Özünü aristokrat, ağıllı şəxs kimi göstərməyə çalışan prezident Armen Sarkisyanın RBK kanalına müsahibəsi Ermənistanda birmənalı qarşılanmayıb. Qeyd edilir ki, Qarabağla bağlı vəziyyətin o həddə çatmasında Armenin də günahı az eyil.
Məsələ ondadır ki, A.Sarkisyan 2018-ci ilin martında parlament tərəfindən prezident seçilib. Qeyd edək ki, 2015-ci ildə qəbul edilmiş yeni Konstitusiyaya əsasən Ermənistan 2018-ci ilin aprelindən etibarən parlament idarə üsuluna keçib. Həmin dövrdən sonra Ermənistanda baş verənlərə və Qarabağ məğlubiyyətinə görə, A. Sarkisyan da məsuliyyət daşıyır. Ancaq o elə danışır ki, guya o bütün bunlara görə günahkar deyil. Onun bu cür mövqe sərgiləməsi cəmiyyətdə və mətbuata sərt tənqidlərə səbəb olub: “Niyə soruşmursunuz ki, bu fəlakətə görə birbaşa məsuliyyət daşıyanlardan və onun müəlliflərindən biri olan bu nəzakətli adam, bütün şeyxlərin və kralların dostu, sizin ürəklərinizin prezidenti, elitar turist və müftəxor prezident nəylə məşğuldur? O, vəzifə xatirinə hər kəsi və hər şeyi sataraq, vəzifəni kişilikdən və vətəndən üstün tutdu. Budur əclaflığın bahalı kostyuma bürünmüş gerçək sifəti. Və ilk olaraq, ondan başlamaq lazımdır”.
Göründüyü kimi, A.Sarkisyan özünü ağıllı göstərməyə çalışsa da, bu, birmənalı qarşılanmayıb. Bu isə onu göstərir ki, baş verənlərə görə, o, Paşinyandan heç də az məsuliyyət daşımır.
Məsələyə münasibət bildirən millət vəkili, politoloq Elman Nəsirovun fikrincə, Ermənistan prezidenti özünü elə aparır ki, sanki ölkədə baş verənlərdən xəbəri yoxdur: “Sanki Ermənistanın yaşadığı acı məğlubiyyətə görə o məsuliyyət daşımır. A. Sarkisyanın bu günlərdə verdiyi müsahibə o qənaətə gəlməyə əsas verir ki, ya onun tutduğu vəzifədən xəbəri yoxdur, ya da ümumiyyətlə məsuliyyət hissini itirib. Ermənistanın üzləşdiyi məğlubiyyətə və bütün bunların baş verməsinə görə A.Sarkisyan da məsuliyyət daşıyır. Səlahiyyətləri məhdud olsa da, o, bütün bu prosesin içində olub. Çünki 4 ilə yaxındır ölkə prezidentidir. Ancaq özünü elə aparır ki, guya bütün bunlara görə yalnız baş nazir məsuliyyət daşıyır. Erməni cəmiyyəti bütün bunların fərqində olduğuna görə, onun səsləndirdiyi fikirləri ikrah hissi ilə qarşılayır. Çünki müharibənin gedişində bəlli oldu ki, Ermənistanda siyasi və hərbi hakimiyyət arasında koordinasiya olunmuş fəaliyyət yoxdur. Paşinyan gün ərzində özü-özünü təkzib edən bir neçə bəyanat verirdi. A.Sarkisyan isə, gah Paşinyanın leyhinə, gah da əleyhinə bəyanatlar verirdi. Bax belə bir xaotik idarəçilik ölkədə mövcud idi. Ona görə də A.Sarkisyanın yaxasını kənara çəkməyinin bir mənası yoxdur. Məhz A.Sarkisyan Ermənistanın Azərbaycana yönəlik işğalçılıq siyasətini dəstəkləyirdi. Müdafiə naziri David Tonoyanın “yeni ərazilər, yeni müharibə” cəfəng fikirlərini dəstəkləyirdi. Müsahibəsində erməni diversantlara görə narahat olduğunu deyir. Bəs belə idisə, o zaman 10 noyabrdan sonra onların Azərbaycan ərazisinə sızmasına niyə göz yumdu? Bu baxımdan hesab edirəm ki, o, kimisə aldada bilməyəcək”.
Millət vəkili onu da qeyd etdi ki, bütün bunlara görə A.Sarkisyan bir gün erməni ictimaiyyətinə hesabat verməli olacaq.
Vidadi ORDAHALLI
