Rusiya Müdafiə Nazirliyi Qafqaz dağlarında və Krımda hava hücumundan müdafiə sistemlərinin dağlıq şəraitdə pilotsuz uçan aparatlara qarşı imkanlarını öyrənmək və sınaqdan keçirmək üçün seriya hərbi təlimlər keçirib. Bu barədə Rusiya mediası çıxış edib.
Həmin ölkənin KİV-i yazır ki, Qarabağdakı 44 günlük müharibə dağlıq şəraitdə gedən döyüş əməliyyatları zamanı dronların xüsusilə təhlükəli olduğunu göstərib: relyefə görə onları aşkarlamaq və vurmaq çox çətin olur. Ona görə də təlimlərdə Rusiyanın hava hücumundan müdafiə sistemlərinə PUA-larla kütləvi hücum edilib və onların radioelektron mübarizə vasitələri, zenit-raket kompleksləri ilə sıradan çıxarılması imkanları öyrənilib. Ekspertlər isə deyir ki, dağlıq şəraitdə ancaq bütün bölmələrin uzlaşdırılmış fəaliyyəti ilə dronlara qarşı mübarizə aparmaq olar.
Rusiya Müdafiə Nazirliyi belə təlimlərin keçirildiyini elan etməyib, amma jurnalistlər nazirlikdəki mənbələrdən öyrənib ki, Krımda və Qafqaz dağlarında keçirilən təlimlər zamanı Hava Hücumundan Müdafiə və radioelektron mübarizə bölmələri PUA-ların hücumlarına qarşı yeni taktikanı sınaqdan keçiriblər. Təlimlər döyüş şəraitinə maksimal yaxınlaşdırılmış şəraitdə keçirilib, bu zamanlar dronlara təpəliklərin arxasında və ya dərələrdə gizlənərək hədəflərə yaxınlaşma imkanı yaradılıb. Mənbələr təlimlərin nəticələrinin “uğurlu olduğunu” bildiriblər. Rusiyanın belə təlimlərə start verməsini həm də 44 günlük Qarabağ müharibısindən çıxardığı dərs kimi qəbul edə bilərikmi?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Qarabağdakı döyüş əməliyyatları dronların Rusiya üçün də necə təhlükəli ola biləcəyini göstərdi: “Həmin müharibədə Azərbaycan “Bayraktar TB2” zərbə PUA-larından, İsrail istehsalı olan müxtəlif kamikadze-dronlardan, hətta Türkiyənin istehsalı olan kiçik “Kargu-2” kamikadze-kvadrokopterlərindən istifadə edib. Dronların köməyi ilə düşmənin zirehli texnikası, artilleriyası və hava hücumundan müdafiə vasitələri məhv edilib. Ona görə də Rusiyanın hava hücumundan müdafiə sistemi təkmilləşdirilir, bu yaxınlarda keçirilən “Qərb-2021” təlimlərində hava hücumundan müdafiənin yeni idarəetmə sistemi tətbiq edilib. “Bayraktar”ların üstünlükləri 44 günlük müharibə zamanı üzə çıxdı. Bəllidir ki, Ermənistanın hava hücumundan müdafiə sistemlərinin köhnə və zəif cəhətlərinin olduğu “Bayraktar”ları vura bilməməsi ilə aşkarlandı. Bu, əslində Rusiyanın silahlarının ifşası idi. “Bayraktar”ların uğurlarının əsas sirri sürətində və yüksəkliyə qalxma özəlliyindədir.
"Bayraktar” və MAM-L (PUA-nın atdığı raketin adı) ikilisi ruslar tərəfindən vurula bilməz, çünki onlar Rusiya hava hücumundan müdafiə sistemlərinin limitini üstələyir. Müharibədə 13-ü vurulan “9K33 OSA” zenit-raket kompleksi, 360 km / s-dan aşağı sürətlə uçan hədəflərini 5 km uzaqlıqdan və 6,4 km hündürlükdən aşkar edə bilər. “Bayraktar” isə 130 km/saatdan daha yavaş uça, 5.5 km yüksəklikdən atəş edə bilər və MAM-L-in mənzili 8-14 km arasındadır. “Bayraktar” Rusiya istehsalı olan
S-300-lərdən də yayına bilir. Çünki bu HHM sistemi 180 km/s-dan aşağı sürətli uçuşları daxili nasazlıqlar kimi qəbul edir və izləyə bilmir. “Bayraktar” isə sürətini 130 km/s-a qədər azaltmaq qabiliyyətinə malikdir. Bunların hamısı ətraflı öyrənilib və Rusiyanın hava hücumundan müdafiə sistemlərinin hamısı uğurla vurulub. Elektron dalğaların qarşısını alan vasitələrə belə ehtiyac qalmayıb. Azərbaycan ordusunun bu müvəffəqiyyəti Rusiyanı ciddi narahat edir. Məlumdur ki, Rusiya həm də silah satışından yaxşı pul qazanır. Onların silahlarının Qarabağ cəbhəsində yaşadığı uğursuzluq dövlət büdcələri üçün də ciddi ziyandır. Buna görə də öz silahlarını təkmilləşdirmək istəyirlər”.
Məhəmmədəli QƏRİBLİ
