Qubadlı rayon İcra Hakimyyətinin başçısı Malik İsaqov özünə “çətirtutan” işçi götürüb. Məsələ ondadır ki, Vətən müharibəsi şəhidinin məzarı önündə işçiləri icra başçısının üzərində çətir tutub. Onun bu addımı ictimaiyyətin müzakirə obyektinə çevrilib və kəskin tənqid olunub. Qeyd edilir ki, dövlət başçısı özü çətirini daşıyır, amma yerli icra hakimiyyətinin başçıları yağışlı havada tədbirə gedəndə kimsə onlara çətir tutmalıdır.
Ümumilikdə bu, tək Qubadlı ilə bağlı olan məsələ deyil. Əksər icra başçıları müxtəlif tədbirlərdə o cür davranırlar. Tədbir açıq hava şəraitində keçirilirsə və yağışlı hava müşahidə olunursa, o zaman mütləq aparat işçilərindən biri bunların başı üzərində çətir tutmalıdır. Çətiri tutmaq çoxmu çətindir? Bir növ, icra başçıları bu kimi davranışları ilə özləri barədə “kiçik padşah” təəssüratı yaradırlar. Zatən rayon icra başçılarının çoxunun özünü rayonun sahibi kimi aparması kiməsə sirr deyil. Ancaq bəzən bu o həddə gəlib çatır ki, açıq tərzdə əndazəni aşırlar. Bu da haqlı olaraq ictimaiyyətdə qıcıq yaradır. Onsuz da cəmiyyətdə icra başçılarına münasibət yaxşı deyil.
“Bunlar o qədər varlanıblar, korrupsiyalaşıblar ki, kiminləsə hesablaşmaq istəmirlər, ictimai qınaqdan çəkinmirlər”
Məsələyə münasibət bildirən ekspert İlqar Hüseynlinin fikrincə, bütün bunlar icra başçılarının harınlamasının göstəricisidir: “Ümumilikdə, ölkədə əksər icra başçılarının şəxsiyyəti ilə bağlı çox ciddi problemlər var. Artıq vəziyyət o həddə gəlib çatıb ki, tez-tez bununla bağlı müxtəlif problemlərin yaranmasının şahidi oluruq. Bir neçə il əvvəl Salyan rayonunda biabrçılıq yaşandı. Belə ki, icra başçısı böyük gül-çiçək çələnginin altından keçərək barəsində ehtişamlı bir görüntü yaratmaq istədi. Sanki bu, icra başçısı yox, Misir fironudur. Bununla yanaşı, nəinki icra başçıları, onların birinci müavinləri belə, kabinetdən çıxıb avtomobilə əyləşən zaman kimsə onlar üçün qapını açmalıdır. Eyni zamanda icra başçılarında o qədər şahsevənlik məsələləri formalaşıb ki, onlar özlərini rayonun sahibi kimi aparırlar. Fikirləşirlər ki, rayonda nə varsa onlara məxsusdur. Nə istəyirlərsə, onu da edə bilərlər. Bu da təsadüfi deyil. Çünki icra başçıları o qədər varlanıblar, korrupsiyalaşıblar ki, kiminləsə hesablaşmaq istəmirlər, ictimai qınaqdan çəkinmirlər. Dərd orasındadır ki, bir sıra icra başçılarının həbs edilməsi də bunlara ibrət olmur. Əksinə, get-gedə daha da harınlaşırlar. Bircə o qalıb ki, icra hakimiyyətində rəsmən “çətirtutan” ştatını təsis etsinlər. Belə hallar cəmiyyətdə ciddi qınağa məruz qalmalıdır. Belə hallar ictimailəşəndən sonra həmin icra başçıları vəzifəsindən azad edilməlidir. Bir sözlə, belə icra başçılarına basqı olmalıdır. Həmçinin, bununla bağlı qanun qəbul edilməlidir. Belə hallar həm də gəlirlərin deklarasiyası ilə bağlı qanunun olmamasından irəli gəlir. Ona görə də icra başçıları özlərini bu dərəcədə arxayın aparırlar”.
Ekspert hesab edir ki, bu kimi hallara birdəfəlik son qoyulmalıdır.
Vidadi ORDAHALLI
