Son günlər Ermənistan təhlükəsizlik şurasının katibi Armen Qriqoryan tez-tez Qarabağın ("Artsax") Azərbaycana təhvil verilməyəcəyindən danışır. O, hökumətin təşkil etdiyi brifinqdə növbəti dəfə bəyan edib ki,“Artsax” heç vaxt Azərbaycanın tərkibində olmayacaq. Ancaq onun bu açıqlaması elə ermənilərin özləri tərəfindən ikrahla qarşılanıb. Ermənilər sosial şəbəkələrdə Qriqoryanın bu fikrinə belə reaksiya verib: “Doğrudur, çünki daha “Artsax” yoxdur”. Bir sözlə, onun sözügedən fikri lağ-lağı obyektinə çevrilib.
Digər tərəfdən, çox güman ki, artıq Rusiya sülhməramlılarının müvəqqəti olaraq nəzarətində olan ərazilərin Azərbaycana qaytarılması məsələsi bağlı qapılar arxasında müzakirə edilir. Bu müzakirə isə xəstə erməni cəmiyyətinə sızır və onda qıcıq yaradır. Qriqoryan bu narahatlığı müvəqqəti olaraq aradan qaldırmaq üçün belə bəyanatlar verir. Ancaq bu da istənilən effekti vermir. Çünki erməni cəmiyyəti nə qədər xəstə olsa da, yeni reallıqların fərqindədir.
“Cəmiyyətin müəyyən kəsimi əvvəlki status-kvonun bir daha geri dönməyəcəyinin fərqindədir”
Məsələyə münasibət bildirən AMİP-in sədr müavini Afsəddin Nəbiyevin fikrincə, məğlubiyyət elə bir sonluqdur ki, onu kimsə həzm etmək istəmir: “Ermənistan cəmiyyətində elə bir paradoksal vəziyyət hökm sürür ki, biz bunu onların ayrı-ayrı ictimai-siyasi şəxslərinin açıqlamalarınrda aydın şəkildə görə bilirik. Bu reallığı, təbii ki, regionda güclü Azərbaycan dövləti 44 günlük savaş zamanı yaratdı. Məğlubiyyət elə bir acı sonluqdur ki, onu kimsə həzm etmək istəmir. Erməni cəmiyyətində qarşılıqlı bu cür ittihamların olması məğlubiyyət sindromunun təzahürləridir. Bir qrup erməni siyasətçisi artıq anlayır ki, mifoloji təsəvvürlərlə xalqı gələcəyə aparmaq mümkün deyil. Belə siyasətçilərə xəyallarla yaşayan erməni qruplarından ciddi basqı var. Cəmiyyətin müəyyən kəsimi əvvəlki status-kvonun bir daha geri dönməyəcəyinin fərqindədir. Ona görə də Armen Qriqoryanın fikirləri ikrahla qarşılanır. Digər tərəfdən, erməni xalqını yalançı, böhtançı ideoloqlar o qədər yalanlarla aldadıblar ki, artıq cəmiyyətin xeyli hissəsi bu yalanlara inanmağa başlayıb. Günü bu gün də onlara gerçək tarixlərini düzgün izah edən adamlar yox səviyyəsindədir. “Artsax” nağılları bu xalqa elə hopdurulub ki, nağılın təsirindən ayıla bilmirlər. Nə vaxta qədər bu proses davam edə bilər? Bu sualın cavabı çox sadədir - ermənilər seçim etməlidir. Ya bu əsatirlərdən ayılıb real həyatda yaşamağı qəbul etməlidilər, yaxud da bir dövlət kimi mövcud olmaları sual altında olacaq. Tarixdə belə nümunələr çoxdur. Azərbaycan dövləti ermənilərin yuxuda gördüyü mifləri sözün həqiqi mənasında yox etməyi bacardı. Azərbaycanda “Artsax” adlı bir qurum yoxdur. Ər və sak sözlərinin birləşməsi olan bu tarixi termin qədim türklərə aiddir. Sak tayfalarının Azərbaycanın müxtəlif bölgələrində izlərinə rast gəlmək mümkündür. Erməni cəmiyyəti nə qədər tez ayılıb bu həqiqəti dərk etsə, bu bir o qədər onlar üçün yaxşı olar”.
Sədr müavini dedi ki, əks halda milli brendimiz olan “Dəmir yumruq” hər zaman yerindədir.
Vidadi ORDAHALLI
