Ermənistan ilk dəfə olaraq 2021-2025-ci illər üçün UNESCO-nun İcraiyyə Şurasının üzvlüyünə namizədliyini irəli sürüb. Bu barədə erməni mediası məlumat yayıb. Qeyd edilənə görə, Ermənistan 1992-ci ildən bu günə kimi UNESCO-nun üzvüdür.
Çox qəribədir, saysız müharibə cinayətləri törədən, Azərbaycana aid minlərlə mədəni irs nümunələrini vandalcasına dağıdıb məhv edən, yer üzündən silən, bir qismini isə saxtalaşdıran bir ölkə UNESCO-nun İcraiyyə Şurasının üzvlüyünə iddia edir. Ermənistanın belə bir mötəbər təşkilatın İcraiyyə Şurasının üzvlüyünə namizədliyini irəli sürməyə birmənalı olaraq haqqı çatmır. Ermənistan UNESCO-nun İcraiyyə Şurasına necə üzv seçilə bilər ki, özü mədəni irs cinayətkarıdır, bütün beynəlxalq konvensiyaların, o cümlədən UNESCO-nun özünün, onun daxil olduğu BMT-nin qəbul etdiyi bütün sənədlərin tələbini pozub, mədəni irsə qarşı vandalizm cinayətləri törədib.
Azərbaycan hökuməti, əlaqədar qurumlar, xaricdəki diaspora təşkilatlarımız nə etməlidir ki, Ermənistan bu şuraya üzv seçilməsin?
Ekspertlər deyirlər ki, Ermənistan hazırda UNESCO-ya daha da yaxınlaşmaq üçün böyük cəhdlər göstərir. Heç şübhəsiz ki, bu cəhdlərin alınması üçün xaricdəki erməni diasporu və UNESCO-nun daxilində pulla ələ alınmış adamlar xüsusi canfəşanlıq edirlər. Ermənistanın bu il UNESCO-nun İcraiyyə Şurasının üzvlüyünə namizədliyini verməsi təsadüfi deyil. Çünki şuraya üzv olmaqla Azərbaycanın ona qarşı qaldıracağı iddaların qarşısını kəsmək və orada özünə daha çox dəstək qazanmaq, UNESCO-nu daim yalan məlumatlarla “təmin etmək” niyyətindədir. Şuraya üzv olmaqla Ermənistan ona olan dəstəyi bir az da gücləndirmək istəyir. Belə deyilsə, bəs onda Ermənisan niyə Vətən müharibəsindən əvvəl bu şuraya namizədliyini irəli sürmürdü? Şuraya ona görə üzv olmaq üçün dəridən qabıqdan çıxır ki, özü mədəni irs cinayətləri törətməsinə baxmayaraq öz adını Azərbaycana qoysun. Ekspertlər hesab edir ki, Azərbaycanın UNESCO-dakı nümayəndəliyi bu məsələdə çox aktiv olmalıdır. Azərbaycanın UNESCO-dakı nümayəndəliyi, Azərbaycan XİN, diaspora qurumları, Mədəniyyət Nazirliyi və başqa qurumlar Ermənistanın bu iddiasının həyata keçməsinin qarşısını almaq üçün məqsədyönlü işlər görməlidirlər.
Qafqaz Tarixi Mərkəzinin rəhbəri Rizvan Hüseynov məsələ ilə bağlı baki-xeber.com-a bildirdi ki, biz Azərbaycan kimi ölkələrə qarşı haqsızlığa çoxdan vərdiş etmişik. R.Hüseynov qeyd etdi ki, istər Qərb institutları, siyasi dairələri, istərsə də, UNESCO tərəfindən bizə qarşı haqsızlıq edilir: “Əfsuslar olsun ki, biz UNESCO tərəfindən də belə haqsızlıqlarla qarşılaşırıq. Zatən, heç nəyə baxmayaraq bu təşkilatın ermənilərə dəstək verdiyini görürük. Səhv etmirəmsə, 9-22 noyabr tarixlərində Parisdə UNESCO-nun toplantısı keçiriləcək, orada bəzi mühüm qərarlar qəbul ediləcək. Həmçinin UNESCO-nun yeni rəhbərliyi seçiləcək. Yəqin ki, elə Odre Azule yenidən baş direktor olacaq.
Biz bilirik ki, bunlar da tamamilə ermənipərəst mövqedən çıxış edirlər. Mən indiki UNESCO rəhbərini nəzərdə tuturam. Sözsüz ki, Qarabağda və digər ərazilərimizdə Ermənistan tərəfindən vandalcasına dağıdılan minlərlə abidəmizlə, maddi irsimizlə bağlı UNESCO faktiki olaraq heç bir addım atmayıb. Əksinə, əlindən gələni edirdi ki, bu faktın üzərindən sükutla keçilsin, bu müzakirə olunmasın. Biz neçə il idi ki, UNESCO-dan araşdırma missiyası göndərməyi tələb edirdik. Amma missiya göndərmirdi və əlindən gələn maneçilikləri törədirdi. Amma indi çox böyük canfəşanlıqla UNESCO həm regiona, Qarabağa gəlmək istəyir, həm də Ermənistanın İcraiyyə Şurasına üzv seçilmək məsələsini gündəmə gətir”.
R.Hüseynov hesab edir ki, Ermənistanın İcraiyyə Şurasına üzv məsələsi elə UNESCO-nun özünün istəyidir. R.Hüseynovun sözlərinə görə, bu təşkilatın Ermənistanpərəst mövqeyindən özü çox böyük ziyan çəkəcək: “Əgər UNESCO belə bir addımlar atırsa, mövqe sərgiləyirsə bununla özünə və öz maraqlarına istər müsəlman dünyasında, istərsə də Qafqazda böyük zərbə vuracaq. Azərbaycanın çox böyük imkanları var ki, bu haqsızlığı dünya ictimaiyyəti və beynəlxalq təşkilatlar qarşısında qaldıraraq UNESCO-nun təkcə mədəni yox, eyni zamanda siyasi rıçaq, alət kimi istifadə olunduğunu sübut etsin. Azərbaycan bunu sübut edə bilər. Əslində, aidiyyəti qurumlar Xarici İşlər Nazirliyinin xətti ilə indidən bu məsələnin qarşısını almaq üçün hərəkətə keçməlidir. Bizim dövlət qurumları UNESCO-nun qarşısında məsələ qaldırmalıdır ki, necə ola bilər, 30 il müddətində Azərbaycanın maddi irsini, bütün müsəlman abidələrini, məscidlərini məhv edən terrorçu, işğalçı Ermənistan dövləti İcraiyyə Şurasının üzvlüyünə namizədliyini verə, orada yer tutmaq iddiasını ortaya qoya bilər? Bu sual UNESCO-ya ünvanlanmalıdır ki, siz mədəni irs terrorçusunu, cinayətkarını hansı əsasla bu şuraya üzv qəbul etmək istəyirsiniz?” - deyə R.Hüseynov qeyd etdi.
İradə SARIYEVA
