Ermənistan parlamentində Azərbaycanla sərhəddəki vəziyyət və demarkasiya məsələləri ilə bağlı qapalı dinləmələr keçirilib. İclasda Ermənistan Silahlı Qüvvələrinin Baş Qərargah rəisinin müavini Kamo Kosunts və Sərhəd Qoşunlarının komandanı Arman Maraltsyan da iştirak edib. Ermənistan parlamentinin vitse-spikeri Ruben Rubinyan bildirib ki, deputatların ən azı 20 faizi bu məsələ ətrafında müzakirə aparmağı təklif edib.
Yayılan məlumatlardan belə bəlli olur ki, müxalifət sərhədlərin demarkasiya prosesinə başlanmasından narazıdır və bu prosesi əngəlləməyə can atır. “Hayastan” blokunun üzvü İxşan Saqatelyan bu fonda qeyd edir ki, erməni xalqını bir daha aşağılamaq üçün cəhd edilir. O, Rusiyada Azərbaycan və Ermənistan arasında yeni sənədin imzalanmasına qarşı olduqlarını bildirib. Erməni xəritəşünas Ruben Qaltsyan bu xüsusda iddialı açıqlamalar verib: “Nikol Paşinyanın yaxın ətrafından onun Azərbaycan Prezidenti İlham Əliyevlə görüşü barədə gizli məlumatlarımız var. Biz bilirik ki, noyabrın 9-da Moskvada tərəflər hansı sənədləri imzalayacaq”. Onun sözlərinə görə, iki sənəd imzalanacaq və bu sənədlər, demək olar ki, yekun sənədlərdir: “Son anda fors-major vəziyyət yaranmasa, bütün sənədləri Nikol Paşinyan və İlham Əliyev Rusiya prezidenti Vladimir Putinin vasitəçiliyi ilə imzalayacaq. Birinci sənəddə Ermənistanla Azərbaycan arasında dövlət sərhədlərinin demarkasiyası haqqında danışılır - 1920-ci illərdə SSRİ Müdafiə Nazirliyinin Baş Qərargahının xəritələrinə əsasən İrəvan və Bakı bir-birinin sərhədlərini və ərazi bütövlüyünü tanımalıdır. İkinci sənəd regionda kommunikasiyaların, xüsusilə yolların, dəhlizlərin, o cümlədən Zəngəzur dəhlizinin çəkilməsi ilə bağlı detallara aiddir”. Erməni alimin fikrincə, Azərbaycan tərəfinə anklavların qaytarılacağı təqdirdə, İrəvan məcburən üç strateji əhəmiyyətli yola nəzarəti itirmiş olacaq: “Bu isə 44 kilometr ərazinin Bakının nəzarəti altına keçməsi deməkdir”. Müxalifət belə sənəd imzalanacağı halda kütləvi aksiyalara start veriləcəyini bildirib. Ermənistan parlamentinin müxalif “Şərəf duyuram” blokunun parlament fraksiyasının katibi Aid Mamidjanyan bu xüsusda bildirib: “Soyuqda çadırlarda gecələyə biləcəyimizi və küçələri bağlaya biləcəyimizi artıq göstərmişik”. O, aksiyalarla bağlı texniki detalları açıqlamaq niyyətində olmadığını bildirib: “Hakimiyyət üçün sürprizlər olacaq. Buna söz verirəm. Mübarizədə 1500-2000 fəal iştirakçı olanda polis fiziki olaraq onların hamısı ilə bacara bilməyəcək. Biz son akkorda hazırıq”.
“Hayastan” blokunun parlament fraksiyasının katibi Artsvik Minasyan isə xalqın üsyan etmək hüququnun beynəlxalq hüquqda təsbit edildiyini xatırladıb: “Bu hüquq müqəddəsdir”. Qeyd edək ki, “Şərəf duyuram” parlament bloku Ermənistanın sabiq prezidenti Serj Sarkisyana, “Hayastan” bloku isə Robert Köçəryana məxsusdur. “Hayastan” blokunun üzvü İxşan Saqatelyanın sözlərinə görə, imzalanacaq yeni razılaşma erməni xalqının ləyaqətini və həyati maraqlarını pozan növbəti bir alçaldıcı sənəd olacaq: “Ölkəni yeni kapitulyasiyaya aparacaqlar, bütün bunlar həyati əhəmiyyətli güzəştlərlə başa çatacaq. Noyabrın ilk ongünlüyündə baş tuatacaq mitinqlə bağlı açıqlamam sosial şəbəkələrdə və müxtəlif platformalarda qızğın müzakirə mövzusuna çevrilib. Bəzi insanlar məni ittiham edərək deyirlər ki, noyabrın 9-da mitinq təşkil etmək mənasızdır, çünki hər şey artıq bitmiş olacaq. Məqsədimiz, nəyin bahasına olursa-olsun, istənilən yeni güzəştin qarşısını almaqdır”.
Beləliklə, Ermənistan müxalifəti kütləvi aksiyaların başlanacağının anonsunu verir. Etiraz aksiyalarının keçirilməsində məqsəd Azərbaycan-Ermənistan sülh sazişinin imzalanmasına mane olmaqdır. Məsələ ilə bağlı Sosial Tədqiqatlar Mərkəzinin direktoru, Milli Məclisin deputatı Zahid Oruc qeyd edir: “Keçmiş hakimiyyət təmsilçiləri, konkret olaraq rəhbərləri hazırda siyasi fəaliyyətlərini davam etdirirlər. İstər Robert Köçəryan, istərsə də Serj Sarkisyan. Onlar çox yaxşı dərk edirlər ki, ümumiyyətlə, siyasi həyatda mövcudluqlarını şərtləndirən yeganə amil Qarabağ məsələsidir. Nə qədər ki, onların nöqteyi-nəzərindən bu etnik-milli savaş və dövrlərarası konflikt mövcuddur, həmin məkanda özlərinə yer tapa biləcəklərini düşünürlər. Onlar erməni xalqını təşkilatlandırıb, hansısa hədəflərə aparmaq uğrunda mübarizədə, belə demək mümkünsə, var olduqlarını göstərməyə çalışırlar. Buna görə də, ötən əsrin 90-cı illərində hərbi mundir geyinən adamlar əslində xalqların qanı üzərində hakimiyyəti götürdülər və sonra öz millətinə qarşı da qəddarlıqlar törətdilər. Köçəryan çox yaxşı dərk edir ki, Qarabağ səhifəsi bağlanacağı təqdirdə bunlar siyasətdə yoxdurlar. Onlar bununla Paşinyana siqnal vermək istəyirlər ki, o, İshaq Rabinin (İsrailin 5-ci baş naziri, 4 noyabr 1995-ci ildə sui-qəsd nəticəsində qətlə yetirilib) taleyini yaşaya bilər. Yəni hansısa bir razılaşma mövqeyi o deməkdir ki, düşmənçilik aradan qalxacaq və Qafqazda yeni mərhələ, reallıq və era başlana bilər. Bunlar isə yalnız düşmənçiliyin üzərində səngərdə özlərini hansısa bir qiyafədə göstəriblər”.
Samirə SƏFƏROVA
