sairin fonunda Azərbaycan Prezidenti dünya ictimaiyyətinin artıq geniş istifadə etdiyi bir termini də dövriyyəyə buraxdı. Bu da COVID-19-la bağlı dediyi “vaksin millətçiliyi”dir. Cənab Prezident açıq mətnlə bəyan etdi ki, vaksin, peyvənd alınması məsələsində ayrıseçkiliyə yol verilir, dünyanın ən aparıcı, ən varlı dövlətləri özlərinə lazım olandan da artıq vaksin əldə edir, öz əhalisinə vurur, əhalisinin qorunması üçün səylər göstərir, lakin dünyanın iqtisadi cəhətdən zəif ölkələri, xüsusən də Afrika qitəsinin bir çox ölkələri bu məsələdə kənarda qalır. Faktiki olaraq dünyada “vaksin millətçiliyi” baş alıb gedir. Cənab Prezident də çağırışlarında qeyd edirdi ki, biz ortaq səylərlə “vaksin milliyyətçiliyi”nin önünə keçməliyik. Yəni vaksinlər dünya dövlətləri arasında bərabər bölünməlidir, kasıb ölkələrə varlı ölkələr yardım etməlidir. Bunu cənab Prezident sadəcə söz olaraq demirdi. Bilirsiz ki, artıq Azərbaycan dövləti 30-dək ölkəyə bu məsələdə yardım edib, bəzi ölkələrə maliyyə, bəzilərinə isə vaksinlərin göndərilməsi şəkilində yardımını həyata keçirib”.
Son dövrlər Azərbaycanın Qırğızıstana, Özbəkistana, Tacikistana vaksin göndərdiyini deyən A.Həsrət vurğuladı ki, Azərbaycan dövləti ÜST-ün hesabına pul ödəməklə də bəşəriyyətin bəlası olan COVID-19-dan əziyyət çəkən ölkələrə yardım etmiş oldu. “Sabiq səfirin bu bəyanatı bütövlükdə Azərbaycan Prezidentinin “vaksin millətçiliyinə” qarşı apardığı qlobal mübarizənin nəticəsinə böyük inamın ifadəsidir. Təsadüfi deyil ki, bu gün müzakirə olunan məsələlərdən biri “vaksin millətçiyi”dir”.
A.Həsrət qeyd etdi ki, Azərbaycan rəsmən vaksin ədalətsizliyinə qarşı mübarizə ortaya qoyur və Qlobal Bakı Forumunda bu istəqamətdə səsləndirilən fikirlər də Azərbaycanın əməyinin dəyərini özündə ehtiva edir. A.Həsrətin fikrincə, Azərbaycan sadəcə olaraq söz istehsal edib ictimai rəyi məşğul etmir: “Azərbaycan həm də əməldə belə davrandığını göstərir. Bu davranışın da dünyada örnək kimi göstərilməsi vacibdir. Bu baxımdan hesab edirəm ki, ABŞ-ın sabiq səfirinin fikirləri, əlbəttə, yerinə düşür və yəqin dünyanın aparıcı gücləri bu fikirlərdən nəticə çıxaracaqlar. Qlobal Forumun da hədəflərindən biri vaksin ədalətsizliyinə son qoyulması, ədalətli vaksin bölgüsünün təmin edilməsinə nail olmaqdır”.
İradə SARIYEVA
