Milli Məclis və Azərbaycan Gənclər Fondu arasında Azərbaycan Gənclər Parlamentinin yaradılması barədə memorandum imzalanıb. Azərbaycanda Gənclər Parlamenti yaradılır.
Qeyd edək ki, Milli Məclis sədrinin müavini, parlamentin Gənclər və idman komitəsinin sədri Adil Əliyev imzalanma mərasimində çıxış edərkən bildirib ki, fəaliyyətə başlaması nəzərdə tutulan Azərbaycan Gənclər Parlamenti ölkəmizdə gənclərin social-iqtisadi vəziyyətinin monitorinqi, gənclər arasında hüquq mədəniyyətinin yüksəldilməsi, gənclərin cəmiyyətin ictimai və siyasi həyatında fəal rol oynaması, həmçinin gənclərin Milli Məclisdə müvafiq qanun layihələrinin ictimai müzakirələrində iştirak etməsi baxımından olduqca mütərəqqi təsisat olacaq.
Azərbaycanda Gənclər Parlamentinin yaradılmasına münasibətiniz necədir?
Tural Abbaslı: “Bir qapıya oynanılan futbol nə qədər maraqlıdırsa, bu parlament də o qədər maraqlı olacaq”
Ağ Partiyanın sədri Tural Abbaslı “Bakı-Xəbər”ə bildirdi ki, illər əvvəl də bənzər layihə olub, lakin həmin təsisat özünü doğrultmayıb: “Azərbaycan Gənclər Parlamenti ideyası, səhv etmirəmsə, ilk dəfə 2004-2005-ci illərdə var idi. Hətta bir ara bu təsis də olundu, kanallardan birində də onların toplantıları canlı yayımlanırdı. Yenə də səhv xatırlamıramsa, Ceyhun Osmanov orada rəhbərlik edirdi. Amma layihə uğursuz alındı və demək olar ki, heç bir effekti olmadı. Niyə? Çünki orada da bizim hazırkı parlamentdəki kimi təmsil olunan gənclərin əksəriyyəti seçki yolu ilə deyil, yaxud ümumi siyasi spektr nəzərə alınaraq yox, hakimiyyətin özünün maraqlarına uyğun şəkildə formalaşdırılmışdı. Təbii ki, rəqabət, debat, fikir mübadiləsi olmayan yerdə heç bir inkişaf gedə bilməz. Yəni ideya olaraq yaxşıdır, parlamentçiliyi öyrənmək, gənclərin disskusiyalarda iştirak etməsi, ola bilsin gəncləri narahat edən hansısa məsələlərim simvolik də olsa orada müzakirələrinin yayımlanması faydalı olar. Amma bu həmin o Gənclər Parlamentinin hansı şəkildə formalaşdırılmasından, idarəetmə metodundan çox asılı olacaq. Mən inanmıram ki, bu məsələdə yenə də əks fikir, opponent fikir, yaxud qarşı fikir nəzərə alınsın. Bu da, elə bilin ki, bir qapıya oynanılan futbola bənzəyəcək. Bir qapıya oynanılan futbol nə qədər maraqlıdırsa, bu parlament də o qədər maraqlı olacaq. Əgər dediyimiz kimi formalaşdırılmasa”.
T.Abbaslının fikrincə, Azərbaycanın bütün siyasi spektri nəzərə alınacaqsa, Gənclər Parlamentində müxtəlif fikirli qurumlar, insanlar təmsil olunacaqsa, nəticəni görəcəyik. T.Abbaslı deyir ki, bu hələ təşəbbüsdür, onun nəticəsini həyata keçirildikdən sonra görmək mümkün olacaq.
Vuqar Rəhimzadə: “Gənclər Parlamentinin yaradılması təşəbbüsü, bütövlükdə gənclərin bu istiqamətdə təmsil olunması çox müsbətdir”
Yeni Azərbaycan Partiyasının (YAP) Xətai rayon təşkilatının sədri, “İki sahil” qəzetinin baş redaktoru Vüqar Rəhimzadə bizimlə söhbətində bildirdi ki, Gənclər Parlamentinin yaradılması müsbət addımdır: “Gənclər Parlamentinin yaradılması təşəbbüsü, bütövlükdə gənclərin bu istiqamətdə təmsil olunması çox müsbətdir. Gənclərlə bağlı kifayət qədər uğurlu layihələr reallaşdırılıb, işlər görülüb. Gənclərlə bu istiqamətdə də işlər gerçəkləşməli və həyata keçirilməlidir. Gənclər bizim avanqard qüvvəmizdir, onlar kifayət qədər aktiv, fəal, cəmiyyətin aparıcı qüvvəsidir. Ona görə də, gənclərlə əlaqədar bütün layihələri, təşəbbüsləri dəstəkləyirəm. Parlament qanunvericilik bazasında da gənclərlə bağlı belə bir təşəbbüsün, layihənin olması çox müsbət haldır. Belə layihələrin gənclərin vətənpərvər, milli ruhda inkişaf etməsində, onların dövlətçiliyə, milli məfkurəyə bağlı olmasında çox mühüm rolu var”-deyə V.Rəhimzadə vurğuladı.
İradə SARIYEVA
