Ermənistan Baş naziri Nikol Paşinyan parlamentdəki çıxışında çox maraqlı etiraf edib. Deyib ki, Zəngəzurdan hərbi birliklərin geri çəkilməsi əmrini şəxsən özü verib. Onun sözlərinə görə, bu addım hərbi əməliyyatların yenilənməsinə imkan verməmək üçün atılıb:
“Biz istəyirdik ki, heç olmasa, müvəqqəti də olsa, strateji mahiyyət daşıyan yolu itirməyək. Zəngəzurla bağlı məsələdə mən haçansa öz məsuliyyətimdən imtina etmişəm? Yazılı və şifahiyə qalanda, əmr mövcud prosedurla verilir. Müzakirə etmişik və qərar verilib. TŞ toplantısı olmayıb, ancaq TŞ-nin bütün üzvləri, Zəngəzurun qubernatoru, “heç nədən xəbərim yoxdur” deyən xarici işlər naziri, o cümlədən nazir müavini o müzakirədə iştirak edirdi. Və qərar qəbul edildi. Biz yeni müharibədən qaçmaq istəyirdik. Əgər bu qərar verilməsəydi, hərbi əməliyyatlar yeni güclə başlayacaqdı. Onda, doğrudur, Zəngəzurda bizim ciddi problemlərimiz yarandı. Biz onlarla kilometr öndə idik, təəssüf ki, geri çəkilməyə məcbur olduq”.
Paşinyan həmçinin bildirib ki, Ermənistan 7 rayonun qaytarılması barədə saziş imzalamışdı (yəni Şərqi Zəngəzurdan geri çəkilməli idi – red.) və bu, artıq yeni xəbər deyil.
N.Paşinyan əmri özünün verdiyini, keçmiş müdafiə naziri Vaqarşak Arutyunyanın isə icra etdiyini bildirib: “Mən şəxsən bu qərardan və Zəngəzurdakı situasiyadan məsuliyyət daşıyıram”.
Xatırladaq ki, Ermənistan müxalifəti erməni ordusunun dekabrda 25 km-dan çox geri çəkildiyini açıqlamışdı.
Paşinyanın bu etirafları nəyi düşünməyə əsas verir?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, deməli, Paşinyan müharibədən sonra özü üçün çox ağıllı nəticələr çıxarıb: “Artıq onlar əvvəlki kimi “qüdrətli” Ermənistan ordusundan, “keçilməz Ohanyan səddi”ndən danışmırlar. Əvvələr belə nağıllarla həm bizi qorxutmağa çalışırdılar, həm də dünya erməniləri arasında özlərinə inam aşılayırdılar. İndi isə Paşinyan parlament tribunasında qabağımızdan qaçmağı bir qəhrəmanlıq kimi qələmə verir. Yəqin bildiniz ki, söhbət Azərbaycanın öz qanuni ərazilərini nəzarətə götürməsindən gedir. Onlar belə zənn edirdi ki, müharibə başa çatan kimi Azərbaycan əldə etdiyi uğurlarla qane olacaq və Ermənistan-Azərbaycan sərhədindəki vəziyyət dəyişməz qalacaq. Ancaq biz gördük ki, Azərbaycan dövlət sərhədində bir qarış torpağının da davasını edir. Ermənistan bir qədər dirənib, prosesi pozmağa çalışdı. Ancaq Prezidentimiz bəyan etdi ki, nəinki Qarabağ, hətta Zəngəzur da tarixi Azərbaycan torpağıdır. Bundan sonra Paşinyan geri çəkilməkdən başqa çarəsinin olmadığını görüb, addım atdı. Zəngəzurdakı strateji yola və Ağdağ yüksəkliyinə nəzarəti bərpa etməyimiz bizə geniş üstünlüklər verir. Çünki faktiki olaraq, bununla biz ətraflara da ciddi nəzarət edirik. Hazırda erməni maşınları bizim tərəfimizdən yoxlanılaraq buraxılır. Ermənistan rəhbərlərinin bu yöndə açıqlamaları onu deməyə əsas verir ki, onlar revanş barədə fikirlərini tam dəfn ediblər. Buna onları Azərbaycan Ordusunun gücü, Ali Baş Komandanımızın müdrik siyasəti vadar edib. Hələ ki, proses tamamlanmayıb. Biz sərhədin tam demarkasiya və delimitasiya olunmağını gözləyirik. Eyni zamanda, Ermənistan bizim anklav kəndlərimizi də tez bir zamanda qaytarmalıdır. Əks təqdirdə yenə biz onları geri qaçırmalı olacağıq. Biz yalnız öz gücümüzə güvənirik”.
Məhəmmədəli QƏRİBLİ
