Səfərbərlik və Hərbi Xidmətə Çağırış üzrə Dövlət Xidməti məlumat yayıb ki, hazırda Səfərbərlik və Hərbi Xidmətə Çağırış üzrə Dövlət Xidməti tərəfindən ehtiyatda olan hərbi vəzifəlilərin müxtəlif ixtisaslar üzrə təlim toplanışlarına çağırılması həyata keçirilir.
Bu da onunla əsaslandırılır ki, “Hərbi vəzifə və hərbi xidmət haqqında" Qanuna əsasən, hərbi vəzifəlilər ehtiyatda olduqları dövrdə hərbi təlim, hərbi yoxlama və xüsusi toplanışlara çağırılır. Ermənistan mediası bundan çox ciddi narahatlıq ifadə edir. Bəyan edir ki, güya Azərbaycan yeni müharibəyə hazırlıq işləri görür. Ancaq əksər ekspertlər bu qiymətləndirmənin yanlış olduğu qənaətindədir. Hesab edirlər ki, müharibənin bitməsi bütün hərbçilərin buraxılmasının mütləqliyi anlamına gəlmir. Çünki hərbi hissə və birləşmələr öz döyüş qabiliyyətini artırır və hazırlıqlarla məşğuldur. Hərbi vəzifəlilər, xüsusən də zabit heyəti mütəmadi olaraq təlim-məşq toplantılarına yığılmalıdır. Müdafiə nazirinin təsdiq etdiyi 2021-ci il üçün hazırlıq planına əsasən, hazırda N saylı hərbi hissədə hərbi təlim toplanışı keçirilir. Müdafiə Nazirliyindən məlumat verilib ki, təlim toplanış məntəqəsinin qərargahında hərbi vəzifəlilərin müvafiq qeydiyyatı aparıldıqdan və həkim müayinəsindən keçirildikdən sonra onlar hərbi geyim və digər təminat növləri ilə təmin olunublar. Sonra toplanışa cəlb olunan heyət üçün Həzi Aslanov adına Ordu İdeoloji və Mədəniyyət Mərkəzinin solistləri tərəfindən vətənpərvərlik mövzusunda musiqi nömrələri təqdim edilib. Hərbi hissənin sıra meydanında xüsusi təyinatlıların nümunəvi çıxışları hərbi vəzifəlilər tərəfindən maraqla qarşılanıb. Azərbaycanın keçirdiyi hərbi təlimlərin başlıca məqsədi nədir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, təlim toplanışının keçirilməsində əsas məqsəd ehtiyatda olan hərbi vəzifəlilərin döyüş hazırlığının səviyyəsini, bilik və bacarıqlarını artırmaqdır: “Toplanışda hərbi vəzifəlilər hərbi xidmətdə qazandıqları döyüş vərdişlərini və təcrübələrini təkmilləşdirməklə yanaşı, ordumuzda silahlanmaya yeni qəbul edilmiş müasir silah, hərbi texnika və avadanlıqlardan istifadə qaydalarını mənimsəyəcəklər. “Hərbi vəzifə və hərbi xidmət haqqında” Azərbaycan Respublikası Qanununun 45-ci maddəsinə uyğun olaraq hərbi vəzifəlilər ehtiyatda olduqları dövrdə hərbi təlim, hərbi yoxlama və xüsusi toplanışlara çağırılırlar. Bu barədə Səfərbərlik və Hərbi Xidmətə Çağırış üzrə Dövlət Xidmətindən məlumat verilib. Bildirilib ki, hazırda Dövlət Xidməti tərəfindən ehtiyatda olan hərbi vəzifəlilərin müxtəlif ixtisaslar üzrə təlim toplanışlarına çağırılması həyata keçirilir. Bu tam qanuni prosesdir. Ermənistan tərəfi istənilən prosesə narahatlıqla cavab verir. Elə başa düşürlər ki, Azərbaycan yeni əməliyyatlara başlayır. Bu da başadüşüləndir. Çünki onlar bir il əvvəl uğradıqları ağır psixoloji məğlubiyyətin şokundan hələ də ayıla bilməyiblər. Qanunvericiliyin tələblərinə uyğun olaraq ehtiyatda olan zabitlərin təlimlərə cəlb edilməsi ənənəvi hal alıb. Bütün proses qanun səviyyəsində həyata keçirilir. Bizim suveren haqqımıza kimsə müdaxilə edə bilməz. Azərbaycan bu tip tədbirlərin sayını artırmalıdır. Silahlı qüvvələrin ehtiyat hissəsi məhz bu kontingent sayılır. Belə olan təqdirdə cəmiyyətdə hərbi bilik imkanları artmış olur. Biz müharibə zamanı gördük ki, mülkidən gələn zabitlər belə hərbi vərdişləri yadırğayıb. Çünki uzun müddət idi ki, bu sahədən aralı düşmüşdülər. Müəyyən çətinliklər oldu. Belə tədbirlər hərbi vərdişləri yaxşılaşdırır. Zərurət olduqda həmin kadrların peşəkarlığında problem olmayacaq. Ən azı, 3 ildən bir belə təlimlər olmalıdır”.
Məhəmmədəli QƏRİBLİ
