Erməni saxtakarlığı, bütün sahələrdə olduğu kimi, beynəlxalq kino festivallarında da özünü göstərir. Bütün imkanlarından istifadə edib “Arsax” adını daha çox yerlərdə hallandırmağa can atan ermənilər bununla həm dünyanı, həm də özlərini aldadırlar. Amma öz yalanına özü inanan Ermənistan buna görə də heç cür yalanlardan yaxasını qurtara bilmir, onu açıq şəkildə dövlət siyasətinə çevirib.
Erməni mətbuatının yazdığına görə, Ermənistanın 2019-cu ildə “Artsax" müharibəsi” barədə çəkdiyi “Cənnətə aparan qapı” filmi Kanadada keçirilən Ontario beynəlxalq kino festivalında 4 nominasiya uzrə mükafat alıb.
Dramatik janrda çəkilmiş, “Artsax müharibəsinə” həsr olunan filmdə hadisələrin 2016-cı ildə baş verdiyi göstərilir. Filmin rejissoru Jivan Avetisyandır. Çəkilişlər Ermənistan, “Artsax” və Litvada aparılıb.
Maraqlıdır ki, Kanadada keçirilən kinofestival tərəfindən belə qondarma mövzuda çəkilən filmə mükafat verilir. Halbuki, tarixdə “Arsax müharibə”si deyilən bir müharibə baş verməyib, 2016-cı ildə şanlı Aprel döyüşləri bas verib. Aprel müharibəsində də əsas məqsəd erməni terroruna qarşı mübarizə və Azərbaycanın öz ərazilərini azad etməsi olub.
Burada diqqət çəkən əsas məqamlardan biri odur ki, beynəlxalq festivallarda Azərbaycana Qarabağ mövzusunda film təqdim etməyə imkan vermirlər. Deyirlər ki, biz siyasi mövzuda filmlər qəbul etmirik, amma ermənilərin qondarma movzuda cəkdiyi filmə mükafat verilir, özü də 4 nominasiya üzrə.
Ekspertlər deyir ki, bu məsələnin kökündə dayanan məqamlardan biri əksər festivallların, o cümlədən də Ontario beynəlxalq kino festivalının təşkilatçılarının erməni lobbisinin əlində oyuncaq olması dayanır. Bir sıra festivallar erməni lobbisinin pulunun girovuna çevirilib.
Şamil Əliyev: “Hansısa bir qondarma mövzuda çəkilən filmin ikinci dərəcəli kinofestivalda mükafat alması…”
Tanınmış kinorejissor, kino mütəxəssisi Şamil Əliyev “Bakı-Xəbər”ə şərhində bildirdi ki, bu məsələ geniş müzakirə, fikir mübadiləsi tələb edir.
“Əvvəla, aydın məsələdir ki, ermənilər mədəniyyətlərini də, məişətlərini də, bir sözlə hər şeylərini öz siyasətlərinə tabe etməyə çalışırlar. Yəni ermənilər üçün özgür mədəniyyət deyilən bir anlayış yoxdur ki, bir mədəniyyət nümunəsi olaraq ortaya qoyulsun və ondan müəyyən nəticə çıxarılsın. Hər bir şey qondarma “Böyük Ermənistan” ideyalarına qurban verilir. Burada da obyektiv heç nə ola bilməz. Hesab edirəm ki, ermənilərin bu davranışı xəstə, anormal bir düşüncənin məhsuludur, bu da onları yaxşı bir yerə aparıb çıxarmayacaq. 44 günlük Vətən müharibəsində biz bunun nəticəsini gördük. Bunun cavabını, başda Ali Baş Komandan İlham Əliyev olmaqla Azərbaycan xalqı, Azərbaycan ordusu çox yüksək səviyyədə verdi. Ermənilər indi hara istəyirlər, necə istəyirlər şikayət etsinlər, xeyri yoxdur. Bu, məsələnin bir tərəfi. İndi gələk Kanada festivalına. Bilirsiz, festivalların hamısı eyni deyil, onlar arasında fərq var. Tutaq ki, ermənilər lobbiçilikdən istifadə edib bütün dünyadakı məşhur adamlarını bu xəstə ideyaya xidmət etməyə çağırırlar. Bunların da əlində bir uydurma var, guya 1915-ci ildə “genosid” olub, Osmanlı “erməniləri genosid edib”. Bunun da cavabını zaman-zaman obyektiv tarixçilər verir. Hətta Türkiyə Prezidenti Ərdoğan jurnalistlə söhbətində bir fikir işlətdi ki, gəlin tarixi sənədləri ortaya qoyaq kim kimi genosid edib, bu məsələ ilə məşğul olmaq tarixçilərin işidir. Ermənistan heç vaxt öz arxivlərini açmır, aydın məsələdir ki, burada tarixi həqiqət üzə çıxacaq və bunun kimə xidmət etdiyi məlum olacaq. Amma istər Fransada, istər İngiltərədə, istər Amerikada, istərsə də Rusiyanın özündə bir sıra alimlər, hətta siyasi xadimlər də ermənilərin çox səhv yolda olduğunu zaman-zaman göstərib, bu barədə kitablar, obyektiv araşdırmalar da var”.
Ş.Əliyevin qeyd etdiyinə görə, Atom Eqoyan adlı erməni əsilli bir ABŞ, Kanada rejissoru var, Hollivud platformasında çalışan bir şəxsdir. A.Eqoyan bir necə il əvvəl saxta, qondarma “genosid”ə həsr olunmuş bir film çəkmişdi: “Eqoyanın bu filmi Kann festivalında əsas proqramdan müsabiqəyə salınmışdı. Bilirsiz ki, Kann festivalı da dünyanın ən nüfuzlu festivallarından biridir. Türkiyə Cumhuriyyəti rəsmi şəkildə Eqoyanın filminə qarşı çıxdı və Türkiyə XİN-in xəttilə etiraz notası göndərdi. Fransada erməni lobbisinin təsirinin güclü olmasına baxmayaraq, Türkiyənin notasından sonra Kann festivalının təşkilat komitəsi elə şərait yaratdı ki, Eqoyan özü filmini müsabiqədən çıxardı və belə bir söz dedi: “Sənət əsərinin siyasi məqamlara tabe olaraq öz obyektivliyini itirməsi təhlükəsi olduğu üçün mən özüm filmi müsabiqədən geri çəkirəm”. Belə məsələlərdə tarixçilər öz sözünü deməlidir.
Çox tanınmayan bir erməni rejissoru o vaxtkı boşluqdan sui-istifadə edərək belə bir film çəkib və bu film Kanadada bir festivalda iştirak edib. Bu elə də nüfuzlu festival deyil. Hansısa bir qondarma mövzuda çəkilən filmin ikinci dərəcəli kinofestivalda mükafat alması bizi qıcıqlandırmamalıdır. Biz öz işimizi görməliyik, Qarabağa aid filmlər də çəkəcəyik, çəkilir də, indi istehsalatda olan, hətta çəkilişi başa çatan filmlər də var. Bu filmlər də, yəqin ki, beynəlxalq festivallara çıxarılacaq…
Sözsüz ki, burada bizim Mədəniyyət Nazirliyinin keçmiş rəhbərliyinin fəaliyyətsizliyindən qalmış bəzi məqamlar var ki, indi də onun altını çəkirik. Anar Kərimov yeni təyin olunmuş nazirdi, islahatlar aparır. İslahatlar hələ başa çatmayıb. Beynəlxalq festivallar barədə fakir bildirmək üçün Mədəniyyət Nazirliyində islahatlar başa çatmalıdır”.
Ş.Əliyev qeyd etdi ki, Kino Agentliyi yaranacaq, Agentlik yarandıqdan sonra AVROMAŞ-ın üzvü olmalıyıq. “AVROMAŞ-ın üzvü olandan sonra bizim sözümüz o festivallara müəyyən mənada tez çata bilər. Biz hələ ki, bu qurumun üzvü deyilik, amma yəqin ki, yaxınlarda olacağıq. Bizim qarşımızda duran məsələlərdən biri Qarabağı dirçəltmək, bərpa etmək, erməni vandalizmini dünyaya təqdim etməkdir…”
Qiymət Məhərrəmli: “…Ontario beynəlxalq kino festivalı da erməni lobbisinin girovuna çevrilib”
Filologiya üzrə fəsləfə doktoru Qiymət Məhərrəmlinin fikrincə isə, bu filmin Kanadaya gedib çıxmasında erməni lobbisinin xüsusi marağı olub. “Erməni lobbisi bütün beynəlxalq kino festivallarını ələ alıb onları maliyyələşdirir. Elə bir beynəlxalq kinofestival yoxdur ki, orada erməni lobbisinin sözü keçməsin. Qondarma mövzuda çəkilən filmin də Kanada festivalında bir neçə nominasiya üzrə mükafat alması onu göstərir ki, Ontario beynəlxalq kino festivalı da erməni lobbisinin girovuna çevrilib. Belə olmasaydı, qondarma mövzuda çəkilən uydurma bir filmə bu cür münasibət göstərməzdi”-deyə alim bildirdi.
İradə SARIYEVA
