“Şuşa şəhərində imzalanan Şuşa Bəyannaməsi tarixi sənəddir. Bu Bəyannamə bizim əlaqələrimizi rəsmən müttəfiqlik səviyyəsinə qaldırmışdır”. Bunu Prezident İlham Əliyev Zəngilanda keçirilən məlum tədbirdə deyib.
Ölkə başçısının sözlərinə görə, Füzuli Beynəlxalq Hava Limanının açılışında birlikdə iştirak bir daha bizim birliyimizi, gücümüzü göstərir: “Onu göstərir ki, Türkiyə və Azərbaycan iki qardaş ölkə kimi hər zaman bir-birinin yanındadır. Füzuli Beynəlxalq Hava Limanının inşası cəmi səkkiz ay davam etdi. Səkkiz ay ərzində beynəlxalq hava limanı inşa edildi. Bu hava limanının inşasında Azərbaycan və Türkiyə şirkətləri iştirak etmişlər. Yəni bu bizim birgə uğurumuzdur”.
Bütün bunlar onu göstərir ki, Azərbaycan-Türkiyə münasibətlərindəki hərtərəflilik, intensivlik və dərinləşmə Şuşa Bəyyannaməsinə qədər və ondan sonra müəyyən mənada keyfiyyət baxımından fərqli olub. O baxımdan Şuşa Bəyannaməsi iki ölkənin münasibətlər tarixində hansı mərhələni açdı? Əvvəlki dövrlə müqayisədə hansı yeniliklər, dəyişikliklər baş verib?
“Azərbaycan bütün sahələrdə daha cəsarətli və qərarlı addımlar atır”
Sözügedən məsələyə aydınlıq gətirən keçmiş diplomat, politoloq Fikrət Sadıqov bununla bağlı bir sıra məsələlərə toxundu: “Əvvəla, Şuşa Bəyannaməsindən sonra Türkiyə-Azərbaycan münasibətləri, əlaqələri keyfiyyətcə yeni mərhələyə daxil oldu. Düzdür, Bəyannamədən əvvəl də iki ölkə münasibətləri sıx idi. Həmin münasibətlər çərçivəsində iki ölkə bir sıra işlər görüb, sazişlər imzalayıb və s. Ancaq Şuşa Bəyannaməsindən sonra keyfiyyətcə tamamilə yeni mərhələ başlayıb. Məsələ ondadır ki, Bəyannamədə konkret maddələrlə iki ölkə münasibətləri idarə olunur, koordinasiya edilir. Bu açıq-aşkar özünü göstərməkdədir. Nəzərə almaq lazımdır ki, Şuşa Bəyannaməsi bir sıra məsələləri özündə ehtiva edir. Burada humanitar, iqtisadi, təhlükəsizlik, hərbi-texniki məsələlər öz əksini tapıb. Bütün bunlar o deməkdir ki, sözügedən bəyannamə hüquqi bir sənəddir. Hüquqi sənədin hər iki dövlət başçısı tərəfindən imzalanması isə o deməkdir ki, münasibətlər müttəfiqlik səviyyəsində qurulur. Təbii ki, bunun siyasi çəkisi böyükdür. Bu həm də Cənubi Qafqazda yeni siyasi alyansın yaranması deməkdir. Ərdoğanın birbaşa Qarabağa gəlməsi, orada çıxış etməsi bunu təsdiq edir. Şuşa Bəyannaməsindən sonra Azərbaycan bütün sahələrdə daha cəsarətli və qərarlı addımlar atır. Ona görə də bunun əhəmiyyəti böyükdür”.
Politoloq hesab edir ki, bütün bunlar Azərbaycanın inkişafına və daha güclü dövlət olmasına xidmət edir.
Vidadi ORDAHALLI
