Azərbaycanın işğaldan azad edilmiş ərazilərində inşa edilən ilk hava limanının açılışı oldu. Açılış mərasimində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan iştirak etdi. Bununla da, Füzuli Beynəlxalq Hava Limanına enən ilk xarici dövlət başçısı Türkiyə Prezidenti Rəcəb Tayyib Ərdoğan oldu.
2021-ci il yanvarın 14-də təməli Prezident İlham Əliyev tərəfindən qoyulan Füzuli Beynəlxalq Hava Limanı səkkiz ay ərzində ən yüksək beynəlxalq standartlara uyğun inşa etdirilib. Hava limanına ilk sınaq uçuşu 22 avqustda həyata keçirilib.
Füzuli Beynəlxalq Hava Limanının uçuş-enmə zolağının uzunluğu 3000 metr, eni isə 60 metrdir. Terminal saatda 200 sərnişinə xidmət göstərmək gücünə malikdir. Bütün təyyarələr, o cümlədən iri yük təyyarələri Füzuli Beynəlxalq Hava Limanından asanlıqla istifadə edə biləcək. Avtomatik sistemlərlə təchiz edilmiş hava limanının tikintisində Türkiyə şirkətləri də iştirak edib.
Beynəlxalq reyslərin də həyata keçiriləcəyi Füzuli Beynəlxalq Hava Limanı bununla da Qarabağın dünyaya açılan qapısı olacaq. Hava limanının bölgədə turizmin və ticarətin inkişafına töhfə verəcəyi gözlənilir. Qarabağın simvolik şəhəri olan Şuşaya gedən turistlər də Füzuli hava limanı vasitəsilə daşınacaq. Hava limanı Şuşadan təxminən 100 kilometr, paytaxt Bakıdan 300 kilometr aralıda yerləşir. Ərdoğan son səfəri çərçivəsində Zəngilan şəhərinə də səfər etdi. Onun rəsmi qarşılanma mərasimi də məhz Zəngilanda oldu. Türkiyə prezidenti bundan əvvəl də işğaldan azad edilən rayonlara səfər edib. Bu cür səfərlərlə dünya erməni lobbisinə hansı mesajlar verilmiş oldu?
Politoloq Elşən Mustafayev “Bakı-Xəbər”ə bildirdi ki, Türkiyə prezidenti Rəcəb Tayyib Ərdoğanın Azərbaycanın işğaldan azad edilən ərazilərinə etdiyi səfərin əhəmiyyəti çox böyükdür:“Bu bir daha Azərbaycan-Türkiyə dostluğunun göstəricisidir və bu dostluq münasibətlərinin sürətlə inkişaf etdiyinə dəlalət edir. 44 günlük Vətən müharibəsində Türkiyə Azərbaycanın yanında oldu. Bu gün də Türkiyə Azərbaycanın yanındadır. Rəcəb Tayyib Ərdoğan etdiyi bu səfərlə Türkiyənin həm də hər zaman Azərbaycan dövlətinin və xalqının yanında olacağı, ölkəmizi dəstəkləyəcəyi və Azərbaycanın haqlı mövqeyini dəstəkləməyə davam edəcəyi ilə bağlı mesaj verir. Digər ölkələr də bunu bilməlidir ki, Azərbaycan-Türkiyə dostluğu sarsılmazdır və bu əlaqələrin inkişafının qarşısını heç kim ala bilməz. Lazım olduğu halda Türkiyə Azərbaycanla bağlı bütün zəruri addımları atmağa hazırdır”.
Politoloqun sözlərinə görə, Türkiyə Prezidentinin iştirakı ilə baş tutacaq bir sıra açılış mərasimləri bütün dünyaya, xüsusilə də erməni lobbisinə bu torpaqların Azərbaycana aid olmasını göstərən daha bir mesaj oldu: “Bu torpaqlar bizimdir. Nə Azərbaycan, nə də Türkiyə yenidən erməni revanşistlərinin baş qaldırmasına, təxribat törətməsinə imkan verəcək. Eyni zamanda, bu səfər göstərir ki, Türkiyə bölgədə sülhün təmin olunmasında maraqlıdır. Türkiyə həm də kommunikasiyaların açılmasında, bu layihələrin icrasında və inkişafında maraqlıdır. Əslində bu, Ermənistanın özünə də lazımdır. Ona görə də ermənilər təxribatlarından əl çəkməli, kommunikasiyaların açılması istiqamətində səy göstərməlidirlər”.
Məhəmmədəli QƏRİBLİ
