Ermənistan demarkasiya işlərini özlərinə sərf edən xəritə ilə aparmağı planlaşdırır. Ermənistan mətbuatının yaydığı məlumata görə, Milli Elmlər Akademiyasının fəxri doktoru, kartoqraf Ruben Qalçyan Azərbaycanla Ermənistan arasında demarkasiya işlərini, guya 1926-cı ildə hazırlanmış saxta xəritə əsasında aparmağı təklif edib. O bunu belə əsaslandırıb: “Ermənistan üçün minimal ərazi itkiləri yalnız 1926-cı ilin xəritəsinə görə mümkündür. Ermənistan SSR-nin 1926-cı ildə hazırladığı xəritə maraqlarımıza tam cavab verir”.
Halbuki, Qalçyanın təklif etdiyi xəritə Azərbaycan və Rusiya arxivlərində mövcud deyil. Bu isə həmin xəritənin saxta olmasına dəlalət edir. Burda da tipik erməni hiləgərliyi özünü göstərir. 1920-ci ilə qədər Ermənistan Respublikasının ərazisi 9 min kvadrat kilometr idi. Daha sonra bolşeviklər 20 min kvadrat kilometr ərazini Ermənistana peşkəş etdilər. Hansı ki, həmin ərazilər tarixi Azərbaycan torpaqları idi. Belə görünür ki, Ermənistan indidən saxta xəritələrlə danışıqları uzatmaq məqsədi güdür. Buna bir növ hazırlaşırlar.
“Ermənilər 1920-ci il xəritələrini qəbul etmək istəmirlərsə, o zaman Çar Rusiyası...”
Məsələyə münasibət bildirən Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyevin fikrincə, Ermənistanın kartoqrafları da tarixçiləri kimi saxtakardır: “Hələ ki, heç olmasa bir dəfə obyektivliyə yaxın fikir söylədiklərini, ortaya əsaslı dəlil qoyduqlarını görməmişik. O baxımdan, kartoqraf Ruben Qalçyan da bu yolu tutaraq saxta iddialarla çıxış edir. Ermənilər yaxşı bilir ki, arxiv xəritələri ortaya çıxsa, onlar tez bir zamanda ifşa olunacaqlar. Ona görə də indidən belə çıxışlar etməklə prosesi öz xeyirlərinə dəyişmək istəyirlər. Qalçyan yaxşı bilir ki, sonradan, yəni sovet dövründə indiki Ermənistan ərazisi genişləndirilib. Ermənilər çox azğınlaşmışdılar. Onlar Azərbaycanın 20 faiz ərazisini işğal edəndən sonra keçmiş Dağlıq Qarabağın ətrafında yerləşən rayonları belə vermək istəmirdilər. Hesab edirdilər ki, bu minvalla “Böyük Ermənistan” xülyalarını reallaşdıracaqlar. O qədər həyasızlaşmışdılar ki, Naxçıvana, Beyləqana iddia edirdilər. Vətən müharibəsi onların bütün bu planlarını alt-üst etdi. Buna baxmayaraq, yenə də saxta iddialarla çıxış edirlər. Məqsədləri odur ki, nə yolla olur-olsun, sərhədlərin delimitasiyası və demarkasiyası zamanı vəziyyəti öz xeyirlərinə dəyişsinlər. Onlar 1926-cı il xəritələrindən danışmaqla bizi də saxtakarlığa cəlb etmək istəyirlər. Məsələn, bir neçə yerdə saxta “tiqranakert” tapıblar. İrəvan şəhərinin 2685 illik yubleyini keçirirlər. Deməyim odur ki, bunların saxtakarlıqlarının həddi-hüdudu yoxdur. Ermənilər 1920-ci il xəritələrini qəbul etmək istəmirlərsə, o zaman Çar Rusiyası dövründə Sivilskinin geniş şəkildə hazırladığı dəqiq hərbi xəritələr var, onlardan istifadə etsinlər. Həmin xəritələrdə bir dənə də erməni toponimi yoxdur. Artıq o dövr deyil ki, ermənilər yalanlarla dünyanı aldatsınlar”.
Professor hesab edir ki, erməni saxtakarlığı bundan sonra alınmayacaq.
Vidadi ORDAHALLI
