Prezident İlham Əliyev və Birinci xanım Mehriban Əliyeva noyabrın 1-də Şamaxı və İsmayıllı rayolarında səfərdə olub, bir sıra yeni obyektlərin açılışında iştirak ediblər.
İsmayıllı rayon İcra Hakimiyyətinin başçısı Nahid Bağırov rayonda görülən abadlıq-quruculuq işləri barədə dövlət başçısına və birinci xanıma məlumat verib.
Bildirilib ki, bu il İsmayıllı şəhərinin Babək küçəsində ideya və üslub baxımından fərqli abadlıq işlərinə start verilib. Şəhərin Heydər Əliyev Parkına aparan, uzunluğu 400 metrə yaxın olan küçəsindəki abadlıq işləri rayonun gənc rəssamlarının birgə ideyaları əsasında həyata keçirilib. Küçədə yerləşən həyətyanı sahələrin hasarları müəyyən hündürlüyə çatdırılıb, divar üzlükləri təmir olunub, hasar damlarına keramik rəngli dəmir örtük vurulub. Ümumi görünüşə rəng qatmaq üçün darvazalar əlvan rənglərlə boyanıb, divarların fasadında dekorativ pəncərələr, skamyalar və gül dibçəkləri yerləşdirilib. Yolboyu divarlar küçə rəssamlıq sənət nümunələri ilə bəzədilib. Xüsusi memarlıq görünüşünü özündə ehtiva edən abadlıq işləri həm rayon sakinlərinin, həm də İsmayıllıya gələn qonaqların marağına səbəb olub.
Qeyd edək ki, Azərbaycanda biosmart avtobus dayanacağı ilk dəfə İsmayıllıda ötən il quraşdırılıb. Onun əsas üstünlüyü pulsuz vayfayı, təhlükəsizlik kamerası, dezinfeksiya duşu, mini barı, enerji doldurma portu, USB girişinin olmasıdır. Dayanacaq Günəş enerjisi ilə işləyir və 8 oturacağı var. Bu il daha bir dayanacaq quraşdırılıb. Onu digərindən fərqləndirən cəhət sensor qapılarının və kondisionerinin olmasıdır.
Şəhərdə aparılan abadlıq-quruculuq işləri Heydər Əliyev Parkını da əhatə edib. Parkda attraksionlar, yeni trenajorlar quraşdırılıb. Bununla yanaşı, yenidənqurma işləri çərçivəsində parkda yeni bəzək gül kolları və ağaclar əkilib, oturacaqlar yenilənib, işıq sistemi dəyişdirilib. Bu il şəhərin bir neçə küçəsinin asfaltlanması başa çatdırılıb. Maraqlı məqam budur ki, ölkə başçısı son vaxtlar işğaldan azad edilən rayonlara daha mütəmadi səfərlər etməsinə baxmayaraq, başqa regionlara da səfər edir. Bunun da nəticəsində görürük ki, abadlıq, quruculuq işləri yalnız bir istiqaməti deyil, bütün sahələri əhatə edir. Ancaq hakimiyyətə opponentlik edən siyasilər irad tuturdular ki, Prezident son vaxtlar bütün diqqəti işğaldan azad edilən ərazilərə yönəldib, başqa regionlardakı abadlıq işləri qalıb. Bu məntiqi sağlam saymaq olarmı?
Beynəlxalq idarəetmə üzrə ekspert, iqtisadçı Asif İbrahimov “Bakı-Xəbər”ə açıqlamasında bildirdi ki, hakimiyyətə bu cür opponentlik edənlərin məntiqini anlamır: “Bunun nə iqtisadi, nə də siyasi əsaslandırması var. Bildiyiniz kimi, dövlət büdcəsində işğaldan azad edilən ərazilərin bərpası üçün böyük vəsait ayrılıb. Bizim beynəlxalq partnyorlarımız həmin ərazilərdə qısa müddətdə görülən bu sayaq işlərdən təəccüblənir. Doğrudan da, qıza müddət ərzində Füzuli-Şuşa yolunun çəkilməsi, yarımstansiyaların istifadəyə verilməsi, hətta beynəlxalq aeroportun istifadəyə verilməsi böyük əzmkarlıqdan, qüdrətdən xəbər verir.
Hərbi əməliyyatların bitməsindən sonra Prezident İlham Əliyevin mütəmadi olaraq işğaldan azad edilmiş rayonlara səfər etməsi dövlət başçısının bu məsələlərə nə dərəcədə həssas yanaşdığının sübutudur.
Dövlət başçısının işğaldan azad edilmiş ərazilərin yenidən qurulması və inkişafına nə dərəcə mühüm əhəmiyyət verdiyinə 30 il ərzində ermənilər tərəfindən darmadağın və viran edilən torpaqlarda artıq abadlıq və quruculuq işlərindəki tempi misal göstərmək olar.
İşğaldan azad edilmiş bütün şəhər və rayonların baş planlarının hazırlanması ilə bağlı Prezidentin tapşırığının icrası hazırda yüksək surətlə davam etməkdədir. Eyni zamanda, işğaldan azad edilmiş rayonlarda “yaşıl enerji” zonasının yaradılması məqsədilə ilkin olaraq pilot layihələr qismində bəzi yerlərdə “ağıllı şəhər” və “ağıllı kənd” konsepsiyalarının da tətbiqi baş tutur. Azərbaycan Prezidenti çıxışlarında ermənilərin üçtərəfli Bəyanatdan sonra da torpaqlarımızda dağıntılar törətdiklərini qeyd edib.
Prezident bu bölgələrin elektrik təchizatının dövlət üçün prioritet olduğunu vurğulayaraq, tez bir zamanda Şuşa şəhərini elektrik enerjisi ilə təminatını həyata keçirdi. Horadiz-Zəngilan-Ağbənd dəmir yolunun təməlinin qoyulması da xüsusi əhəmiyyətli məsələ idi. Bununla bağlı çıxış edən dövlət başçısı qeyd edib ki, bu dəmir yolunun çox böyük strateji əhəmiyyəti var. Prezidentin də qeyd etdiyi kimi, Horadiz-Ağbənd dəmir yolunun istifadəsi Azərbaycanın əsas hissəsi ilə Naxçıvan arasında dəmir yolunu bir-birinə bağlayacaq. Bu tarixi əhəmiyyətli kommunikasiya xəttinin açılışı bir zamanlar ermənilərin havadarlarının və işğalçıların xalqımıza qarşı məkrli planlarını məhv etmiş olacaq. Həmçinin bu dəmir yolu infrastrukturu Türkiyəyə qədər uzanacaq və beləliklə, Azərbaycanı Türkiyə ilə birləşdirən ikinci dəmir yolu şəbəkəsi yaradılacaq. Dövlət başçısı, həmçinin, Azərbaycanın bölgədə ölkələr arasında kommunikasiya xətlərinin üzərində yerləşdiyini və bu istiqamətdə böyük işlərin görüldüyünü söyləyir.
Dövlət başçısı bu sözlərlə Azərbaycan dövlətinin qısa müddətdə hansı miqyasda iş ortaya qoyduğunu açıqlayıb, eyni zamanda bölgənin siyasi, iqtisadi və ticarət mənzərəsini dəyişəcək, region ölkələrini bir-birinə bağlayacaq layihənin əhəmiyyətini bir daha vurğulayıb.
Görülən işlərin, həyata keçirilən layihələrin siyasi və iqtisadi əhəmiyyəti öz yerində, ancaq buna etiraz edənlər də tapılır.
Azərbaycan rəhbərinin siyasi iradəsi, verdiyi vədlərlə əməllərinin vəhdəti belə deməyə əsas verir ki, çox keçməyəcək, işğaldan azad edilmiş torpaqlara həyat qayıdacaq, bu ərazilər yenidən çiçəklənəcək, bura təkcə ölkənin deyil, regionun ən inkişaf etmiş yaşayış məskənlərindən birinə çevriləcək.
Bununla yanaşı, biz digər bölgələrdə də quruculuq işlərinin öz tempi ilə davam etdiyini, infrastruktur layihələrinin icrasını görürük”.
Məhəmmədəli QƏRİBLİ
