Son günlərdə dünyanın diqqəti yenidən Ukrayna üzərində cəmləşib. Çünki bu ölkənin hər an Rusiya ilə qanlı qarşıdurmaya getməsi artıq an məsələsi hesab edilir.
Məsələ Ukrayna ordusunun Donbas separatçılarına qarşı “Bayraktar” PUA-nı tətbiq etməsindən sonra daha da qəlizləşib. Qeyd edək ki, Ukrayna ordusu ilk dəfə 26 oktyabrda “Bayraktar” PUA-sından istifadə edərək, atəş açan haubitsanı məhv edib. Buna Kremldə də qəzəbli reaksiya verilib. Rusiyanın BMT-dəki daimi nümayəndəsi Vasili Nebenzya qeyd edib ki, Ukraynanın Donbasda “Bayraktar” PUA-sından istifadəsi olduqca təhlükəlidir. Kiyev bu addımının nəticəsini, ola bilsin ki, təsəvvür etmir: “Mən “Bayraktar” PUA-sının müqavimət güclərinin mövqelərinə hücumunu izlədim. Düşünürəm ki, bu, ukraynalıların olduqca təhlükəli bir oyunudur”. O qeyd edib ki, Ukrayna ordusunun komandanı Valeri Zalujnının Ukraynanın öz arsenalındakı silahlardan istifadə haqqının olması və bununla bağlı kimsədən icazə almayacağı barədə açıqlaması atəşkəs razılaşmasına ziddir: “Ancaq PUA ilə oyun Ukrayna tərəfinin ağlına belə gəlməyən nəticələrə səbəb ola bilər. Bu çox təhlükəli oyundur. Onlar bunu anlamalıdırlar, ancaq anlayacaqlarına əmin deyiləm”. Bundan sonra Rusiya Ukrayna sərhədlərinə doğru ordu cəmləşdirməyə başlayıb. Bəzi Rusiya nəşrləri də Ukrayna sərhədlərinə zirehli texnika eşelonlarını, “İsgəndər-M” operativ-taktiki raket komplekslərini cəmləşdirdiyi barədə məlumatlar, görüntülər yayıb. “The Washington Post” qəzeti yazır ki, Kremlin addımları Qərbdə ciddi narahatlığa səbəb olub. Məsələ ilə bağlı Pentaqonun rəsmi nümayəndəsi, polkovnik Anton Semelrot bildirib: “Bizə Rusiyanın Ukrayna sərhədləri yaxınlığında qeyri-adi fəallığı barədə məlumatlar daxil olub, amma biz Rusiyanın niyyətinin nədən ibarət olduğunu bilmirik. ABŞ regionda deeskalasiyanı və Ukraynanın şərqindəki münaqişənin diplomatik yolla nizamlanmasını dəstəkləyir. Artıq bəyan etdiyimiz kimi, bizim Ukraynanın suverenliyinə və ərazi bütövlüyünə dəstəyimiz sarsılmazdır”.Ukrayna hökuməti bildirir ki, sentyabrda keçirilmiş “Qərb-2021” hərbi manevrlərindən sonra Rusiya qoşun hissələrinin bir çoxu daimi dislokasiya yerlərinə qaytarılmayıb və hazırda Ukrayna sərhədi boyunca 90 min Rusiya hərbçisi var.
Rusiyanın xarici işlər naziri Sergey Lavrov isə bu vəziyyətdə Kiyev liderlərini Moskvanı Ukraynanın şərqindəki münaqişəyə çəkmək cəhdində ittiham edib: "Biz Rusiyanı hər hansı bir döyüşə cəlb etmək məqsədilə törədilən təxribatların, silahlıları reaksiya verməyə məcbur etmək cəhdlərini müşahidə edirik”. Bundan əvvəl Rusiya bildirmişdi ki, Donbasdakı separatçıların üzərinə hər hansı hərbi hücum Ukrayna dövlətinin varlığını sual altında qoya bilər. Bununla belə, Moskva Donbasdakı separatçılara dəstək verdiyini cidd-cəhdlə danır və Ukraynaya müdaxilə niyyətində olmadığını bildirir. Bununla belə, qondarma “Donetsk xalq respublikası”nın başçısı Denis Puşilin Rusiyadan onlara köməyə minlərlə “könüllünün” gələcəyini bildirib. Puşilinin sözlərinə görə, onda məlumat var ki, Rusiyadan böyük sayda “könüllü” Donbasa getməyə və “xalq respublikası” uğrunda vuruşmağa hazırdır: “Vəziyyət kəskinləşən kimi könüllülərdən kütləvi müraciətlər daxil olur”.
Bundan başqa, son peyk görüntüləri Rusiyanın Ukrayna sərhədlərinə yenidən hərbi texnika və qoşun hissələri cəmləşdirdiyini təsdiq edir. “Maxar Technologies” şirkətinin kommersiya peykinin çəkdiyi sensasion görüntüləri ABŞ-ın “polıtıco” nəşri yayıb. Bildirilir ki, Rusiya 2021-ci ilin yaz aylarında da Ukrayna sərhədlərinə iri qoşun qruplaşmaları cəmləşdirmişdi. Yeni təsvirlərdə isə Ukrayna sərhədlərinin bir neçə kilometrliyində, o cümlədən Belarus sərhədləri yaxınlığında yerləşən Yelni şəhəri ətrafında zirehli tank hissələrinin, özüyeriən artilleriya qurğularının və çoxsaylı digər hərbi texnikanın, o cümlədən avtomobil texnikasının cəmləşdirildiyi görünür. Bildirilir ki, həmin bölmələr, o cümlədən Rusiya ordusunun elit 1-ci qvardiya tank diviziyası sentyabrın sonlarından etibarən Ukrayna sərhədlərinə doğru hərəkət edib. “Jane’s İntelligence” nəşrinin apardığı analiz isə göstərib ki, Rusiya ordusunun 4-cü tank diviziyası da Ukraynanın şimal sərhədlərinin yaxınlığında yerləşən Bryansk və Kursk şəhərləri ətrafında cəmləşdirilib. Diviziya T-80U tankları və özüyeriyən artilleriya kompleksləri ilə təchiz edilib. Bildirilir ki, 1-ci qvardiya tank diviziyasının bəzi hissələri də həmin rayondadır. Nəşrin analizinə əsasən, həmin tank ordusu bütün səviyyələrdə döyüş əməliyyatlarının, o cümlədən irimiqyaslı hücumun aparılması üçün nəzərdə tutulub. Bu tank birləşməsi ən yeni texnika ilə təchiz edilib. Rusiya bir tərəfdən Ukrayna ilə sərhədə güclü texnikasını cəmləşdirməklə əzələ nümayişini həyata keçirir, digər tərəfdən, həyati vacib olan Ukrayna istiqamətində məğlub olmaq istəmir.
Rusiyanın Ukrayna sərhədlərinə qoşun cəmləşdirməsinə paralel olaraq Donbasda da gərginlik artıb, separatçıların Ukrayna ordusunun mövqelərini artilleriya atəşinə tutması intensivləşib. Ukrayna Silahlı Qüvvələri də bu təxribatlara cavab verir və təmas xəttinə qoşun hissələri cəmləşdirir.
Tahir TAĞIYEV
