İranın Ermənistandakı səfiri Abbas Zohuri yenə özünəməxsus erməni sevgisindən çıxış edərək uzun-uzadı danşandan sonra Azərbaycanı da ittiham etməyi unutmayıb. Qərəzli və əsası olmayan arqumentlərdən çıxış edən Zohuri Azərbaycanla bağlı həqiqəti əks etdirməyən fikirlər səsləndirib.
Məsələ ondadır ki, səfir Zohuri erməni mətbuatına açıqlamasında Azərbaycanın Gorus-Qafan yolu ilə hərəkət edən İran maşınlarından rüsum almasının doğru olmadığını bildirib. Səfir deyib ki, guya bu, 10 noyabr razılaşmasına ziddir. Müharibədən sonra bu yolun açıq saxlanması ilə bağlı Azərbaycan, Rusiya və Ermənistan arasında razılıq olub: “Rusiya, Ermənistan və Azərbaycan arasında danışıqlara görə, bu yol yeni yol tikilənə qədər əvvəlki statusunda fəaliyyət göstərməliydi. Lakin təəssüf ki, bir müddət əvvəl Azərbaycan əvvəlcə yolu iki günlüyə bağladı, açandan sonra isə İran yük maşınlarından rüsum alınır”.
Görünür, Ermənistanda işlədiyinə görə ermənilərin xislətinə yoluxan İran səfiri nə dediyinin fərqində deyil. Məgər 10 noyabr sənədində belə bir məqam var?
“10 noyabr razılaşmasında İran maşınlarından söhbət getmir”
Məsələyə münasibət bildirən AMİP sədri Arzuxan Əlizadənin sözlərinə görə, İran səfirinin səsləndirdiyi fikirlərin heç bir əsası yoxdur: “Əvvəla, 10 noyabr üçtərəfli sazişində Gorus-Qafan yoluna aid heç bir ayrıca bənd yoxdur. Bu tamamilə uydurma bir fikirdir və reallıqla hansısa əlaqəsi yoxdur. Digər tərəfdən, sözügedən yol müharibədən sonra Azərbaycan Ordusunun nəzarətinə keçəndən sonra Rusiyanın vasitəçiliyi və xahişilə Azərbaycan tərəfi həmin yoldan yeni yol çəkilənə qədər ermənilərin istifadəsinə icazə verib. Ancaq orada İran yük maşınlarından hər hansı söhbət getmir. Orada deyilmirdi ki, bu yoldan İran yük maşınları da istədikləri kimi istifadə edəcək. Lakin bunun əksinə olaraq İran TIR-ları həm qanunsuz olaraq o yoldan istifadə edib, həm də ərazi bütövlüyümüzə saymazyana yanaşaraq Qarabağa yük daşıyıblar. Başqa bir tərəfdən, Nikol Paşinyan parlamentdəki çıxışında bildirdi ki, həmin yolla bağlı üçtərəfli razılaşma olsa da, orada xarici maşınlarla bağlı heç bir razılıq olmayıb. Belə olan halda İran səfiri hansı əsasla bundan danışır? Görünən odur ki, İran səfiri ermənidən betər ermənilik edərək, həqiqəti danır və Azərbaycan tərəfinə açıq formada böhtan atır. Bunu ancaq belə dəyərləndirmək olar. İstər İranın, istərsə də başqa birisinin Azərbaycan ərazilərində qanunlarımızdan kənar bir addım belə atması yolverilməzdir. Bunlar işğal dövrünə öyrəşiblər. Məsələ ondadır ki, Azərbaycanın İranla olan sərhədinin 132 kilometri 30 ilə yaxın işğal altında idi. Bundan İran qanunsuz şəkildə istədiyi kimi istifadə edirdi. Artıq o dövr 1 ildir tarix olub. Bu səbəbdən İran qərəzli yanaşmalarından birdəfəlik əl çəkməlidir”.
Partiya sədri bildirdi ki, İran Azərbaycanın suverenliyinə hörmət etməlidir.
Vidadi ORDAHALLI
