Azərbaycanın İsraildən “hava-hava” tipli I-Derby ER raketləri aldığı bildirilir. Məlumata görə, raketlər artıq MiQ-29 qırıcılarında tətbiq olunmaq üçün Azərbaycan Hərbi Hava Qüvvələrinin silahlanmasına daxil olub.
I-Derby ER raketləri İsrailin “Rafael” şirkəti tərəfindən istehsal olunur və “Derby” ailəsindən olan raketlərin dərindən modernizasiyasıdır. I-Derby ER raketləri orta mənzillidir, hədəfi 100 kilometrə qədər məsafədən vura bilər. Raketin hədəfə yönləndirilməsi kombinə edilib və uçuş mənzilinin ortalarına qədər komanda-inersiya sisteminə əsaslanır, mənzilin sonuna yaxın isə raket radilokasiya siqnalları əsasında hədəfə müstəqil yönəlir. Başlıq təmassız lazerlidir.
Bu arada Ermənistan Azərbaycanın sözügedən yenilikləri tətbiq etməsindən bərk narahat olmağa başlayıb. Erməni mediası əməllicə xoflanıb. İdda edirlər ki, bu yöndə görülən işlər məhz Ermənistana qarşı yönəlib. Xüsusən də Azərbaycan-İsrail hərbi əməkdaşlığının genişlənməsi onları daha çox narahat edir: “2022-ci il üçün Azərbaycanın müdafiə, milli təhlükəsizliyinin təmin edilməsinə ayrılan xərclər 4 milyard 489 milyon 892,429 min manat (2,6 milyard dollar) təşkil edəcək. Bütün bunlar yalnız iki sadə şeyə dəlalət edir. Birincisi, Azərbaycan hələ də Ermənistana qarşı güc tətbiq etmək niyyətindədir. İkincisi, İsrail bu işdə ona kömək etməyə hazırdır. Yəhudi dövləti İsraildə səfirlik belə açmayan Azərbaycanla ümumiyyətlə görünməmiş əməkdaşlıq qurub”.
Görünən odur ki, müsəlman ölkəsi olan Azərbaycanın İsraillə uğurlu əməkdaşlıq qurmasını ermənilər heç cür həzm edə bilmir. Bundan hər keçən gün daha çox narahat olurlar.
“Ermənistan görür ki, Azərbaycan döyüşdə qələbə çalsa da arxayınlaşmır və bu səbəbdən hərbi xərclərini azaltmır”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert İbrahim Rüstəmlinin fikrincə, ermənilərin Azərbaycan-İsrail əməkdaşlığından bu dərəcədə xoflanmasının bir neçə səbəbi var: “Bu narahatlıq təkcə hərbi amillərlə bağlı deyil. Bu, həm də siyasi amillərdən qaynaqlanan məsələdir. Çünki ermənilər yaxşı bilir ki, yəhudi lobbisi zaman-zaman Azərbaycanın maraqlarını qorumaqdan ötrü oz imkanlarını əsirgəmir. Azərbaycan-İsrail hərbi əməkdaşlığı ilk parlaq nəticəsini Aprel döyüşləri zamanı göstərdi. Belə ki, 2016-cı ildə İsrail istehsalı olan “Harop” kamikadze dronları vasitəsilə düşmənin bir neçə komanda mərkəzi, digər mövqeləri məhv edildi. Bununla yanaşı, İsrail istehsalı olan “Spayk” raketləri ilə çoxsaylı erməni tankı və digər hərbi nəqliyyat vasitələri məhv edildi. Aprel döyüşlərindən sonra Ermənistan ordusu işğal altındakı ərazilərimizdə mühəndis-istehkam qurğularını xeyli möhkəmləndirdi. Ancaq bütün bunlar 27 sentyabrda başlayan Vətən müharibəsindən sonra Azərbaycan Ordusunun irəliləməsinin qarşısını ala bilmədi. Qardaş Türkiyədən alınan silarlarla yanaşı, İsraildən də alınan müasir silah sistemləri sayəsində işğalçı tərəfə güclü zərbələr endirildi. Başqa bir tərəfdən, Ermənistan görür ki, Azərbaycan döyüşdə qələbə çalsa da arxayınlaşmır və bu səbəbdən hərbi xərclərini azaltmır. Daha güclü ordu yaratmaqdan ötrü ən son müasir silahlar alır. Ordunun döyüş qabiliyyəti artırılır, hərbi hava qüvvələrinin texnikası yenilənir. Bütün bu prosesdə yenə də İsraillə yaxından əməkdaşlıq edilir. Bax bu səbəbdən ermənilər bu qədər xof və narahatlıq içindədilər”.
Hərbi ekspert onu da vurğuladı ki, Ermənistan və erməni lobbisi Azərbaycan-İsrail əməkdaşlığının genişlənməsinə mane ola bilməyəcək.
Vidadi ORDAHALI
