Şanlı tariximizin Zəfər günü... - Yaşar ŞƏKİYEV yazır

img

2020-ci il sentyabrın 27-də Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq Azərbaycan Ordusu sonradan “Dəmir yumruq” adlandırılan əks-hücum əməliyyatına başladı. 44 gün davam edən Vətən müharibəsi ərazi bütövlüyümüzün bərpası ilə nəticələndi. Müzəffər Ali Baş Komandan İlham Əliyevin rəhbərliyi ilə qazanılmış möhtəşəm Zəfər tariximizə qızıl hərflərlə yazıldı.

2020-ci il sentyabr ayının 27-də Azərbaycan Prezidenti, Silahlı Qüvvələrin Ali Baş Komandanı İlham Əliyev televiziya ilə xalqa müraciət edərək Ermənistan silahlı qüvvələrinin bir neçə istiqamətdən yaşayış məntəqələrimizi, hərbi mövqelərimizi atəşə tutduğunu, nəticədə mülki əhali və hərbçilərimiz arasında itkilərin, yaralananların olduğunu bəyan etdi. Dövlətimizin başçısı müraciətində Azərbaycan Ordusunun düşmənin hərbi mövqelərinə atəşlər, zərbələr endirdiyini və Ermənistan silahlı qüvvələrinin xeyli sayda hərbi texnikasının və canlı qüvvəsinin məhv edildiyini bildirdi. “Ermənistan işğalçı dövlətdir, bu işğala son qoyulmalıdır və son qoyulacaqdır. Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!”.

Müharibənin ilk saatlarından döyüş meydanında yalnız tanklarla, toplarla deyil, peşəkar zabit korpusu və ən müasir hərbi texnika ilə silahlandırılan Azərbaycan Ordusu müasir döyüş strategiyasında pilotsuz uçuş aparatlarından – PUA-lardan yüksək peşəkarlıqla istifadə edərək düşmənin ön müdafiə xəttini yardı.

“Qarabağ Azərbaycandır və nida”, - söyləyən Prezidentimiz hər zaman olduğu kimi bu dəfə də vədinə əməl etdi. Rəşadətli əsgər və zabitlərimiz çətin dağlıq, meşəlik şəraitində döyüş tapşırığını yerinə yetirərək böyük qəhrəmanlıqlar göstərdilər. 44 gün ərzində torpaqlarımızı işğaldan azad etdilər. Azərbaycanın haqq-ədaləti uğrunda vuruşaraq Ermənistanın uzun illər ərzində qurduğu istehkamları məhv edərək, əsgər və zabitlərimizin canı və qanı bahasına Dağlıq Qarabağ da daxil olmaqla torpaqlarımızı düşmən tapdağından azad etdilər.

Dövlət başçısınin dediyi kimi, “Bu, yeni nəsil müharibə üsuludur, hansı ki, planlaşdırma, texniki təchizat, texnologiyaların tətbiqi, əməliyyatların düzgün planlaşdırılması və həyata keçirilməsi, hərbçilərimizin döyüş qabiliyyəti və mənəvi ruh birləşir, vəhdət təşkil edir. Ancaq mən bunu artıq bir neçə dəfə demişəm, bu qələbəni qazanan bizim texniki vasitələr yox, əsgər və zabitlərimizdir. Onlar torpağımızı düşməndən qarış-qarış azad edə-edə bu Qələbəni, bu Zəfəri xalqımıza nəsib etdilər. Ona görə bu qələbənin birinci qəhrəmanı Azərbaycan əsgəridir, Azərbaycan zabitidir və hər kəs bunu bilməlidir”.

Müharibə zamanı Ermənistan ordusunda on mindən çox əsgər fərarilik etdi. 44 günlük Vətən müharibəsində Azərbaycan Ordusunda isə bir nəfər də olsun fərarilik etmədi. Döyüş meydanında məğlubiyyətə uğrayan mənfur düşmən mülki əhaliyə qarşı hərbi cinayətlər törətdi. Azərbaycanın şəhərləri ballistik raketlərlə, fosforlu bombalarla, kasetli bombalarla atəşə tutuldu. Bu namərd atəş nəticəsində aralarında uşaqlar və qadınlar olmaqla 100-ə yaxın mülki vətəndaş həlak oldu. 400-dən çox mülki vətəndaş yaralandı, 5000-dən çox ev dağıdıldı.

Müzəffər Azərbaycan Ordusu şəhidlərimizin, Xocalı qurbanlarının, Gəncə, Bərdə, digər şəhər və rayonlarımızda müharibə vaxtı həlak olan günahsız insanların qisasını döyüş meydanında aldı.

Ali Baş Komandan müharibə dövründə dünyanın tanınmış 30-dan artıq informasiya agentliyinə diplomatik məharət, faktlar əsasında sərrast cavablarla, Azərbaycan, türk, rus və ingilis dillərində verdiyi müsahibələrlə münaqişə ilə bağlı əsil həqiqətləri beynəlxalq ictimaiyyətə çatdırdı, Azərbaycanın informasiya cəbhəsində mövqeyini daha da gücləndirdi.  “Dağlıq Qarabağ Azərbaycan torpağı, beynəlxalq səviyyədə tanınan ərazimiz olmaqla yanaşı, ədalət məsələsidir, Azərbaycanın milli qürur məsələsidir”, - deyən Prezidentimizə xalqın inamı, sevgisi daha da artdı.

Azərbaycan-Türkiyə birliyi və əməkdaşlığı da Vətən müharibəsindəki Zəfərin ən mühüm amillərindəndir. Ölkəmizə sanksiyalar tətbiq etməklə təzyiq göstərməyə çalışan bəzi dövlətlər tarixi ata-baba torpaqlarının düşmən tapdağından azad edildiyini, Azərbaycan ordusunun düşmən üzərində üstünlüyünü qəbul etməyə məcbur oldu.

Azərbaycan xalqı 30 ilə yaxın müddət ərzində həsrətlə öz ata-baba yurduna dönəcəkləri günü gözləyirdi. Müharibə dövründə xalq öz dəmir yumruğunu, birliyini və gücünü nümayiş etdirdi. Bütün bunlar Ermənistanın öz məğlubiyyətini etiraf etməsi və kapitulyasiyası ilə nəticələnmişdir. Azərbaycanın dövlət sərhədləri bərpa edildi. Azərbaycan Ordusunun gücü qarşısında darmadağın olan düşmənin döyüş meydanına göndərdiyi hərbi texnikasının son dayanacağı Hərbi Qənimətlər Parkı oldu.

Azərbaycanın hərbi sahədə qazandığı qələbələr, xüsusilə Qarabağın tacı olan Şuşanın azad edilməsi müharibənin taleyində həlledici rol oynayaraq, dünya hərb tarixinə düşəcək unikal hərbi əməliyyatlardan olmuşdur. Hər zaman "Biz Qarabağımıza qayıdacağıq, Qarabağ tarixi Azərbaycan torpağıdır,"- deyən İlham Əliyev Vətən müharibəsində qələbəmizin təmin edildiyi vaxtda Fəxri xiyabana gedərək Ümummilli Liderin məzarını dərin ehtiramla ziyarət edərək, “Şuşasız Qarabağ, Qarabağsız Azərbaycan yoxdur,” - deyən görkəmli dövlət xadimi Heydər Əliyevin arzusunu reallaşdırdı. “Mən bu gün Ulu Öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır! Gözün aydın olsun Azərbaycan! Gözünüz aydın olsun Dünya azərbaycanlıları!”.

Prezident, Ali Baş Komandan İlham Əliyev xalqa müraciətində bildirmişdi: “Şuşanın işğaldan azad edilməsi bizim gücümüzü göstərdi. Ordumuzun peşəkarlığını, hərbçilərimizin cəsarətini, qəhrəmanlığını göstərdi. Şuşanın götürülməsi çox böyük peşəkarlıq, cəsarət tələb edən əməliyyat idi. Əminəm ki, bu əməliyyat dünya hərb tarixində xüsusi yer tutacaq. Çünki bu əməliyyatı bizim qəhrəman hərbçilərimiz dağlardan, meşələrdən, cığırlardan keçərək yalnız yüngül silahlarla silahlanmış şəkildə azad ediblər. Şuşanın işğaldan azad edilməsi bizim şanlı qələbəmizdir".

Azərbaycan Respublikasının Prezidenti İlham Əliyevin 2020-ci il 3 dekabr tarixli Sərəncamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-nin Azərbaycan Respublikasında Zəfər Günü kimi təntənəli şəkildə qeyd edilməsi qərara alınmışdır.

Vətən müharibəsində igid övladlarımızın qanı-canı bahasına qazanılan müharibədə şəhidlərimizin, qazilərimizin qəhrəmanlığı dövlətimiz və xalqımız tərəfindən yüksək qiymətləndirilir. Döyüşlərdə iştirak etmiş on minlərlə hərbçi Prezident İlham Əliyevin imzaladığı sərəncamlarla orden, medal və fəxri adlarla təltif olunub. Qəhrəmancasına şəhadətə ucalan igidlərimiz indi təkcə ailəsinin deyil, bütün xalqımızın qürur mənbəyidir.

Müzəffər Azərbaycan Ordusu bizə Qələbənin Zəfər paradının sevinclərini yaşatdı. 10 dekabr 2020-ci il tarixdə Azadlıq meydanında Vətən müharibəsində Qələbəyə həsr olunmuş Zəfər paradı keçirildi. Əllərində Azərbaycanın üçrəngli bayrağı və Ali Baş Komandanın portretləri olan paytaxt sakinləri "Qələbə bizimdir!” "Qarabağ!”, "Qarabağ Azərbaycandır!”, "Yaşasın Ali Baş komandan!”, "Azərbaycan Ordusuna eşq olsun!” kimi şüarlarla möhtəşəm qələbənin sevinc və qürur hisslərini onlara yaşatdığına görə Müzəffər Azərbaycan Ordusuna, Ali Baş Komandan İlham Əliyevə minnətdarlıq edirdilər.

Azadlıq meydanında vüqarla addımlayan Azərbaycan ordusunun rəşadətli əsgərləri xalqımıza  unudulmaz anlar yaşatdı. Azərbaycan Respublikasının Prezidenti İlham Əliyevin qardaş Türkiyə Cümhuriyyətinin Prezidenti Rəcəb Tayyib Ərdoğanın iştirakı ilə qalib ölkə kimi birlikdə keçirdiyi Zəfər paradı qəhrəmanlıq salnaməmizin nadir tarixi hadisəsidir.

Vətən müharibəsində qazanılmış Zəfərdən dərhal sonra azad olunmuş ərazilərin bərpasına başlanıldı. Prezident İlham Əliyevin və birinci xanım Mehriban Əliyevanın həmin ərazilərə çoxsaylı səfərləri zamanı yeni infrastruktur obyektlərinin təməli qoyulur, yeni layihələrə start verilir.

Azərbaycan xalqının 30 ilə yaxın bir müddətdə düşmənin dağıdaraq xarabalığa çevirdiyi ata-baba yurdlarına yollar salınır, tunellər, yeni yaşayış binaları, məktəblər, tibb müəssisələri və digər obyektlər tikilir.

Oktyabrın 26-da Füzuli rayonu ərazisində inşa olunan Füzuli Beynəlxalq Hava Limanının açılış mərasimi olmuşdur. Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan açılış mərasimində iştirak edərək, hava limanının rəmzi açılışını bildirən lenti kəsdilər. Füzuli Beynəlxalq Hava Limanının rəmzi açarları prezidentlərə təqdim edildi.

Qarabağın hava qapısı adlandırılan, qısa müddətdə ən müasir tələblərə cavab verən Füzuli Beynəlxalq Hava Limanının inşası Azərbaycan dövlətinin qüdrətinin bariz nümunəsidir. Bu hava limanının istifadəyə verilməsi işğaldan azad olunmuş torpaqlarımızda aparılan quruculuq işlərinin daha da sürətlənməsinə töhfə verəcək, nəinki Füzulinin, ümumilikdə bölgənin sosial-iqtisadi inkişafında müstəsna rol oynayacaqdır.

Yaşar ŞƏKİYEV
Ədliyyə Nazirliyi Penitensiar xidmətinin
Tərbiyə işinin təşkili idarəsinin rəis müavini
ədliyyə polkovnik-leytenantı

Peşə etikası

Son xəbərlər