Qarabağ Zəfəri tariximizə əbədi olaraq yazılıb. 44 günlük Vətən müharibəsində Azərbaycanın qazandığı şanlı qələbənin bir illiyinin sevincini bizimlə bölüşən ölkələr az deyil. Müharibənin gedişində də Azərbaycana rəsmi dəstək verən ölkələrin əksəriyyətinin mətbuatında Azərbaycanın möhtəşəm Zəfərinin bir illiyinə həsr edilən yazılar işıq üzü görür.
Qarabağ Zəfərinin bir illiyi Gürcüstanın dövlət qəzetində, Almaniya və başqa ölkələrin mediasında işıqlandırılıb. Hətta Ukraynada “Qarabağ Azərbaycandır” bilbordlari hazırlanıb. Başqa ölkələrdə də Zəfər yürüşümüzün bir illiyi ilə bağlı ən müxtəlif səviyyədə tədbirlər görülür. Bu o deməkdir ki, Azərbaycanın qələbəsinə, zəfərimizin bir illiyinə biganə qalınmır.
“Ayrı-ayrı ölkələr yaxşı bilir ki, Azərbaycan haqlı tərəfdir və 44 günlük müharibədə də haqlı olduğunu sübut etdi, haqqını döyüşərək müharibə meydanında aldı”
Müasir İnkişaf Birliyinin sədri, politoloq Mübariz Göyüşlü bizimlə söhbətində bildirdi ki, bütün dünya, xüsusən də dost ölkələr Azərbaycanın qələbəsinin timasalında haqqın, ədalətin bərpa edilməsinin şahidi oldular. “Azərbaycanın qələbəsi gerçəkdən böyük bir hadisədir. 44 gün ərzində bu qədər ərazilərin işğaldan azad edilməsi çox böyük nailiyyətdir. 44 günlük müharibəyə obrazlı şəkildə ildırım sürətli müharibə də demək olar. 30 il müddətində bərkidilmiş istehkamları 44 gün ərzində keçib getmək nəinki Azərbaycanın hərb tarixində, dünya hərb tarixində bir yenilik oldu. Azərbaycanın burada istifadə etdiyi hərbi taktika, hərbi texnikadan istifadə dünyanın diqqət mərkəzindədir. Bu mənada, istər bizim ali siyasi rəhbərliyin, istər hərbi komandanlığın, istər əsgər və zabitlərimizin, istərsə də, xalqımızın dəmir yumruğa çevrilib düşməni darmadağın etməsi dünya üçün bir maraq məsələsinə çevrilib. Mütərəqqi bəşəriyyət, haqqın yanında olan dövlətlər, təşkilatlar bunu nəinki təqdir edirlər, hətta Azərbaycanın haqqlı qələbəsini, zəfərini təbliğ də edirlər. Burada başqa bir məsələ, Azərbaycan ərazisinin təcavüzə mərzu qalması faktıdır. Ayrı-ayrı ölkələr yaxşı bilir ki, Azərbaycan haqlı tərəfdir və 44 günlük müharibədə də haqlı olduğunu sübut etdi, haqqını döyüşərək müharibə meydanında alıb. Bu da, təbii ki, bəşəriyyət tərəfindən hörmət və ehtiramla qarşılanır. Bir sıra ölkələrin rəsmi və müstəqil mediasının Azərbaycanın qələbəsinin bir illiyinə biganə qalmaması təbiidir, çünki onlar 44 günlük Vətən müharibəsinin timsalında haqqın, ədalətin zəfər çalmasının şahidi oldular. Bu qələbə başqa ölkələrdə də ümid yaratdı ki, gec-tez haqq-ədalət yerini tutur, təki o haqq, ədalətin uğrunda döyüşməkdən geri çəkilməyəsən. Azərbaycan ədalətin təntənəsini bütün dünyaya göstərdi”.
M.Göyüşlü həmçinin qeyd etdi ki, Azərbaycanın qələbəsinə bu qədər önəm verilməsinin səbəblərindən biri də Rusiyanın təcavüzkar Ermənistanla əlaqəsi və onu dəstəkləməsidir. İmperialist mövqedə olan Rusiyanın işğalçını, terrorçunu dəstəkləməsinin bütün mütərəqqi dövlətlərdə qıcıq yaratdığını deyən M.Göyüşlünün sözlərinə görə, Azərbaycanın qələbə sevincini paylaşan Ukrayana və Gürcüstan imperialist Rusiyanın təcavüzünə məruz qalıblar. “Azərbaycan da Rusiyanın Ermənistanı dəstəkləməsi siyasətindən əziyyət çəkir. Ona görə də bizləri həm də ortaq bir məsələ birləşdirir, bu da Rusiyanın aqressivliyi, təcavüzkarı dəstəkləməsi və imperialist siyasətidir. Bütövlükdə bizim Zəfərimizin bir illiyinin sevincinə biganə qalmayan, reklam lövhələri, bilbordlar hazırlayan, qələbəmizi mətbuatında işıqlandıran, təbliğ edən bütün dövlətlər haqqın yanında yer aldıqlarını sübut etdilər” - deyə M.Göyüşlü qeyd etdi.
İradə SARIYEVA
