Ermənistanın Baş naziri Nikol Paşinyan Qarabağdakı separatçıların lideri Araik Arutyunyanla görüşündə ATƏT-in Minsk Qrupu çərçivəsində sülh danışıqlarının bərpasının vacibliyini vurğulayıb.
İrəvanda keçirilən görüşdə Paşinyan 44 günlük Qarabağ müharibəsi bitəndən sonra işin heç dayanmadığını vurğulayıb. Bu müddətdə Qarabağda normal həyatın bərpa olunduğunu qeyd edən Paşinyan görülən işləri qənaətbəxş saymadığını da bildirib. Bütün bunlarla yanaşı, Paşinyan yenə də status məsələsi ilə bağlı sərsəmləyib. O, ATƏT-in Minsk Qrupu çərçivəsində sülh danışıqlarının bərpasının vacibliyini vurğulayaraq, statusla bağlı bunları qeyd edib: “Ümumi qəbul edilmiş prinsiplər, millətlərin öz müqəddəratını təyinetmə hüququ əsasında, ATƏT-in Minsk Qrupu çərçivəsində danışıqların bərpası, Dağlıq Qarabağ münaqişəsinin yekun və hərtərəfli həlli və Qarabağın statusunun müəyyənləşməsi vacibdir”.
Görünən odur ki, Paşinyan Qarabağ məsələsi ilə bağlı ziddiyətli yanaşma sərgiləməkdə qərarlı görünür. Bir tərəfdən sülhdən, kommunikasiya xətlərinin açılmasından danışır, o biri tərəfdən pozucu status məsələsini qabardır. O baxımdan bütün bunlar bir arada ola bilərmi?
“Ermənistan status məsələsindən imtina etməyəcəksə, o zaman qarşı tərəfə digər güzəştlər edilə bilməz”
Məsələyə münasibət bildirən AMİP sədri Arzuxan Əlizadənin sözlərinə görə, sadalanan məsələlər hansı konteksdən yanaşsaq bir araya sığmır: “Ona görə ki, bir-biri ilə kəskin ziddiyət təşkil edir. Paşinyan bu cür ziddiyətli fikirlər səsləndirməklə prosesi yubadır. Bir tərəfdən nəqliyyat əlaqələrinin bərpasının vacibliyindən, sərhədlərin delimitasiyasından danışır. O biri tərəfdən hər fürsətdə Qarabağın status məsələsini gündəmə gətirməyə cəhd edir. Diqqəti çəkən məqam odur ki, Paşinyan hər dəfə ATƏT-in Minsk Qrupunun prosesə qoşulması ilə bağlı xüsusi canfəşanlıq göstərir. Çünki yaxşı bilirlər ki, ATƏT təşəbbüsü ələ alsa, bu, Ermənistanın xeyrinə olacaq. Ona görə ki, 30 ilə yaxın Minsk Qrupu ancaq Ermənistanın maraqlarına xidmət etdi. Paşinyan hər dəfə status məsələsini qabartmaqla ictimai rəyə hesablanmış gedişlər etsə də, əslində Ermənistan bundan əl çəkmək fikrində deyil. Ona görə də biz son dərəcə diqqətli oilmalıyıq və mövqeyimizi sərt şəkildə ifadə etməliyik. Ermənistan status məsələsindən imtina etməyəcəksə, o zaman qarşı tərəfə digər güzəştlər edilə bilməz. Həm Ermənistana, həm də vasitəçilik edən tərəflərə deməliyik ki, iki ziddiyətli yanaşma bir arada ola bilməz. Ermənistan Azərbaycanın ərazi bütövlüyünü tanımalıdır. Ondan sonra silahlı birləşmələrini Qarabağdan çıxarmalıdır. Yalnız bütün bunlardan sonra qarşı tərəfə güzəşt edilməlidir”.
Partiya sədri hesab edir ki, ciddi təzyiqlər sayəsində Ermənistanı ram etmək mümkündür.
Vidadi ORDAHALLI
