Azərbaycan Prezidenti İlham Əliyevin Ermənistanın baş naziri Nikol Paşinyanla görüşü yenidən erməni xalqı üçün biabırçılıqla nəticələnəcək. Azərbaycan lideri Nikolu bu dəfə də “sındıracaq”.
Bu fikirləri erməni siyasi şərhçi Razmik Akopcanyan səsləndirib.
Onun sözlərinə görə, Nikol Paşinyanın İlham Əliyevlə hər görüşündə Azərbaycan lideri elə faktlar gətirir ki, “varçapet” pat vəziyyətinə düşür və sərsəmləyərək biabır olur: “Hər dəfə bunu görən erməni xalqı utanc içində olur. İndi isə vəziyyət əvvəlkindən daha təhlükəlidir. Çünki bu dəfə söhbət konkret olaraq Ermənistanın gələcəyindən gedəcək. Ümumiyyətlə, bu görüşün yaxın vaxtlarda keçiriləcəyi bu günlərdə bəlli oldu. Ermənistan XİN-in mətbuat katibi Vaan Unanyan bazar günü bildirdi ki, hazırda görüş barədə heç nə deyə bilmərəm. Erməni mətbuatı dərhal bu “hazırda” sözünü əsas götürərək, görüşün yaxın vaxtlarda anons olunacağını yazdılar. Bu onu göstərir ki, tərəflər görüşə hazırlaşır və yaxın vaxtlarda biz detalları öyrənəcəyik”. Xatırladaq ki, gələn ay Moskvada Azərbaycan, Rusiya, Ermənistn liderlərinin görüşünün olacağı, burada bir sıra vacib sənədlərin imzalanacağı haqda məlumatlar yayılıb. Ermənistan mediası “Alik Media” saytına istinadən noyabrın 9-da Moskvada Ermənistan və Azərbaycan arasında Vladimir Putinin vasitəçiliyi ilə iki yeni sənədin imzalanacağını xəbər verib. Xəbərdə deyilir: “Birinci sənəd Ermənistan-Azərbaycan dövlət sərhədinin demarkasiyasına aiddir. Bu sənədə görə, İrəvan və Bakı Sovet İttifaqı Baş qərargahının 1920-ci illərə aid xəritəsi əsasında bir-birinin sərhədlərini və ərazi bütövlüyünü tanımalıdır”. İkinci sənədin regionda kommunikasiyaların açılması barədə olacağı xəbər verilir. Sözügedən xəbərin müəllifi Tatul Akopyan bildirib: “Mən istisna etmirəm ki, son anda hansısa detala görə görüş baş tutmaya bilər. Mən Ermənistan tərəfində bu sənədə “yox” deyilməsi üçün nə qədər müqavimət gücü qaldığını bilmirəm”. “Şərəf duyuram” müxalifət fraksiyasından Tiqran Abramyan deyib ki, 1920-ci illərin xəritələrini öyrəniblər. Müxalifət deputatı düşünür ki, bu məsələdə tələskənliyə yol verilməməlidir: “Biri var ad, yəni sülhə dair şərti sənədin necə adlanması, bir də var onun içindəki məzmun. Ona görə də bizim əsas vəzifəmiz müzakirələrlə hökumətin əsl yanaşmasını, onun rəhbər tutduğu prinsipləri və onların əsasında duran hesablamanın nə olduğunu başa düşməkdir”. Müxalifət güc nazirliklərinin iştirakı ilə qapalı iclasın keçirilməsini mühüm hesab edir. Bu fonda “Azatutyun” radiosu bildirir ki, baş nazir Nikol Paşinyan oktyabrın 25-də parlamentdə 2022-ci il üçün büdcənin müzakirəsi zamanı geniş çıxış edib, lakin noyabr ayında Moskvada Əliyev-Putin-Paşinyan görüşünün keçiriləcəyinə dair Rusiya və yerli mediada dolaşan şayiələrlə bağlı suallara cavab verməyib. O da xəbər verilir ki, Paşinyan parlamentə jurnalistlərin girişi olmayan qapıdan gəlib və oradan da çıxıb gedib, hətta deputatların da sullarına cavab verməyib. Onun mətbuat katibi Mane Gevorkyan da hər hansı şərh verməkdən boyun qaçırıb. Gevorkyan bir daha Ermənistan Xarici İşlər Nazirliyinin ötən şənbə verdiyi bəyanatı xatırladıb. Bəyanatda deyilirdi ki, hazırda Əliyev-Paşinyan görüşü planlaşdırılmır, amma müxtəlif görüş təklifləri müzakirə olunur. “Azatutyun” yazır ki, iqtidaryönlü deputatlar da bu barədə ya danışmaqdan imtina edir, ya da məlumatları olmadığını deyirlər. “Vətəndaş müqaviləsi” hakim fraksiyasından deputat Qraçya Akopyan rəsmi məlumatı gözləməyə çağırıb: “Hansı sənəddən söhbət getdiyini mən hazırkı vaxtda bilmirəm. Amma müzakirələr davam etdirilir”. Ermənistan, Azərbaycan və Rusiya baş nazir müavinlərinin son üçtərəfli danışıqlarında hansı razılaşmaların əldə edildiyinə dair suala Akopyan belə cavab verib: “Məndə bu barədə informasiya yoxdur. Çünki Mqer Qriqoryan bizim fraksiya ilə görüşəndə üçtərəfli iclas hələ keçirilməmişdi. Bundan sonra isə fraksiyamızın görüşüb bu məsələni müzakirə etmək imkanı olmayıb. Odur ki, hazırda mənim bu barədə məlumatım yoxdur”. Onu “hökumətin deputatlara heç bir məlumat vermədən belə bir miqyaslı sənədi imzalayacağı narahat etmirmi” sualına Qraçya Akopyan belə cavab verib: “Narahat etmir, çünki biz hökumət üzvlərinə daim suallar verir və bizi narahat edən məsələlər barədə cavablar alırıq. İndiyədək bu sualların cavabları bizi qane edib. Bizə verilən cavablardan görünür ki, narahatlıq üçün əsas yoxdur. Biz hökumətin bizə təqdim edəcəyi sənədin məzmununu gözləyirik. Odur ki, mən indi medianın, başqa ölkələrin KİV-inin yazdığını şərh etmək istəmirəm”. “Azatutyun” yazır ki, müxalifət mümkün sənəd barədə xəbəri mediadan alıb və iqtidar deputatlarından fərqli olaraq, bu xəbərlər onları narahat edir.
Sabiq prezident Robert Köçəryanın “Hayastan” fraksiyasının katibi Artsvik Minasyan bildirir ki, onlar rəsmi məlumatı gözləməyəcək, onu postfaktum tənqid etmək yox, qarşısını almaq yolu ilə gedəcəklər: “Əgər lap hər hansı danışıq prosesi gedirsə də, o açıq olmalıdır, heç olmasa, əsas siyasi oyunçuların, cəmiyyətin və diasporun əsas fiqurlarının cəlb olunması ilə aparılmalıdır. Hakimiyyət özünün gizli fəaliyyət tərzini davam etdirə bilməz”.
Nahid SALAYEV
