Erməni saxtakarlığı sınır tanımaq bilmir ki, bilmir. Özlərini dünyanın “ən qədim” xalqlarından biri kimi qələmə verən ermənilər beynəlxalq ictimaiyyəti də çox asanlıqla aldada bilirlər. Qərbdə möbcud olan elə beynəlxalq təşkilat yoxdur ki, ermənilərin ora əli çatmasın.
UNESCO üzrə Ermənistan Milli Komissiyasının rəsmi Facebook səhifəsində bildirilir ki, erməni xəttatlığı və onun mədəni təzahürləri UNESCO-nun Bəşəriyyətin Qeyri-Maddi Mədəni İrs üzrə Reprezentativ Siyahısına daxil edilib. Guya Süleymanın məsəlləri kitabında yazılmış “Hikmət və göstərişi bilmək, ağlın kəlamlarını anlamaq” “erməni əlifbasının hərfləri ilə yazılmış ilk cümlədir”.
Ümumiyyətlə, dünyada xəttatlıq sənətinin birbaşa Şərqə aid olduğu məlumdur. Şərqdə isə, əsasən, X əsrdən sonra xəttatlıq sənəti intişar tapıb.
Erməni xəttatlığı deyilən bir anlayışın olmadığı da məlumdur. Bu xəttatlıq var idisə, indiyə qədər niyə onun barəsində bir cümlə yazılmadı, eşidilmədi?
Ermənilərin hansı xəttatlıq növləri olub ki, onu UNESCO-ya daxil ediblər? Ermənilər UNESCO-nu da aldadıblar. Onların təqdim etdiyi xəttatlıq nümunələri qədim alban-qipcaq xəttatlıq nümunələri ola bilərmi? Nəzərə alaq ki, alban qıpçaq türk əlyazmalarının, xəttatlıq nümunələrinin çoxu Matenadaranda saxlanılır.
“Dünyada “erməni xəttatlıq sənəti” deyilən bir anlayış, mədəniyyət yoxdur, bu uydurmadır”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, bu çox diqqətçəkən məsələdir: “Erməni saxtakarlığı davam edir. Bunlar başqa sahələrdə heç bir irəliləyişə nail olmadılar, hər sahədə böhran içindədirlər. Böhran içində olduqları vaxtda özlərini aldatmaq və öz başlarını qatmaq, başqalarının diqqətini cəlb etmək üçün kalliqrafiya oyununu ortaya atır, tarix, mədəniyyət məsələlərindən istifadə edirlər. Onlar “erməni qədim yaşayış yerlərindən, tarixindən, mədəniyyətindən” danışırlar. Bu da onların növbəti avantürasıdır ki, Qafqaza aid qədim nə varsa hamısını öz adlarına çıxırlar, bu barədə iddialar qaldırıb kitablar çap edirlər. Eyni zamanda Qafqaz ərazisində olan yazı mədəniyyətinə də iddia edib onları özününküləşdirməyə cəhd edən ermənilər bütün dünyanı aldatmaq istəyirlər. Qarabağ və Qərbi Azərbaycanda qondarma, saxta “Qriqorian abidələri”, yazıları düzəldiblər. Ermənilərin Qafqaza gəlmə olduqlarını, Azərbaycan torpaqlarını bir zamanlar işğal etdiklərini, türk torpaqlarında özlərinə dövlət qurduqlarını dünya ictiamiyyəti bilir. Bu sahədə artıq ifşa olunublar”.
Q.Hacıyevin sözlərinə görə, ermənilər alban-qıpçaq-türk mədəniyyətinə aid dəyərləri mənimsəyərək özününküləşdirməyə cəhd edirlər. Q.Hacıyev qeyd etdi ki, xəttatlıq sənəti ilə bağlı həyata keçirdikləri saxtakarlıq da onların iç üzünü açır: “Ermənilərin xəttatlıq sənətinə iddia etmələri yeni deyil, çünki bir müddət əvvəl bir erməni alimi çıxış edərək, İranda xəttatlığın, çapın və sairin bünövrəsinin ermənilər tərəfindən qoyulduğunu iddia edib. Misir ehramlarını tikən “erməni ustalar”ından əl çəkib, indi də “erməni xəttat”lığının UNESCO-ya daxil edilməsinə nail olublar. Təəccüb edirəm ki, UNESCO-nun ekspertləri niyə erməni saxtakarlığını ifşa etməyib. Yenə də deyirəm, dünyada “erməni xəttatlıq sənəti” deyilən bir anlayış, mədəniyyət yoxdur, bu uydurmadır. Doğrudan da, Matenadaranda çoxlu sayda qədim əlyazmalar var. Bu əlyazmaların böyük hissəsi türk-qıpçaq, alban mədəniyyətinin örnəydir, bundan başqa ermənilər başqa xalqlardan oğurladıqlarını da Matenadaranda gizlədirlər və orada həmin nümunələri saxtalaşdırırlar. Bunlar məqsədli şəkildə toplanaraq ora yığılmış əlyazmalardır, salnamələrdir, xəttatlıq nümunələridir. Məlumdur ki, ermənilər alban tarixinin əsas əsərlərindən biri olan Moisey Kalankatlının “Albaniya tarixi”ni də vaxtilə Matendaranda saxlayıb. Çox yaxşı məlumdur ki, Qafqazda gedən münaqişələr və müharibələr dövründə bütün materialları, əlyazmaları, salnamələri, kitabələri və sairi Qriqorian kilsəsi toplayıb və onlar indi Matenadaranda saxlanılır. Türk xalqlarına aid olan daşüstü yazıları da ermənilər məniməsyib. Türklərə aid qoç başları dağıdılıb, xristian abidələri və əlyazmaları isə Qriqorian kilsəsi tərəfindən saxtalaşdırmaya mərzu qalıb”.
Matenadaranın qapalı məkan olduğunu deyən Q.Hacıyevin sözlərinə görə, bu qapalı məkana qeyri-ermənilər buraxılmır. O hesab edir ki, UNESCO və başqa təşkilatlar Matenadarana missiya göndərsələr, erməni saxtakarlığının şahidi olarlar: “Çox təəssüflər olsun ki, UNESCO-da ermənipərəst və erməni saxtakarlığına şərik olanlar var. Belə olmasaydı, saxta “erməni xəttatlıq sənəti” UNESCO-ya daxil edilə bilməzdi. Ermənilərin xəttatlıq sənəti yoxdur və erməni əlifbası elə əlifba deyil ki, ondan istifadə etməklə xəttatlıq nümunələri yaradılsın. Ermənilər öz saxtakarlıqları ilə UNESCO-nu da aldatmaqdan çəkinmədilər”-deyə Q.Hacıyev bildirdi.
İradə SARIYEVA
