Ermənistan mətbuatında ötən il baş verən 44 günlük müharibə ilə əlaqədar Rusiyaya qarşı ittihamlar səngimək bilmir. İndi də Rusiyanı müasir silah sistemlərini bilərəkdən verməməkdə ittiham edirlər.
Sözügedən məsələ ilə bağlı “ArmenianReport” portalı yazır ki, Rusiya bilərəkdən PUA və REB-ləri Ermənistana verməyib: “Rusiya bizim strateji müttəfiqimizdir”, “Rusiya və Ermənistan həm ikitərəfli müqavilələr əsasında, həm də KTMT çərçivəsində müttəfiqdir”, “Rusiya bütün gücünü erməni dövlətlərinə qəsd edənlərin üzərinə atacaq”. Uzun illər erməni cəmiyyəti bu nağıllarla həm Ermənistandakı “beşinci kolon”un çoxsaylı nümayəndələri, həm də Robert-Serjik rejiminin pulunu ödəmiş rusiyalı ekspertlər tərəfindən doldurulub. Ermənistanda çoxları onlara inanırdı və buna görə də rahat, sakit vəziyyətdə qaldılar. Ancaq belə olmadı. Rusiya ordusunun arsenalında həm müasir PUA-lar, həm də onlarla mübarizə aparan sistemlər var. Bunu Soçidə Putin də etiraf etdi. Putin dedi ki, Rusiya son illərin münaqişələrində özünü effektiv və təhlükəli silah kimi göstərən pilotsuz uçuş aparatlarının hücumlarını effektiv şəkildə dəf etməyi öyrənib. Müttəfiqimizin iki mindən çox PUA və müasir PUA əleyhinə REB sistemləri var. Lakin Moskva onların kiçik bir hissəsini belə Ermənistanla bölüşmək istəmədi. Moskva bizə ən azı yüz PUA və bir neçə REB sistemi, məsələn, "Silok" və ya RB-341V "Leer-3" satsaydı, müharibənin nəticəsi açıq şəkildə fərqli olardı. Amma təəssüf ki, Rusiya özünün dar düşüncəli maraqlarını rəhbər tutaraq, Ərdoğan və Əliyevin dövründə “yıxıldı” və bununla da Zaqafqaziyadakı yeganə müttəfiqinə xəyanət etdi”.
Göründüyü kimi, Ermənistan yenə məğlub olmalarının səbəbini Rusiyada axtarır. Maraqlıdır, Rusiya müasir PUA və ondan qorunmaq üçün müasir REB sistemlərə malikdirmi?
“Rusiya güclü və müasir REB sistemlərinə malik olsaydı, o zaman...”
Məsələyə münasibət bildirən hərbi ekspert Ramil Məmmədlinin fikrincə, bütün bunlar sadəcə ermənilərin fantaziyasıdır: “Bəli, Rusiya böyük nüvə dövlətidir, güclü hərbi arsenala malikdir. Bütün bunlar öz yerində. Ancaq Rusiyanın pilotsuz uçuş aparatları sahəsində imkanları ABŞ, Türkiyə, İsraillə müqayisədə xeyli məhduddur. Düzdür, Rusiyanın da PUA-ları var, amma onların imkanları xeyli məhduddur. Bunu bilməyən yoxdur. Rusiya güclü və müasir REB sistemlərinə malik olsaydı, o zaman Qarabağ və digər döyüşlərdə çoxsaylı OSA zenit-raket kompleksləri məhv edilməzdi. Hansı ki, sözügedən sistemlər və digər bu kimi hərbi qurğular dron zərbələrinin qarşısında aciz qaldı. Bütün bunlar isə Rusiyanın sözügedən hərbi-texniki vasitələrinə inamı sarsıdır. Yəni bundan sonra həmin vasitələrə dünya bazarında müştəri tapmaq asan olmayacaq. Rusiya belə bir vəziyyətə düşməyi bilərəkdən istəyərmi? Təbii ki, yox. Rusiyanın yüksək dəqiqliyə malik PUA-ları, REB sistemləri olsaydı, o zaman bunu ən azından Ukraynada tətbiq edərdi. Ona görə də bununla bağlı Rusiyaya yönələn ittihamlar xəstə erməni düşüncəsinin məhsuludur. Heç bir hərbi, siyasi və elmi əsası yoxdur”.
Hərbi ekspert onu da qeyd etdi ki, ermənilər hər zaman günahı kimdəsə axtarmağa adət ediblər.
Vidadi ORDAHALLI
