Donbasda separatçılarla Ukrayna ordusu arasında təmas xətti boyu döyüşlərin getdikcə şiddətləndiyi, tərəflərin bir-birinə artilleriya zərbələri endirdiyi bir vaxtda Rusiyanın Ukrayna sərhədlərinə doğru yenidən qoşun cəmləşdirdiyi xəbər verilir. ABŞ və Avropa rəsmiləri Rusiyanın Ukrayna sərhədlərinə hərbi qüvvə cəmləşdirməsindən narahatlıq ifadə ediblər.
Amerikalı və avropalı rəsmilər Rusiyanın son günlər Ukrayna sərhədlərinə qoşun cəmləşdirdiyini qeydə almağa başlayıblar. Bu hərbi aktivlik Rusiyanın Belarusla birgə keçirdiyi “Qərb-2021” irimiqyaslı hərbi təlimlərinin ardınca başlayıb. Bildirilir ki, Ukraynanın şərqində münaqişə yeni fazaya daxil olub, bir neçə gün əvvəl Ukrayna ordusu ilk dəfə separatçılara qarşı “Bayraktar TB2” döyüş pilotsuz təyyarəsini işə salıb.
Bu arada sosial şəbəkələrdə yayılan görüntülərə əsasən, bir neçə gün əvvəl Ukrayna sərhədlərinə tərəf 7 “İsgəndər-M” operativ-taktiki raket kompleksinin hərəkət etdiyi qeydə alınıb.
Ukrayna mənbələri isə ötən gün təmas xətti yaxınlığında Donetsk separatçılarının 2 BMP-sinin vurulduğunu bildirib. Münaqişə zonasında fəaliyyət göstərən ukraynalı jurnalistlər xəbər verir ki, separatçılar Minsk razılaşmasına zidd olaraq 3 BMP-ni təmas xəttinə yaxınlaşdırıb, bu zaman Ukrayna ordusunun PUA-ları onları qeydə alıb və artilleriya atəşi ilə zirehli texnika məhv edilib. Jurnalistlər texnikanın məhv edilməsinə dair görüntüləri də paylaşıblar.
ABŞ-ın müdafiə nazirliyi Rusiya-Ukrayna sərhədindəki vəziyyəti izləməkdə davam edir. Bunu qurumun nümayəndəsi Anton Semelrota bəyan edib. O, bugünlərdə “The Washington Post” qəzetində bölgədə Rusiyanın öz hərbi qüvvələrini artırması ilə bağlı çıxan xəbərə münasibətdə belə deyib: “Biz regiondakı vəziyyəti izləməkdə davam edirik. Amma hələ ki, əlavə məlumat verə bilmərik”.
Ükrayna ilə Rusiya arasındakı bu gərginlik nə ilə nəticələnə bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Donbasda təmas xətti boyunca gərginliyin artması və tərəflərin bir-birinə artileriyadan atəş açmaları kifayət qədər təhlükədən xəbər verir: “Rusiya belə gərginliyin yaranmasında Ukraynanı günahlandırır. Hətta Türkiyəyə də iradlar var ki, pilotsuz uçuş təyyarələrini Ukraynaya onlar verib. Proseslər hara gedib çıxa bilər? Rusiyanın məqsədi aydındır. 2008-ci ilin avqustunda Gürcüstana qarşı etdiklətini təkrarlamaq istəyir. Ümid edir ki, bu yolla hətta orada hakimiyyəti də dəyişmək mümkün olar. Bununla Ukaynadan gələn təzyiqləri bir müddət neytrallaşdıra biləcəyi qənaətindədir. Ancaq onu da deyim ki, Ukrayna da bu proseslərə uzun müddətdir hazırlaşıb. Ukraynanın ordusu dünyanın ilk iyirmiliyində qərar tutub. Lakin onun rus ordusuna qalib gəlmə ehtimalı çox aşağıdır. Rusiyanın isə 2008-ci ildə Gürcüstanda baş verən ssenarini təkrar edə biləcəyini mümkün sayıram. Çox güman ki, tərəflər arasındakı gərginlik davam edəcək. Çox da uzun çəkməyəcək. Çünki hər iki tərəf anlayır ki, hərbi yolla nəyəsə nail olmaq mümkün deyil. Rusiya bilir ki, yalnız Ukrayna deyil, həm də onun müttəfiqləri ilə üz-üzə gələcək. Ukrayna da məqsədinə çatsa, onda bu, Rusiya üçün sarsıdıcı zərbə olar. Bu baxımdan da Rusiya ciddi dirəniş göstərəcək. Yəqin xatırlayırsınız, 2014-cü ildə Krımla bağlı hadisədən sonra beynəlxalq tədbirlərdə hətta Putinə salam da vermirdilər. Suriyadakı əməliyyatlardan sonra Rusiyanın nüfuzunu bərpa etmək mümkün oldu. Ukrayna məqsədinə çatsa, Rusiyanın nüfuzu daha da zədələnmiş olar. İndiki halda bu bizim marağımıza da cavab vermir. Çünki ümid edirik ki, Rusiyanın vasitəçiliyi ilə sülh sazişi imzalanacaq. Bu da Qərbi qətiyyən qane etmir. Yollar axtarırlar ki, Rusiyanı bu imkanlardan məhrum etsinlər. Ukraynadakı hadisələr Qərbin istədiyi kimi başa çatsa, bu bizim üçün də optimal deyil. Biz də maraqlıyıq ki, gərginlik sülhlə yoluna qoyulsun. Hər iki tərəf bunu anlayacaq gücdədir. Bir neçə gündən sonra sakitliyin bərpa olunacağına inanıram”.
Məhəmmədəli QƏRİBLİ
