Fransanın Azərbaycanda ilk səfiri olmuş Jan Perən yeni açıqlama ilə çıxış edib. O bildirib ki, Qarabağda yaşayan ermənilər Azərbaycan vətəndaşlarıdır. Onun sözlərinə görə, Azərbaycanın qələbəsinin möhkəmləndirilməsi mərhələsi uğurla davam edir:
“Otuz ildən sonra Azərbaycan Qarabağ problemini həll etməyə nail olub. Halbuki, ATƏT-in Minsk Qrupu buna nail ola bilməmişdi. Baxmayaraq ki, çoxlu sayda qətnaməyə səs vermişdik. Azərbaycan Prezidenti İlham Əliyev əməliyyatları uğurla başa çatdırmağa nail olub və artıq bir ildir münaqişə həll olunub. Bu gün Azərbaycan qələbəsinin möhkəmləndirilməsi dövrünü yaşayır. Bu gün Azərbaycan sülhün bərpa olunması dövrünə qədəm qoyub".
J.Perən deyib ki, bu mərhələdə Azərbaycanın qarşısında həll olunmalı bir sıra vacib məsələlər durur: "Bunlardan biri Qarabağda yaşayan ermənilərin vətəndaşlığı məsələsidir. Azərbaycanın bu məsələlərdə mövqeyi gün kimi aydındır. Qarabağda yaşayan ermənilər Azərbaycan vətəndaşlarıdır. Lakin bu məsələyə ermənilər etirazlarını bildirir və bundan sonra da müqavimət göstərməkdə davam edəcəklər. Xüsusilə bu məsələ ATƏT-in Minsk Qrupu səviyyəsində müzakirələrə çıxarılacaq və ermənilər həmsədrlərə təsir göstərməyə çalışacaqlar. Ermənilər daha çox Fransaya təsir göstərməkdə davam edəcəklər. Lakin mən bu məsələdə də Azərbaycanın uğur qazanacağına inanıram".
Keçmiş səfirlərin bu tip açıqlamalarında səmimiyyət notlarını görmək çətindir. Maraqlıdır ki, onlar reallığı əks etdirən açıqlamaları vəzifə başında olanda yox, məhz təqaüdə çıxandan sonra verirlər. Fransanın keçmiş səfiri düz adam olsaydı, bu cür açıqlamaları öz postunda oturanda deyərdi. Qarabağda yaşayan ermənilərin Azərbaycan vətəndaşı olduqlarını kim bilmir ki? Güya yeni nəsə icad edib?
Politoloq Elşən Mustafayev qəzetimizə açıqlamasında bildirdi ki, keçmiş səfirlərin indi hansısa düzgün fikri deməsi nəyisə dəyişmir: “Fransa daima ermənipərəst mövqeyi ilə seçilib. Həmin ölkə ATƏT-in Minsk Qrupunun həmsədri olsa da, açıq şəkildə özünü Ermənistanın müttəfiqi kimi aparıb. Hətta müharibənin gedişi zamanı belə Fransa Ermənistanın haqsız mövqeyini müdafiə etməkdən çəkinmədi. Keçmiş səfirin onda niyə səsi çıxmırdı? Və ya uzun müddət Fransa həmsədr ölkə kimi Ermənistanı işğaldan çəkindirməklə bağlı heç bir addım atmayıb. Yəqin ki, bir sıra ölkələrin Ermənistandakı səfirlərinin fəaliyyətini yaxından izləyirsiniz. Həmin ölkələrin Azərbaycandakı səfirləri ilə müqayisədə onlar çox fəaldırlar. Əksər hallarda Azərbaycandakı səfirlərin də əvəzindən ölkələrinin mövqelərini ifadə edirlər. Həmin açıqlamaların çoxu da Ermənistanın xeyrinə olur. Yaxşı olardı ki, Fransanın keçmiş səfiri bir qədər də aydın danışaydı. Qarabağda yaşayan ermənilərin Azərbaycan vətəndaşı olmağını deyir, ancaq fikrini nəsə tamamlamır. Yaxşı olardı bunun ardınca deyəydi ki, onlara heç bir status verilə bilməz. Həmin ərazilərdə Azərbaycanın suvereniteti təmin olunmalıdır. Bunları demədən hansısa növbətçi fikirləri səsləndirmək yalnız bekarçılıq əlaməti sayıla bilər”.
Məhəmmədəli QƏRİBLİ
