Ermənistan baş naziri Nikol Paşinyan ölkə parlamentindəki çıxışı zamanı sülhə yönəlik bir sıra fikirlər söyləyib. Onun sözlərinə görə, Cənubi Qafqaz regionunda iqtisadi və nəqliyyat infrastrukturunun açılması Ermənistan iqtisadiyyatının məzmun və keyfiyyət baxımından inkişafına müsbət təsir göstərəcək.
Paşinyan hesab edir ki, bölgədə sabitlik və təhlükəsizlik tədbirlərinin gücləndirilməsi vacibdir: “Bu təkcə Ermənistan və Qarabağ bölgəsi üçün deyil, bütün region dövlətləri üçün vacibdir.
Düşünürəm ki, Cənubi Qafqaz regionunda düşmənçilik atmosferini aradan qaldırmalıyıq. Bu, regional inkişafın yeganə yoludur. Düşmənçilik atmosferinin aradan qaldırılması regional iqtisadi və nəqliyyat infrastrukturunu blokadadan çıxaracaq. Bu, eyni zamanda, Ermənistanın daxili infrastrukturunun yaxşılaşmasına əlavə stimul olacaq, iqtisadiyyatın inklüziv və uzunmüddətli inkişafına, vətəndaşların iqtisadi fəallığının artırılmasına bərabər şərait yaradılmasına təkan verəcək”.
Baş nazir Paşinyan 2022-ci ilin büdcə müzakirəsində həmçinin bunları deyib: “Biz kiməsə təcavüz etmək üçün yox, təcavüzdən qorunmaq üçün güclənməliyik. Bizim kimsənin torpağında gözümüz yoxdur".
Doğrusu, buna adamın inanmağı gəlmir. Çünki Paşinyanın dedikləri ilə əməlləri üst-üstə düşmür. Paşinyan onu da deyib ki, builki hərbi büdcə 11 faiz artaraq 748 milyon dollar olacaq. Bu baxımdan, Paşinyanın “bizim kimsənin torpağında gözümüz yixdur” ifadəsini nə dərəcədə səmimi qəbul etmək olar?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Paşinyanın belə danışması bizi bu məsələyə bir neçə aspektdən yanaşmağa vadar edir: “Bu səbəbdən də, ilk növbədə Azərbaycan Ordusunun gücünə inanırıq. Onu da bilirik ki, biz ərazilərimizdə gözü olan hər kəsin həmin “gözünü çıxarmağa” qadir ölkəyik. Qəhrəman əsgərimiz 44 günlük müharibə dönəmində bunu bütün dünyaya göstərdi. Bu gün bütün dünya həmin müharibədəki qəhrəmanlıqları təhlil edir, öyrənir. Hələ uzun müddət öyrənməkdə davam edəcək. Bizim ordunun Şuşa əməliyyatı heyranlıqla araşdırılacaq. Biz Ali Baş Komandanımıza, dövlətimizin rəhbərinə inanırıq, ona güvənirik. Azərbaycanın müttəfiqləri olan qardaş Türkiyəyə, Pakistana inanırıq. İndiki məqamda Paşinyana da hardasa inanmaq olar. Çünki o, “Qarabağ Ermənistandır, nöqtə” deyəndən sonra biz onun “gözlərini çıxarmaq” məcburiyyətində qaldıq. Kaş o bunu elə həmin vaxt dərk edərdi ki, başqasının torpağına göz dikənin axırı necə ola bilər. İndi də gec deyil. Bu gün Paşinyan Ermənistanın ən ağıllı siyasətçisidir. Kimin hesabına ağıllanıb, bu başqa söhbətdir. Regionumuz üçün vacib olan sənədləri də məhz Paşinyan imzalayacaq və uzun illər davam edən bu münaqişəyə sülh sazişi ilə son nöqtə qoyulacaq. Bundan bütün region qazanmış olacaq”.
Məhəmmədəli QƏRİBLİ
