“Türkiyə ilə Ermənistan arasında dialoq yoxdur. Rəsmi İrəvan Ankara ilə ilkin şərt olmadan münasibətlərin nizamlanması və sərhədlərin açılmasına hazırdır. Ermənistanla Türkiyə arasında diplomatik münasibətlərin olmaması, Türkiyənin 44 günlük müharibədə açıq-aşkar iştirakı və "Zəngəzur dəhlizi" ilə bağlı bəyanatlar regionda sabitliyə mənfi təsir göstərir”. Bunu “Nouvelles d'Arménie” saytına müsahibəsində Ermənistanın xarici işlər naziri Ararat Mirzoyan deyib.
A.Mirzoyan erməni xislətinə sadiq qalaraq, yenə də beynəlxalq ictimai fikri çaşdırmaq istiqamətində bəyanatlar verir.
“Mirzoyan Türkiyəni hədəfə almaqla yanlış istiqamət tutduğunu ortaya qoyur”
Bütöv Azərbaycan Ocaqları (BAO) başqanının Türk dünyası üzrə müavini, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə bildirdi ki, Ermənistan XİN rəhbərinin bu fikri də təxribat mahiyyəti daşıyır. Türkiyənin Azərbaycanla birgə regionda bir əsas gücə çevirilməsi Ermənistanı ciddi əndişələndirir, bu səbəbdən də A.Mirzoyan çaşdırıcı bəyanatlar verir: “Ermənistan XİN-in rəhbəri Mirzoyanın bu kimi açıqlamalar verməsində qeyri-adi bir şey yoxdur. Əslində biz ümid edirdik ki, son dövrlərdə Ermənistan müəyyən qədər özünün işğalçılıq siyasətindən, Türkiyəyə, Azərbaycana, bütövlükdə türk xalqına nifrət və kin ideologiyasından geri çəkiləcək. Hətta Ermənistan rəhbərliyinin bəzi bəyanatları buna müəyyən qədər ümid yaradırdı. Ancaq son günlərdə Ermənistan prezidenti Sarkisyanın, yaxud baş nazir Paşinyanın, xarici işlər naziri Mirzoyanın açıqlamalarından məlum olur ki, hələ də onlar bu regionda sülh və əminamanlığın yaranmasına çalışmır, irqçiliyin, ayrıseçkiliyin, revanşizmin aradan qaldırılması üçün addımlar atmırlar. Biz bilirik ki, istər Azərbaycan Respublikasının Prezidenti, istərsə də Türkiyə Cumhuriyyətinin Prezidenti tərəfindən dəfələrlə Ermənistanla münasibətlərin yaxşılaşa bilməsinə, bu istiqamətdə real addımların atılmasının mümkünlüyünə işarələr vurulub. Bəyan edilib ki, Ermənistan revanşizmdən, irqi ayrıseçkiliklərdən, işğalçılıq niyyətlərindən, ərazi iddialarından əl çəkərsə və normal qonşuluq siyasəti yürüdərsə münasibətlərin normallaşdırılması istiqmaətində real addımlar atıla bilər. Hətta Ərdoğanın son açıqlamasından da aydın oldu ki, Ermənistan Azərbaycanla münasibətlərində bütün gözləntiləri doğruldacaqsa, o cümlədən də Türkiyəyə qarşı əsassız ərazi iddialarından, qondarma “soyqırım” cəfəndiyyatından əl çəkəcəksə, bu ittihamlardan əl çəkəcəyi təqdirdə bu ölkə ilə münasibətlərin normallaşması mümkün olacaq. Mirzoyan isə tamam başqa bir fikir sərgiləyir, o hesab edir ki, rəsmi Ankara ilə münasibətlərin yumşalması üçün ilkin şərtlər olmamalıdır. Əslində, Mirzoyanın ifadə etdiyi ilkin şərt məsələsi Türkiyə rəhbərliyinin hər daim Ermənistan rəhbərliyi qarşısında qaldırdığı məlum məsələdir. Bunlar çox normal şəkildə ortaya qoyula və normallaşa biləcək bir məsələdir. Yəni bunların ilkin şərt kimi qiymətləndirilməsinin özü anormallıqdır. Necə ola bilər ki, bir dövlət digər dövlətlərin ərazilərinə qarşı iddia irəli sürür, yaxud hansısa qondarma “soyqırım”la ittiham edir? Eyni zamanda erməni terrorçuları nə qədər Türkiyə diplomatlarına qarşı terror aktları törədiblər, eləcə də onlar Azərbaycan ərazisində saysız terror hadisələri həyata keçiriblər”.
Ermənistan XİN başçısının Türkiyənin “Zəngəzur dəhlizi” ilə bağlı bəyanatları regionda sabitliyə mənfi təsir göstərir” fikrinin də tamamilə yanlış olduğunu deyən F.Ələkbərli hesab edir ki, o bununla Ermənistan hakimiyyətinin niyyətlərini, çoxüzlü siyasət apardığını ortaya qoyur. F.Ələkbərli deyir ki, bir tərəfdən baş nazir N.Paşinyan Azərbaycan və Türkiyə ilə münasibətlərin normallaşdırılmasının vacibliyinə, Azərbaycanla danışıqlara hazır olduğuna işarə vurur, amma başqa tərəfdən Mirzoyan Türkiyənin Zəngəzur dəhlizi ilə bağlı bəyanatlarından xoflandığını ortaya qoyur. “Mirzoyan unudur ki, “Zəngəzur dəhlizi”nin açılmasının Ermənistanın özünə də böyük xeyri var. Ümumiyyətlə, Türkiyənin “Zəngəzur dəhlizi” ilə bağlı bəyanatlarının bölgəyə müsbət təsir göstərdiyi aşkardır. Mirzoyan istəyir ki, Ermənistana qarşı heç bir ilkin şərt irəli sürülməsin, Ermənistan nə qondarma “soyqırım” ittihamlarından, nə də Azərbaycana və Türkiyəyə qarşı əsassız ərazi iddialarından əl çəksin, amma sərhədlər açılsın, münasibətlər normallaşsın, ölkəsi blokadadan çıxsın. Hesab edirəm ki, Mirzoyan Türkiyəni əsassız olaraq “regionda sabitliyi pozmaqda” ittiham etməkdənsə, özü real addımlar atmalıdır. Hətta 44 günlük müharibə dönəmində Türkiyənin Azərbaycanla əməkdaşlığını tamam başqa yerə yozması, eyni zamanda bundan həyasızcasına Türkiyəyə qarşı istifadəyə cəhd etməsi, yalanlar danışması, iftiralar atması qəbuledilməzdir. Bəli, Türkiyə Azərbaycanla bu və digər mənada əməkdaşlıq edir. Sonrakı mərhələdə bizim üçün Şuşa bəyannaməsi, Bakı müqaviləsi də var. Bunlar bəllidir. Ancaq Ermənistan da Fransa, Rusiya, İranla əməkdaşlıq edir. O zaman eyni ittihamları Ermənistanın özünə yönəltmək olmazmı ki, sənin ərazində Rusiyanın hansısa hərbi hissələri nə gəzir? Sən əgər özünü müstəqil dövlət hesab edirsənsə, o zaman sənin ərazilərində Rusiyanın hərbi bazaları nə üçün olmalıdır? Bu hərbi bazalardan Azərbaycana, Türkiyəyə, hətta Gürcüstana qarşı təhdid kimi istifadə edirsən. Sözün açığı, bu kimi ittihamlar Ermənistanın özünə aiddir. Bizim bölgədə sabitliyə təhdid elə Ermənistanın özünün yürütdüyü revanşizm, faşizm, işğalçılıq, irqçilik siyasətidir, ideologiyasıdır. Bu baxımdan Mirzoyan Türkiyəni hədəfə almaqla yanlış istiqamət tutduğunu ortaya qoyur” - deyə F.Ələkbərli qeyd etdi.
İradə SARIYEVA
