Avropa İttifaqı Ukraynaya makromaliyyə yardımı çərçivəsində 600 milyon avro məbləğində pulun ikinci tranşını verib. Bu barədə Ukraynanın Maliyyə Nazirliyi məlumat yayıb: “Oktyabrın 25-də Ukrayna Avropa İttifaqından makromaliyyə yardımının 600 milyon avro məbləğində maliyyə yardımını alıb”.
Məlumata görə, Ukrayna 2036-cı ilin aprel ayınadək bu məbləği Avropa İttifaqına 0,250 faizlə qaytaracaq. Nazirlikdən vurğulanıb ki, bu maliyyə dövlət büdcəsinin tələblərinə və Ukraynanın dövlət büdcəsinin tələbatının azaldılmasına xərclənəcək. Ukraynanın 5 makromaliyyə proqramının reallaşması çərçivəsində Avropa İttifaqından 2014-2021-ci illərdə aldığı yardımın məbləği 5,01 milyard avroya çatıb. Çox maraqlıdır ki, Avropa İttifaqı Azərbaycana kredit tranşı ayırmaqda maraqlı görünmür. Bununla bağlı Prezident İlham Əliyev də gözləntilərinin olduğunu bildirmişdi. Avropa İttifaqının Ermənistan üçün 2.6 milyard avro həcmində iqtisadi yardım ayırdığını qeyd edən Prezident İlham Əliyev demişdi: “Əlbəttə, bizim gözləntimiz ondan ibarətdir ki, həmin həcmdə məbləğ eyni şərtlərlə Azərbaycana da təklif edilsin. İstər qrant, istərsə də kredit – burada bərabərlik olmalıdır. Çünki işğaldan əziyyət çəkmiş olan ölkə bizik. Bizim 10 min kvadratkilometr sahəyə malik olan, tamamilə dağıdılmış ərazimiz, yüzlərlə şəhər və kəndlərimiz var. Bu səbəbdən biz, əlbəttə ki, həmin iqtisadi yardım paketinin qeyri-balanslı olmasına dair öz narahatlığımızı ifadə etdik. Hazırda biz Avropa İttifaqı ilə təmaslarımızı davam etdiririk və onlardan bizə iqtisadi dəstəklə əlaqədar təklif gözləyirik. Avropa İttifaqı çox iş görə bilər. Biz bu imkanlardan istifadə etməyə hazırıq və Avropa İttifaqına dürüst vasitəçi kimi etibar edirik”.
Avropa İttifaqının Azərbaycanın haqlı tələbinə hələ də məhəl qoymaması nəyin əlaməti sayıla bilər?
Politoloq Yeganə Hacıyeva “Bakı-Xəbər”ə bildirdi ki, Avropa İttifaqının Ermənistana 2.6 milyard həcmində maliyyə ayırması aqressorun motivasiyasına xidmət edir: “Bununla digər aqressorları da ruhlandırmış olurlar. Sanki bir ismarıc verirlər ki, başqalarının torpağını uzun illər işğal altında saxlayıb, sonra müharibəni uduzsanız belə, biz dəstəyimizi verəcəyik. Bunu hansı yöndə izah etməyə çalışsalar da, nəticə dəyişmir. Ukraynaya maliyyənin ayrılması artan xətlə davam edir. Gürcüstanla bağlı mövqe dəyişib. Çünki son seçkilərlə bağlı müəyyən öhdəliklər razılaşılmayıb. Buna görə də Gürcüstanla bağlı maliyyə tarnşına qərar verilməyib. Gürcüstan və Ermənistanın Avropa İttifaqından kreditlərin götürülməsilə bağlı öhdəlikləri var. Bu heç bir halda kreditin maliyyə şərtlərini yox, onun siyasi diqtəsini şərtləndirir. Demək olar ki. Ermənistana hədiyyə kimi verilib. Bir hissəsi qrantdır, digəri isə uzunmüddətli qaytarma şərtilə təqdim olunub. Avropa İttifaqının Ermənistanda dirçəltmək istədiyi müəssisələrin böyük əksəriyyəti Rusiyanın nəzarətindədir. Faktiki olaraq, ittifaq öz vətəndaşlarının boğazından kəsdiyi pulla Rusiyanın müəssisələrini dirçəltməklə məşğuldur. Bunlar da əvvəlki kreditlərin aqibətini yaşayacaq. Ermənistanın həmin kreditlər hesabına tikdiyi müəssisələr sonra borca görə Rusiyaya hədiyyə edildi. Ukrayna ilə müqayisədə Ermənistana verilən məbləğ həddən artıq çoxdur. Avropa Birliyinin ədaləti özünü burda da göstərir. Onlar üçün Ukrayna Ermənistandan qat-qat vacibdir. Buna rəğmən, Ermənistan dostu olan İran amilindən də istifadə edib, Avropadan pul qopara bilir. Azərbayan Prezidenti doğru olaraq bildirdi ki, onlar eyni şərtlərlə Ermənistana verdikləri krediti bizə də verməlidir. Hətta bizə ikiqat artıq da verə bilərdi. Çünki biz Ermənistanın işğalına görə ərazilərimizi bərpa etməliyik. Kredit əsas bizə lazımdır. Çünki zərərçəkən ölkə bizik. Ermənistanın iqtisadiyyatı müharibədən hansı ziyanı görüb? Qoy Avropa İttifaqı bunu izah etsin. Çünki bütün hərbi əməliyyatlar bizim ərazimizdə gedib. Hesab edirəm ki, bu məsələdə Ermənistanın lobbiçiliyini Fransa edib. Bəlli olur ki, Avropa İttifaqı heç də bizim müharibənin fəsadlarını aradan qaldırmağımızda maraqlı deyil. Belə ədalətsizlik həmin qurumun imicinə ziddi zərbədir”.
Məhəmmədəli QƏRİBLİ
