Füzuli Beynəlxalq Hava Limanının açılmasının bir sıra əhəmiyyəti var. Siyasi, iqtisadi, hərbi və digər baxımdan mühüm əhəmiyyət kəsb edir. Məsələ ondadır ki, bunu həm də işğaldan azad olunmuş ərazilərimizdə keçən ilin sonu və bu ilin əvvəlindən başlanmış genişmiqyaslı bərpa və yenidənqurma işlərinin birinci mərhələsinin yekunu kimi dəyərləndirmək olar.
Hava limanının cəmi səkkiz ay ərzində inşa olunmasını sözügedən ərazilərdə həyata keçirilməkdə olan işlərin genişmiqyaslı olmaqla yanaşı, həm də necə sürətli xarakter daşıdığının göstəricisi kimi xarakterizə etmək mümkündür.
Füzuli beynəlxalq hava limanının əhəmiyyəti həm də ondan ibarətdir ki, Rusiya Müdafiə Nazirliyi Qarabağa yükü Ermənistandan deyil, bu hava limanından da daşıya bilər. Çünki məsafə və xərc baxımından bu daha sərfəlidir. Bu, Azərbaycan üçün bir sıra cəhətlərdən əhəmiyyətlidir. O mənada ki, Rusiya öz yüklərini Füzuli hava limanından ermənilərin yaşadığı əraziyə çatdırarsa, Azərbaycan daşınan yüklərin nədən ibarət olduğunu nəzarətdə saxlayacaq. Digər tərəfdən, Azərbaycanın bölgədəki separatizmi tamamən bitirmək üçün psixoloji təzyiqi artacaq. Ermənilərin reinteqrasiyasına zəmin yaradacaq və s.
Maraqlıdır, bəs ekspertlər sadalanan məqamları necə dəyərləndirir?
“Bu, iqtisadi baxımdan onlar üçün sərfəli olacaq”
Məsələyə münasibət bildirən hərbi ekspert Azad İsazadənin fikrincə, Rusiyanın prinsipcə Füzuli hava limanından istifadə etməsi mümkündür: “Əvvəla, hər şey mümkündür. Onsuz da Rusiya Xankəndidə modul evlər inşa edərkən Bərdənin dəmir yolundan istifadə edirdi. Dəmir yolu ilə mallar Bərdəyə gəlirdi, oradan yük maşınları ilə Qarabağa daşınırdı. O baxımdan Rusiya Müdafiə Nazirliyinin Füzuli hava limanından istifadə etməsi mümkündür. Təbii ki, Azərbaycanın razılığı ilə. O şərtlə ki, yüklərin yoxlanılmasına icazə verilsin. Onu da qeyd edim ki, yaz aylarından bəri Bərdə istiqamətindən rus sülhməramlıları istifadə etmir. Görünür, hansısa səbəblərdən bu davamlı olmayıb. Rusiya Füzuli hava limanından istifadə etsə, bu, iqtisadi baxımdan onlar üçün sərfəli olacaq. Daşınma xərcləri azalacaq. Təbii ki, bunun Azərbaycan üçün bir sıra psoxoloji üstünlükləri də olacaq. O mənada ki, Azərbaycan Xocalıda hava limanının fəaliyyətinə icazə vermir. Ona görə ki, ora bizim nəzarətimizdə deyil”.
Bir sözlə, hərbi ekspert bu variantı mümkün hesab edir.
Vidadi ORDAHALLI
