“Caliber” hərbi-analitik platforması iddia edir ki, İran Ermənistanı Azərbaycanla yeni müharibəyə hazırlayır.
“Caliber”ə məlumatlı mənbədən daxil olan informasiyaya əsasən, son günlər İran və Ermənistan arasında hərbi sahədə əməkdaşlıq daha da genişləndirilir, İrəvan öz hərbi sənaye kompleksini İranın vasitəsilə bərpa etməyə çalışır.
Məhz bu səbəblərdən irəli gələrək İranın hərbi və siyasi dairələrinin İrəvana səfərlərində intensivlik müşahidə edilir. Bütün bunlar “Caliber”in hazırladığı xüsusi layihədə iddia edilir.
Qeyd edək ki, “Caliber” bu mövzuda xüsusi video da hazırlayıb.
“İran Ermənistanı Azərbaycanla yeni müharibəyə hazırlayır” iddiası nə dərəcədə doğru ola bilər?
“Ermənistan sadəcə bir oyuncaqdır və daha dəqiq desək, müharibə ritorikasını səsləndirmək üçün vasitədir”
Siyasi ekspert Rövşən Rəsulov “Bakı-Xəbər”ə şərhində bildirdi ki, Ermənistanın Azərbaycana qarşı yeni müharibəyə hazırlaşması iddialarına etinasız yanaşmaq olmaz: “Bəri başdan deyə və təsdiq edə bilərik ki, reallığa qalanda Ermənistanın “ipinin üzərinə odun yığmaq” olmaz. Çünki İrəvan daim öz vədinə əməl etməyən tərəf kimi tanınır və bu fakt əslində belə deməyə əsas verir ki, qonşularının torpaqlarına göz dikməyə alışmış Ermənistan, hətta düşdüyü ağır və çıxılmaz böhrana baxmayaraq, hələ də revanşçılıq hissləri ilə alışıb-yanmaqdadır. Bu mənada, bir sıra informasiya mənbələrində Ermənistanın Azərbaycana qarşı yeni müharibəyə hazırlaşması iddialarına etinasız yanaşmaq olmaz. Xüsusilə İran-Ermənistan münasibətləri fonunda bu məsələ daim diqqətdə saxlanılmalıdır. Bu xüsusda diqqəti mövcud məsələni sübut edən daha bir faktora yönəltmək istərdim. Belə ki, bu günlərdə rəsmi Tehrana yaxınlığı ilə seçilən “Irdiplomacy” saytında çıxış edən iranlı siyasi analitik Ehsan Movahediyan qeyd edib ki, vacib olduğu zaman İran Ermənistana hərbi və kəşfiyyat dəstəyi göstərməlidir və bu kimi vasitələrlə Türkiyə-Azərbaycan hərbi-strateji əməkdaşlığına mane olmaq mümkündür. Açıq şəkildə Ermənistana dəstək mövqeyindən çıxış edən iranlı siyasi ekspert sözügedən məqaləsində bu birliyi “regionda ekspansionist tendensiya” adlandırır və eyni zamanda təklif edir ki, İran bu məsələdə Rusiya ilə intensiv danışıqlara başlamalı, Qafqazda Tehranın maraqlarına yaranan təhlükədə Rusiyanın razılığı müşahidə edilməməli, üstəlik, İran özünəməxsus geosiyasi ağırlığı və mümkünlüyünü Qafqaz regionunda artırmalıdır. Göründüyü kimi, bu açıq-aşkar dolayısı təhdid, yaxud bu yöndə olan çağırışdır və söz yox ki, Azərbaycanla apardığı 44 günlük müharibədə sarsıdıcı məğlubiyyətə uğrayan Ermənistan həmin fürsəti əldən vermək istəmir. Əminliklə deyə bilərik ki, Tehranın bənzər təklifləri İrəvan tərəfindən dəyərləndirilir”.
R.Rəsulovun sözlərinə görə, həmin məqalədə çıxış edən Ehsan Movahediyan həmçinin digər bir məsələyə - sanksiyalara da toxunaraq bildirir ki, ölkəsi sanksiyaların azaldılması üçün fəaliyyətə keçməlidir və bu vasitə ilə böyük qonşularına qarşı müqavimət imkanlarını artırmalıdır. “Maraqlı məqam isə budur ki, Tehran hakimiyyətinə yaxınlığı ilə seçilən siyasi ekspert sözügedən məqaləsində yalnız Türkiyəni və Azərbaycanı deyil, həm də dolayısı ilə Rusiyanı hədəfə alır və Moskvanı Tehrana qarşı cinahda görür, yaxud belə göstərməyə çalışır. Məhz bu kontekstdən yanaşma edən müəllif mövzunu Ermənistanın üzərinə aparır, İran-Ermənistan birliyi barədə ismarıclar yollayır. Ona görə də İran mövcud sərhədlərin saxlanılması məsələsində Ermənistanın mövqeyini dəstəkləməyə, üstəlik hərbi və kəşfiyyat dəstəyini göstərməyə çağırış edir.
Göründüyü kimi, bir müddət əvvəl rəsmi Tehranın regionda öz hərbi-diplomatik varlığını, eləcə də mühümlüyünü sübut etməyə çalışması, hətta Azərbaycanın işğaldan çıxararaq bərpa etdiyi sərhədlərində hərbi təlimlər keçirməsi belə İranın istədiyi nəticələri vermədi. O cümlədən, İranın xarici işlər nazirinin Moskva səfəri və Kreml uğursuzluğu da bu mənada özünü təsdiq edir ki, Tehran nəinki Qafqazda, hətta Ərəb Birliyi ilə münasibətlərindəki soyuq davranışlarında bütün qonşularını müəyyən mənada itirib, yaxud etimadını qeybə uğradıb – Erməistandan başqa. Ermənistan isə sadəcə bir oyuncaqdır və daha dəqiq desək, müharibə ritorikasını səsləndirmək üçün vasitədir. Ona görə də Tehran hazırkı situasiyada yeganə çıxış yolunu İrəvanla sıx təmaslarda görür, üstəlik, bəlli adamları vasitəsilə hərbi və kəşfiyyat məsələlərində təkliflərini irəli sürür. Lakin son məqamda deyə bilərik ki, Ermənistanın yeni müharibəyə hazırlaşması, yəni revanşçılıq siyasəti yürütməsi ehtimalının mövcudluğu bu gün də gündəmdədir”. R. Rəsulovun fikrincə, bu faktı 2020-ci ilin noyabrında imzalanmış Azərbaycan, Rusiya və Ermənistan arasındakı üçtərəfli bəyanatdakı məlum bəndlərin İrəvan tərəfindən realizə edilməməsi ilə əlaqələndirə bilərik: “Artıq həmin bəyanatdan bir il ötməkdədir və bu gün Qarabağda separatçı quldur dəstələrinin hələ də qalmaları, silahlarını təhvil verməmələri, tanınmayan separatçı qurumun buraxılmaması və s. kimi məsələlər belə bir qənaətə gəlməyə zəmin yaradır”.
İradə SARIYEVA
