İranla Ermənistanın bir neçə min illik əlaqələri? - Səfirin inanılmaz fantaziyası…

Məhərrəm Zülfüqarlı: “Fars və erməni rejimləri indi də türk düşmənçiliyindən qaynaqlanan birliklərini tarixi amillərlə izah etməyə çalışırlar”

img

İranın Ermənistandakı fövqəladə və səlahiyyətli səfiri Abbas Bədəxşan Zohuri erməni mediasına müsahibəsində fantaziya ilə zəngin açıqlamalar verib. O bildirib ki, İran tərəfi Sünikdə yol tikintisi layihələrində mümkün iştirakda maraqlıdır.

İranın Ermənistandakı səfiri deyib ki, Nikol Paşinyan hakimiyyəti dövründə İranla Ermənistan arasında münasibətlər bütün sahələrdə inkişaf edib. Səfir “Şimal-Cənub” dəhlizi layihəsinə də toxunaraq, Hind okeanından Çabahar, Fars körfəzi, sonra Culfa-Naxcıvan -Ermənistan-Gürcüstan marşrutu və oradan da Avropaya yol tikintisinin mümkünlüyünü deyib. Zohuri alternativ Goris-Qafan avtomobil yolunun tikintisindən də bəhs edərək, Ermənistan tərəfinin bu istiqamətdə fəal iş apardığını vurğulayıb və yeni yolun daha qısa olacağını bildirib. Səfir Ermənistanla ölkəsinin “tarixi əlaqələri”ndən danışaraq bildirib ki, bunun tarixi minilliklərə dayanır: “Bizim erməni dostlarımızın hesabına bu əlaqələr daha da möhkəmlənir. Məhz bu tarixi əlaqələrin hesabına biz iqtisadi sahədə də ciddi uğurlara imza atmışıq”.

Bəllidir ki, tarixdə heç vaxt bu çoğrafiyada Ermənistan adlı dövlət olmayıb. Belə olan təqdirdə, səfir hansı minillik münasibətləri nəzərdə tutur?

Tarix elmləri doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki, dəfələrlə bu məsələyə toxunulub:  “Ermənilərə nəinki dövlət, heç xalq belə demək mümkün deyil. Çünki xalqın tərifi var. Mütləq mənada ərazi birliyi olmalıdır. Bunlarda isə heç vaxt ərazi birliyi olmayıb. Onları hər zaman kilsə öz ətrafında cəmləyib. İranla bunlar arasında tarixi birlikdən danışmaq müəyyən qədər izah tələb edir. Onlar Balkan yarımadasından buralara köçüb gəlmiş toplumdur. VI əsrdə kiçik bir dövlətləri olub, sonra dağılıb və bunlar dünyaya yayılmağa başlayıblar. Fars milləti ilə isə bunların müəyyən əlaqələri var. Hər iki millət hind-avropa dil qrupuna aiddir. Bu baxımdan özlərini yaxın sayırlar. Siyasi məqsədlə deyilən fikirlərdi. Söhbət dövlətlərdən getmir. Biz bilirik ki, tarixən farslar və ermənilər türk toplumuna qarşı düşmən münasibətdə olublar. Bunları birləşdirən cəhət budur, səfirin uydurduğu tarixi fantastika yox. Dövlətləri arasında tarixi yaxınlığın olması kökündən yalnış fikirdi. Ərazi cəhətdən də bunlar ayrı olublar. Balkanlar hara, indiki İran ərazisi hara? İndi də onları türklərə nifrət amili birləşdirir. 44 günlük müharibədən sonra məğlub Ermənistana hər cəhətdən dəstək verməyə çalışan İrandır. Bütün İran əhalisini bura aid edə bilmərik. Çünki onların böyük əksəriyyəti bu siyasətdən narazıdır. Ordakı fars rejimi isə Ermənistanla dostluqda maraqlıdır. Fars və erməni rejimləri indi də türk düşmənçiliyindən qaynaqlanan birliklərini tarixi amillərlə izah etməyə çalışırlar. Belə əfsanələri tarix elmi də inkar edir. Azərbaycan -Türkiyə qardaşlığı inkişaf etdikcə, bunların da narahatlığı çoxalır. Biz də onları tarixi faktlarla ifşa edəcəyik. Ortada tarix, elmi dəlillər var”.

Məhəmmədəli QƏRİBLİ

Son xəbərlər