Azərbaycanlı əsirlərin 1994-cü ildə İrəvandakı xəstəxanalardan birində öldürülməsi ilə bağlı faktlar yayımlanıb. Bununla bağlı detalları sosial şəbəkə istifadəçilərindən biri öz profilində paylaşıb. Onun bildirdiyinə görə, həmin vaxt əsirlikdə olan 23 nəfər azərbaycanlının hamısı Qırmızı Xaç cəmiyyətinin siyahısında yer alıbmış. Ona görə də ermənilər məcbur qalaraq öldürülən 8 nəfərin nəşini Azərbaycana təhvil verməli olublar.
Onlar iddia edirdilər ki, sözügedən şəxslər guya qaçış zamanı öldürülüb. Ancaq Böyük Britaniyanın Dandi Universitetinin pataloqu Derrik Paunder bu iddiaları təkzib edən faktları sadalayıb. O bildirib ki, öldürülənlərin üzərində işgəncə izləri var idi. Onların altısı birbaşa başına atəş açılaraq öldürülmüşdü. Öldürülən üç nəfərlə bağlı təkzibedilməz dəllilər ondan ibarət idi ki, tapançanın lüləsi onların başına dirəndikdən sonra atəş açılmışdı. Əsgərlərdən biri isə yaxın məsafədən sinəsinə atəş açılaraq öldürülmüşdü.
Ermənistan azərbaycanlı əsirlərlə bağlı bütün faktları inkar etmək istəyirdi, amma göründüyü kimi, artıq faktlar öz təsdiqini tapır. Bu və digər şəkildə təsdiqlənən faktlar Ermənistanın məhz buna görə də beynəlxalq məhkəmə qarşısına çıxarılmasına əsas yaradır.
“Dandi Universitetinin pataloqu da öz dəlilləri ilə Ermənistanın cinayətlərini ifşa etsə də, yalanları inkar edib həqiqəti açıqlasa da, təəssüflər olsun ki, buna lazımı reaksiya verilməyib”
Müasir İnkişaf Birliyinin sədri, politoloq Mübariz Göyüşlü “Bakı-Xəbər”ə bildirdi ki, bu fakt Ermənistanın əsirlərlə davranışda beynəlxalq hüququn bütün prinsiplərinin pozulduğunu, eyni zamanda bu ölkənin insanlıq əleyhinə müharibə cinayətləri törətdiyini bir daha təsdiqləyir. M.Göyüşlü qeyd etdi ki, Ermənistan tərəf Birinci Qarabağ müharibəsi dövründə əsir azərbaycanlılara qarşı çox böyük vəhşiliklər göstərib, onlara ən ağır işgəncə üsulu tətbiq edib: “Həm Azərbaycan, həm mütərəqqi bəşəriyyət, həm də ayrı-ayrı tədiqiqatçılar, araşdırmaçı və tarixçilər Birinci Qarabağ müharibəsi zamanı Ermənistanın azərbaycanlılara qarşı törətdiyi vəhşiliklər barədə faktları dəfələrlə ictmailəşdirib, beynəlxalq aləmə təqdim edib. Ermənistanın belə cinayətləri zaman-zaman sübut olunub. 1994-cü ildə adları Qırmızı Xaç cəmiyyətinin siyahısında olan azərbaycanlı əsirlərin böyük işgəncə ilə öldürülməsi faktı beynəlxalq aləmi narahat etməlidir. Böyük Britaniyanın Dandi Universitetinin pataloqu da öz dəlilləri ilə Ermənistanın cinayətlərini ifşa etsə də, yalanları inkar edib həqiqəti açıqlasa da, təəssüflər olsun ki, buna lazımı reaksiya verilməyib. Ermənistan zamanında cəzalandırılsaydı, özündə cəsarət tapıb azərbaycanlı əsirlərə qarşı vəhşicəsinə davranmazdı. Ermənistanın Birinci Qarabağ müharibəsində Rusiyanın və başqa məlum xristian ölkələrinin dəstəyinə güvənib törətdiyi cinayətlərin sayı həddən artıq çoxdur. Ermənistan havadarlarına arxayın olub adı Qırmızı Xaçın siyahısında olan azərbaycanlı əsirləri işgəncə ilə qətlə yetirib. Hələ bu aşkarlanan faktların çox az hissəsidir. Görün nə qədər gizlində qalan cinayətlər var və onların da üzə çıxacağı şübhəsizdir”.
M.Göyüşlü hesab edir ki, Ermənistan tərəfin yaydığı bu faktları Azərbaycanın əlaqədar təşkilatları, dövlət qurumları mütləq araşdırmalı və bununla bağlı Qırmızı Xaça sorğu göndərməlidir. “Bu faktlar tam olaraq araşdırılmalıdır, 27 il əvvəl baş verənlərlə bağlı Qırmızı Xaç cəmiyyətinə də sorğu göndərməlidir ki, adı sənin siyahında olan azərbaycanlı əsirlər niyə qətlə yetirilib, bu fakt nə üçün ört-basdır edilib?
Hesab edirəm ki, bu barədə aidiyyəti orqanlarımız və hüquqşünaslarımız bir müzakirə aparmalı və Ermənistanın bu məsələyə görə də beynəlxalq hüquq müstəvisində cəzalandırılmasının yollarını tapmalıdır. Çünki Ermənistan törətdiyi hər cinayətin qarşılığını almalıdır ki, gələcəkdə bir də belə cinayətlər törətməyə həvəslənməsin”.
M.Göyüşlünün sözlərinə görə, torpaqlarımız işğaldan azad olunandan sonra aşkarlanan toplu məzarlıqlar erməni vəhşiliyinin aşkar göstəricisidir. Kəlbəcərin Başlıbel kəndində üzə çıxarılan toplu məzarlıqlar da Ermənistanın insanlıq əleyhinə müharibə cinayətlərindən xəbər verir. Ekspert deyir ki, ermənilər azərbaycanlı əsirlərə qarşı elə vəhşətlər sərgiləyiblər, onu sözlə ifadə etmək çətindir. M.Göyüşlünün sözlərinə görə, bütün bu faktlar beynəlxalq təşkilatların hesabatlarında özünə yer tutmalıdır. M.Göyüşlünün sözlərinə görə, 44 günlük Vətən müharibəsində biz öz torpaqlarımızı işğaldan azad etdik, şəhidlərimizin, günahsız insanlarımızın qisasını aldıq, sınmış qürurumuzu bərpa etdik, həmin dövrdə bizim imkanımız vardı ki, ermənilərin Birinci Qarabağ müharibəsində etdiklərini onların özlərinə qarşı edək, amma biz onu etmədik. “Bizim buna hər cür imkanımız olmasına baxmayaraq. biz mülki əhalini və mülki obyektləri hədəfə almadıq, dinc insanlara zərər vurmadıq, biz erməni hərbçiləri ilə döyüşdük, hədəfimiz onların hərbi obyektləri oldu. Mülkü əhali ilə işimiz yox idi. Bu bizim dünyaya göstərdiyimiz bir insanlıq, humanizm nümunəsi idi...”
İradə SARIYEVA
