Xalq yazıçısı Çingiz Abdullayevin bir müddət əvvəl Vətən müharibəsi haqda özünün Feysbuk hesabında etdiyi paylaşım ciddi qalmaqala səbəb olub. Onun həmin məzmunda olan fikirlərini təqdim edirik:
“Mən "Birinci" və "İkinci Qarabağ savaşı" terminlərinin əleyhinəyəm. "Birinci Qarabağ müharibəsi" olmayıb. Müharibə iki dövlətin orduları arasında silahlı konfliktə deyilir. Bu isə sadəcə yox idi! Sovet süquta uğradığı vaxtda bizim sadəcə xalqın özünün müdafiə məqsədli yaratdığı könüllülər dəstəsi var idi. Qonşularımızın isə yetərincə sayda hazırlıqlı zabitləri olsa da, keçmiş sovet komandirlərinə pul ödəyərək onların texnika, hətta canlı qüvvəsindən istifadə edirdilər”.
Tanınmış Qarabağ qazisi, jurnalist Rey Kərimoğlu Xalq yazıçısı Çingiz Abdullayevi bu fikirlərinə görə tənqid atəşinə tutub və yazıçıdan üzr istəməsini tələb edib:
“Ayıbdır ey! Çingiz Abdullayev deyib ki, “Birinci Qarabağ müharibəsi olmayıb, yalandır!” Bu adama deyin ki, müharibə olub! Ayıbdır! Birinci Qarabağ müharibəsində 18.500 nəfər şəhid olub, 3700 nəfər itkin düşüb, 39.500 nəfər yaralanıb. Üzrxahlığını gözləyirik!”
Birinci Qarabağ müharibəsinin aktiv iştirakçısı, Milli Qəhrəman Zabit Quliyev “Bakı-Xəbər”ə açıqlamasında bildirdi ki, doğrusu, Xalq yazıçısından belə mövqe gözləmirdi: “Çingiz Abdullayev nəzərə almalıdır ki, o, sıradan adam deyil. Onun əsərləri dünyanın bir çox dillərinə tərcümə edilib. Bu çapda adamın dediyi istənilən fikir trendə çevrilə, bütün dünya miqyasında müzakirəyə səbəb ola bilər. Mən güman edirəm ki, Çingiz Abdullayev bir qədər rusdilli olduğu üçün fikirlərini doğru çatdıra bilməyib. İnanmıram ki, o, müharibınin nədən ibarət olduğunu bilməsin. Yox, bunu bilə-bilə deyirsə, çox böyük yanlışlığa yol vermiş olur. Biz bu müharibələri bir-birindən ayırmamalıyıq. Müharibəni bitmiş saymamışıq, onun nəticələri ilə barışmamışıq. 44 günlük müharibə də həmin müharibənin davamı olub. Mən hesab edirəm ki, əsl dəhşətli müharibəni biz həmin zaman gördük. Çünki güclü silahlarımız, ordumuz yox idi. Həmin müharibədə biz indikindən qat-qat çox şəhid verdik. Hər iki müharibə bizim tariximizin parlaq səhifəsidir. Onların veteranlarını, qəhrəmanlarını, qazilərini bir-birindən ayırmaq lazım deyil. Müharibə olmayıbsa, biz harada yaralanmışıq, harada döyüşüb Milli Qəhrəman adına layiq görülmüşük? Hesab edirəm ki, Xalq yazıçısı təkrar açıqlama verib, fikirlərinə aydınlıq gətirməlidir. Çünki bu yalnışlıqdan bizim əleyhimizə istifadə edə bilərlər. Ortada Əkrəm Əylisli təcrübəsi var”.
Qeyd edək ki, Çingiz Abdullayev bir gün sonra verdiyi açıqlamada fikirlərinin təhrif olunduğunu bildirib:
“Qoy tənqid eləsinlər. Mən elə deməmişəm. Demişəm ki, ermənilər sovet qoşunlarını pulla alaraq bizim torpaqlarımızı işğal ediblər. Mənim qardaşım da həlak olub. Bir daha deyirəm, 90-cı illərdə biz torpaqlarımızı ona görə itirirdik ki, bu, normal müharibə deyildi. Bizim ordumuz qurulmamışdı. Qonşularımız qarmaqarışıqlıqdan və daxili çəkişmələrdən istifadə edirdilər. Buna görə də mən birinci, ikinci deyilən bölgüyə qarşıyam. O birinci dediyimiz xalqımızın başına gətirilən faciə idi. Keçənilki isə torpaqlarımızın işğaldan azad edilməsi uğrunda apardığımız müharibə idi. İndi bu dediyim fikirlərdən istifadə edəcəklər?”.
Məhəmmədəli QƏRİBLİ
