Qarabağdakı separatçıların viza alması çətinləşir. Artıq əvvəlki kimi onlar Ermənistan pasportu hesabına istədikləri xarici dövlətə gedə bilmirlər. Bununla bağlı separatçıların bəzi etirafları diqqəti cəlb edir.
Separatçıların nümayəndəsi David Babayan sözügedən məsələ ilə bağlı bəzi məsələləri qabardıb: “Ermənistanda istəyirlər ki, pasportlarda doğum yeri kimi şəhər yazılsın. Qarabağ separatçıları isə hesab edirlər ki, xarici ölkələrə səfərlərdə bu onlar üçün problem yarada bilər. Məhz pasportlarla bağlı sözügedən yenilik Ermənistanda əməlli-başlı narahatlıq yaradıb. Doğum yeri kimi Ermənistan Respublikası yazılması ən yaxşı variantdır. Ola bilər ki, bəzi vətəndaşlar pasportlarında doğum yeri kimi şəhər və kəndləri qeyd etdikdə viza ala bilməsinlər. Bu məsələlərlə bağlı bizim böyük problemlərimiz var”.
Layihənin rəhbəri Mnatsakan Biçaxcan isə bildirib ki, vətəndaşlara doğum yeri kimi ya yaşadığı ərazini, ya da doğulduğu yeri yazmağa icazə veriləcək: “Məsələn, vətəndaş özü müraciət etsə ki, doğum yeri kimi Rusiya yox Moskva yazın, bu zaman elə də qeyd olunacaq”.
Separatçılar isə bundan da narahatdırlar. Çünki vətəndaş pasportunda doğum yeri kimi Xankəndi şəhərini yazdırsa, o zaman xaricə səfər edə bilməyəcək. D.Babayan bu məsələdə də Azərbaycanı ittiham edib: “Azərbaycan lobbiçilik edir, müxtəlif ölkələrə tapşırır ki, Qarabağdan olan ermənilərə viza verməsinlər. Bu problemlə inkişaf etmiş ölkələrdə belə qarşılaşırıq”.
Məlumat üçün qeyd edək ki, Ermənistan əhalisi ilə Qarabağdakı separatçıların pasportları eynidir. Yəni Qarabağ separatçıları da Ermənistan vətəndaşları kimi xaricə viza almaqla səfər edirlər.
Bütün hallarda, artıq separatçılar əvvəlki kimi Ermənistan pasportu ilə xaricə səfər edə bilmir. Ümumilikdə bütün bunlar nəyin göstəricisidir? Ekspertlər bunu necə dəyərləndirir?
“Bu səbəbdən separatçıların xaricə getmək imkanları məhdudlaşıb”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Azərbaycanın Ermənistanla 44 günlük savaşda əldə etdiyi tarixi qələbə böyük əhəmiyyətə malikdir. Tarixi əhəmiyyətə malik olmaqla yanaşı, həm də bölgə ilə baglı geosiyasi reallıqların dəyişməsinə əsaslı şəkildə təsir göstərib. Bu qələbə ilə Azərbaycan növbəti dəfə regionun lider dövləti olduğunu sübut edib. Bu amil isə Azərbaycanın regional və beynəlxalq nüfuzunun yüksəlməsinə səbəb olub. Onunla ikitərəfli və çoxtərəfli münasibətləri genişləndirmək istəyən tərəfdaşlarının sayını artırıb. Müharibəyə qədər Azərbaycanla əməkdaşlığa əhəmiyyət verən tərəflər onun Avropanın enerji təhlukəsizliyndə rolu və imkanları ilə bağlı amilləri nəzərə alırdısa, savaşdaki qələbə həm də ölkəmizin iqtisadi gucu, maliyyə imkanlarının, onun ordusunun döyuş qabiliyyətinin, nəhayət azərbaycanlıların bir millət olaraq birlik və konsolidasiyasının göstəricisi oldu. Belə bir dövlət və millət ilə isə münasibətləri ancaq qarşılıqlı anlaşma və hörmət prinsipləri uzərində qurmaq olar. Azərbaycan hakimiyyəti bu müharibəyə qədər də Qarabag həqiqətlərini, habelə Ermənistanla siyasi, ideoloji və informasiya qarşıdurmasının reallıqlarından çıxış edərək xaricdə çox uğurlu lobbiçilik siyasətini həyata keçirirdi. Dövlətin iqtisadi gücü bu yöndə olan layihələrə xeyli vəsait ayırmağa imkan verdi. İndi isə bu siyasətin daha dərindən həyata keçirilməsi üçün əlverişli mühit yaranıb. Nəhayət, Qarabağın bərpa olunması layihələrində təmsil olunmaq, yer almaq istəyən transmilli şirkət və korporasiyaların öz biznes maraqlarından çıxış edərək vergi ödədikləri dövlətlərin siyasi elitalarına olan təsir imkanları da Azərbaycanla əməkdaşlıq etmək istəyən tərəflərin sayının əhəmiyyətli şəkildə artmasına səbəb olub. Bütün bunlar küll halında götürüldükdə isə Dagliq Qarabağdan Azərbaycanla razılaşdırmadan xaricə getmək istəyənlərə vizaların verilməsində ciddi məhdudiyyət və qanuni səbəblərin tətbiq edilməsinə gətirib çıxarıb”.
Politoloq onu da qeyd etdi ki, separatçıların xaricə getmək imkanları məhdudlaşıb.
Vidadi ORDAHALLI
