Rusiya Baş Qərargah rəisinin müavini, general-polkovnik Sergey İstrakov İrəvanda səfərdədir. S.İstrakov Ermənistan baş naziri Nikol Paşinyanla görüşüb.
Rəsmi məlumata görə, görüşdə Ermənistan və Rusiya arasında hərbi-texniki əməkdaşlıq, eyni zamanda regiondakı mövcud hərbi-siyasi situasiya barədə fikir mübadiləsi aparıldığı bildirilib. Qeyri-rəsmi olaraq isə bu görüşün əsas hədəfinin sərhədlərin delimitasiya və demarkasiyası ilə bağlı olduğu iddiasını irəli sürmək mümkündür.
Qeyd edək ki, Rusiya lideri Vladimir Putin Valday diskussiya klubunda (21 oktyabr) çıxışı zamanı Azərbaycan-Ermənistan sərhədlərinin dəqiq xəritələrinin məhz Rusiya Baş Qərargahında saxlanıldığını bildirmişdi. Bunun ardınca Rusiya Baş Qərargah rəisinin müavininin İrəvana səfəri zamanı bu xəritələri aparması və müzakirələrin də bu istiqamətdə olması mümkündür.
Yüksək ranqlı Rusiya hərbçisinin Ermənistana səfərinin sözügedən xəritələrlə bağlı olduğu haqda yayılan xəbərlər nə dərəcədə əsaslı sayıla bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, 10 noyabrda Moskvada 3 ölkə liderinin görüşü gözlənilir: “Görüşdə sərhədlərin demarkasiyası ilə bağlı hansısa ilkin sənədin imzalanacağı haqda politoloqlar ehtimallar irəli sürür. Ancaq nəzərə alaq ki, tərəflər arasında bu məsələ ilə bağlı fikir ayrılıqları mövcuddur. Azərbaycan son bir il ərzində bəzi sahələrdə öz sərhədlərimizi bərpa edib. Çünki Ermənistan prosesin normal şəkildə həyata keçməsinə imkan vermirdi. Paşinyan parlamentdə etiraf edib ki, sərhəddə geri çəkiliblər. Ancaq əvvəl bunu ərazilərinə müdaxilə kimi təqdim edirdilər. İndi öz sərhədlərinə çəkildiklərini deyirlər. Ziddiyyətləri dəqiqləşdirmək üçün SSRİ dönəmində olan xəritələr əsas götürülməlidir. Ancaq həmin xəritələrlə də Ermənistan razılaşmır. Qeyd edir ki, həmin xəritələr onlarda olanlarla uzlaşmır. Biz bunu Qaragöl ətrafında gərginlik yaşananda gördük. Ermənistan Azərbaycan hərbçilərinin sərhədi pozduğunu, Azərbaycan isə torpaqları 30 il işğal altında qaldıqdan sonra indi beynəlxalq səviyyədə tanınmış sərhədlərini bərpa etdiyini bildirdi. Azərbaycan SSRİ xəritələri ilə sərhədin dəqiqləşməsinə etiraz etmir. Ermənistan bilir ki, həmin xəritələrlə sərhədin dəqiqləşməsi aparılsa, bir çox güzəştlər etməlidir. Bu səbəbdən də prosesi yubatmaq üçün xəritələri bəhanə edir. Buna görə də Putin dəqiq xəritələrin ünvanını göstərib. Rusiyanın yüksək ranqlı hərbçisinin bu məqamda Ermənistana gedib Paşinyanla görüşməsi, məhz deyilən xəritələrlə bağlı ola bilər”.
Məhəmmədəli QƏRİBLİ
