Türkiyə Prezidenti Rəcəb Tayyib Ərdoğanın Azərbyacana reallaşan son səfəri önəmli bir tarixə - Füzuli Beynəlxalq Hava Limanının açılışına təsadüf etdiyi üçün ikiqat əhəmiyyət daşıdı. Məlum olduğu kimi, Füzuli Beynəlxalq Hava Limanı 8 ay ərzində, həm də ən müasir beynəlxalq standartlara uyğun olaraq inşa edilib.
Belə qısa müddətdə inşa edilən aeroporta beynəlxalq hava limanı statusunun verilməsi isə hə görülən işlərin yüksək peşəkarlıqla həyata keçirilməsindən, həm Azərbaycanın bütövlükdə işğaldan azad edilən ərazilərdə həyata keçirdiyi layihələrə qlobal miqyasda verilən önəmdən xəbər verir. Belə bir hadisəni daha da əhəmiyyətli edən Füzuli Beynəlxalq Hava Limanına ilk beynəlxalq uçuşun həyata keçirilməsi və bunun qardaş Türkiyə dövlətinin başçısı Rəcəb Tayyib Ərdoğanın iştirakı ilə reallaşmasıdır.
Bütün dünyanın maraqla izlədiyi həmin kadrlardan bəlli olur ki...
Qardaş ölkənin Prezidenti işğaldan azad edilmiş ərazilərimizə artıq ikinci dəfədir səfər edir. İlk səfər bütün dünyaya Azərbaycan-Türkiyə qardaşlığının, dostluğunun, həmrəyliyinin əbədi olacağı barədə mesaj verən Şuşa Bəyannaməsinin imzalanması idi. İndi isə Azərbaycanın və Türkiyənin Qarabağın, bölgənin inkişafı ilə bağlı nəzərdə tutduqları hədəflərin necə reallaşmasının şahidi oluruq. Bunun ardınca Türkiyə Prezidenti Rəcəb Tayyib Ərdoğanın Zəngilana səfəri olub. Zəngilan rayonunun Ağalı kəndində Türkiyə prezidenti Rəcəb Tayyib Ərdoğanın rəsmi qarşılanma mərasimi keçirilib. Türkiyə prezidentinin səfərləri zamanı, eləcə də İlham Əliyevin işğaldan azad edilən ərazilərə səfərində maraqlı bir detal da nəzərə çarpır. Bəzi açıqlamalar, rəsmi mətbuat konfransları açıq havada, erməni vəhşiliklərinin əks edildiyi acı mənzərənin önündə təşkil olunur. Bunun böyük təbliğati əhəmiyyəti var. Bütün dünyanın maraqlı izlədiyi həmin kadrlardan bəlli olur ki, Azərbaycan əraziləri necə tar-mar edilib. Digər bir mesaj isə ondan ibarətdir ki, Azərbaycan öz əzəli ərazilərinə qayıdıb, həmin vəhşilikləri aradan qaldırır.
Dəymiş ziyanın təcavüzkar dövlət tərəfindən ödənilməsi də vacibdir
44 günlük savaşdan sonra Qarabağ dirçəliş-bərpa dövrünü yaşayır. İşgaldan azad olunmuş Qarabağda minaların təmizlənməsi ilə paralel olaraq, dağıdılmış ərazilərin bərpası istiqamətində də işlər aparılır. Qarabağda quruculuq işlərinin aparılması üçün 2021-ci ilin dövlət büdcəsində 2,2 milyard manat vəsait ayrılıb. Bununla paralel olaraq, Azərbaycan Respublikasının Prezidenti İlham Əliyevin 4 yanvar 2021-ci il tarixli fərmanı ilə işğaldan azad edilmiş ərazilərdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması, habelə təhlükəsiz yaşayışın, səmərəli fəaliyyətin və rifahın davamlı artmasının dəstəklənməsi məqsədilə “Qarabağ Dirçəliş Fondu” yaradılıb. Bu fond Azərbaycan Respublikasının işğaldan azad edilmiş ərazilərinin bərpası və yenidən qurulması, habelə dayanıqlı iqtisadiyyata və yüksək rifaha malik regiona çevrilməsi istiqamətində həyata keçirilən tədbirlərə maliyyə dəstəyin göstərilməsini və sərmayələrin cəlb edilməsini, bu sahədə dövlət-özəl tərəfdaşlığının inkişafını təmin edən, eləcə də ölkə daxilində və ölkə xaricində zəruri təşviqat işlərini həyata keçirən publik hüquqi şəxsdir. Ölkəmiz Qarabağın bərpasına lazım olan vəsaiti ayırsa da, dəymiş ziyanın, torpaqlarımızı 28 il işğal altında saxlayaraq xarabalığa çevirən təcavüzkar dövlət tərəfindən ödənilməsi də vacibdir. Ekspertlər də buna nail olmaq üçün Qarabağ həqiqətlərinin dünyaya çatdırılması, dəymiş ziyanın hesablanmasına xarici təşkilatların cəlb edilməsini vacib hesab edirlər. Biz Qarabağ həqiqətlərini dünyaya çatdırmaqda davam etməliyik. Çünki, müharibə başa çatsa da, biz dəymiş ziyanın ödənilməsi üçün həqiqətləri beynəlxalq təşkilatların diqqətinə çatdırmalı, onların Ermənistana təzyiq göstərməsinə nail olmalıyıq”.
Ölkəmizin informasiya-təbliğat və diplomatiya müstəvisində mövqeyinin gücləndirilməsi olduqca önəmlidir
Qeyd edək ki, artıq Qarabağın bərpasında bir sıra dost ölkələr - Türkiyə, Pakistan, İsrail, Macarıstan, İran, İtaliya, Böyük Britaniya və s. iştirak etmək arzusunda olduqlarını bildiriblər. Azərbaycan dövləti də dost ölkələrlə bu sahədə əməkdaşlıq etmək niyyətini açıqlayıb. Lakin hazırda Qarabağın yenidən qurulmasında daha çox Türkiyədən olan şirkətlərin fəaliyyəti gözə dəyir və qardaş ölkənin şirkətləri işğaldan azad edilmiş ərazilərin bərpasında yaxından iştirak edirlər. Xüsusi vurğulamaq gərəkdir ki, postkonflikt mərhələsində Azərbaycan dövləti tərəfindən görülən işlər - irəli sürülən strateji təşəbbüslər möhtəşəm tarixi qələbəmizin möhkəmləndirilməsi, ölkəmizin informasiya-təbliğat və diplomatiya müstəvisində mövqeyinin gücləndirilməsi baxımından olduqca önəmlidir. Prezident İlham Əliyev müxtəlif tədbirlərdə tarixi-siyasi reallıqları diqqətə çatdıraraq Azərbaycanın prinsipial mövqeyini dəfələrlə ifadə edib. Xüsusilə də, Azərbaycan Prezidenti 44 günlük müharibə zamanı geniş auditoriyaya xitab edən transmilli media orqanlarına müsahibələr verməklə, ölkəmizin prinsipial mövqeyini ifadə etməklə həqiqətləri beynəlxalq ictimaiyyətə çatdırdı. Dövlət başçısı müxtəlif tədbirlər zamanı çıxışlarında postkonflikt mərhələsində də regional təhlükəsizlik və əməkdaşlıq məsələsinə, bu kontekstdə bölgənin gələcəyi ilə əlaqədar strateji önəm kəsb edən nüanslara dair konkret mesajlar verib. Bütün bunlar həm də Azərbaycanın gələcəyə aydın strateji baxışlarının olduğunu göstərir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
