Ermənilər yenə 44 günlük müharibədə uğradıqları məğlubiyyətin səbəbini özlərində yox, başqa yerdə axtarırlar. Yenə kimisə günahkar çıxarmağa cəhd edirlər. Bir müddət əvvəl bunu Rusiya ilə əlaqələndirirdilərsə, indi məğlubiyyəti digər faktorlarla bağlamağa çalışırlar.
İrəvanda siyasi partiyalarin iştirakı ilə keçirilən “İtirilmiş qələbə: xəyanət, yoxsa savadsızlıq” adlı tədbir bir daha ermənilərin necə xəstə düşüncəyə malik olduğunu ortaya qoyur. Çünki sözügedən tədbirdə qeyd edilib ki, biz Azərbaycana məğlub ola bilməzdik, bizi ancaq “Bayraktar” uddu. Yəni hələ də elə düşünürlər ki, onlar qələbə qazanmalı imişlər, kimlərsə, nələrsə buna mane olub. Görünən odur ki, bunlar məğlubiyyətin səbəbini xəstə düşüncələrlə yaşamalarında deyil, kimlərinsə xəyanətində, “Bayraktar”da, Putində axtarırlar. Bütün bunlar onu göstərir ki, ermənilər aldıqları zərbədən dərs çıxarmaq istəmir.
“Erməni siyasilərin ortaya atdığı arqumentlər cəfəngiyatdır”
Məsələyə münasibət bildirən hərbi ekspert Ramil Məmmədlinin fikrincə, ermənilərin səsləndirdiyi tezislər tamamilə absurddur: “Bayraktar”, “Harop” dronları olmasaydı belə, Azərbaycan Ordusu işğal altında olan əraziləri azad edərdi. Sadəcə, müasir PUA-ların sayəsində əsgəri itkilərimiz az oldu. Torpaqları PUA-lar deyil, qəhrəman əsgərlərimiz öz canı-qanı bahasına azad edib. Özü də əlverişsiz mövqelərdən hücuma keçərək strateji əhəmiyyətli yüksəklikləri azad etdilər. 30 il ərzində düşmənin möhkəmləndirdiyi istehkamları yardılar. Döyüşlərdə 2900 nəfərdən çox hərbçi şəhid olub. Bunun 13 faizi zabitlər olub. Azərbaycanda uzun illər idi Silahlı Qüvvələrin gücləndirilməsi ilə bağlı sistemli işlər aparırdı, təlimlər keçirilirdi və s. Təkcə 2019-cu ildə Türkiyə ilə birlikdə 10 hərbi təlim keçirilib. Bütün bunlar ordumuzun döyüş hazırlığının artırılmasına xidmət edirdi. Azərbaycan həm əhalinin sayına görə, həm də digər resursları baxımından bir neçə dəfə Ermənistanı üstələyirdi. Strateji əhəmiyyətli yüksəkliklər ermənilərdə olsa da, zatən onlar uzun müddət duruş gətirə bilməzdilər. Müharibənin gedişində Ermənistan tərəfdə 10 min nəfər fərari var idi. Erməni ordusu həm taktiki, həm də strateji planlaşma baxımından geri qalırdı. Bütün bunları Ermənistan döyüşlərin gedişində gizlətməyə çalışsa da mümkün olmadı. Ona görə də erməni siyasilərin ortaya atdığı arqumentlər cəfəngiyatdır. Düşmənin məğlubiyyəti qaçılmaz idi”.
Hərbi ekspert onu da qeyd etdi ki, Ermənistan tərəfi öz xəstə iddialarından əl çəkməsə növbəti dəfə daha güclü zərbə alacaqlar.
Vidadi ORDAHALLI
