“Məlum idi ki, bu müharibədə Ermənistan Azərbaycandan irəlidə yox, geridəydi - həm hərbi, həm də texnoloji planda”. Bunu Ermənistan prezidenti Armen Sarkisyan Rusiyanın RBK kanalına geniş müsahibəsində deyib.
Ermənistan prezidenti həmin müsahibədə bir sıra etiraflar edib və ölkəsinin durumunun heç də ürəkaçan olmadığını bildirib. Sarkisyan Ermənistanın acınacaqlı məğlubiyyətinin xeyli sayda fundamental səbəblərinin olduğunu qeyd edib: “Mən geridəydik deyəndə onu nəzərdə tuturam ki, bizim öz PUA-larımız olmalıydı, yəni özümüz hazırlamalıydıq. Ermənistan XXI əsrin müharibəsinə hazırlaşmalı idi.”
Bununla belə, Armen Sarkisyan məğlubiyyətin təkcə 1990-cı illərdəki qalibiyyətin yaratdığı arxayınçılıqla bağlı olmadığını deyib və qeyd edib ki, bir çox sahələrdə ermənilər xalq və dövlət olaraq illüziyaya qapılıb, özlərini aldadıblar: “Biz özümüzü aldadırıq ki, guya nəsə edirik. Məsələn, guya bizdə demokratiya var. Özümüzü aldadırıq ki, yüksək səviyyəli elmimiz, çox güclü ordumuz var. Ən pisi odur ki, özümüz də buna inanırıq. Bu çox təhlükəli şeydir. 1994-cü ildə əldə edilən atəşkəsdən keçən 26 ildə güclü ordu yaratmalı, iqtisadiyyatı inkişaf etdirməli və gücləndirməli, Rusiya ilə münasibətləri başqa bir səviyyəyə qaldırmalı idik”.
Ermənistan prezidenti etiraf edib ki, bütün bunların olmaması üzündən Ermənistan böyük məğlubiyyətə uğrayıb.
“Ermənistan normal inkişaf istəyirsə, ərazi iddialarından əl çəkməlidir”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Sarkisyanın məlum məsələyə münasibətdə səsləndirdiyi fikirlərdə reallıqları əks etdirən məqamlar da var, əks etdirməyən məqamlar da: “Qeyd edir ki, Rusiya ilə münasibətlər daha yüksək səviyyəyə qaldırılmalı idi. Daha yüksək səviyyə nə deməkdir? Köçəryan-Sarkisyan dövründə Ermənistan az qala Rusiyanın quberniyasına çevrilmişdi. Rusiyanın hərbi bazaları var idi və s. Bundan artıq nə ola bilərdi ki? Daha sonra deyir ki, ərazilər işğal ediləndən sonra ermənilər arxayın olmayıb. Qətiyyən belə deyil. Əksər ermənilər aşırı dərəcədə arxayın idi ki, Azərbaycan bir də müharibəyə cürət etməz. Buna getsə belə, uğur əldə edə bilməz. Bunu şərtləndirən bir neçə faktor var idi. Ermənilər hesab edirdilər ki, işğal dönəmi uzandıqca, vaxt onların xeyrinə işləyəcək. Böyük güclər Azərbaycana öz ərazilərini hərb yolu ilə azad etməyə imkan verməzlər. Onlar hesab edirdilər ki, əksər strateji yüksəkliklərin Ermənistan ordusunun nəzarətində olması, güclü mühəndis istehkam qurğuları Azərbaycan Ordusunun önünü kəsəcək. Bir sözlə, ordumuz cəbhə xəttini yara bilməyəcək. Ancaq onların bütün bu illüziyaları 44 gün ərzində puç oldu. O həqiqətdir ki, 26 il ərzində Ermənistan inkişaf etmədi. Sosial vəziyyət pisləşdikcə, ölkədən əhalinin köç etməsi sürətləndi. Ermənistan xarici investorlar üçün cazibədar olmadığı üçün, ölkəyə xarici sərmayə gəlmədi. Ermənistan 26 il ərzində necə inkişaf edə bilərdi ki, həmsərhəd olduğu 4 dövlətdən 2-si ilə sərhədləri bağlı idi? O baxımdan Ermənistan əvvəl-axır bu cür acınacaqlı vəziyyətə düşməli idi”.
Partiya sədri onu da qeyd etdi ki, Ermənistan normal inkişaf istəyirsə, ərazi iddialarından əl çəkməlidir.
Vidadi ORAHALLI
