Rəşad Bayramov: “Ermənistan rəhbərliyi və onun mandat aldığı xalq sülh və inkişaf istəyir”
Ermənistanın ikinci prezidenti Robert Köçəryanın rəhbərlik etdiyi müxalif "Hayastan" bloku mitinqə hazırlaşır. Blok hesab edir ki, indiki hakimiyyət xalqa xidmət etmir. Müxalifətin mitinq keçirmək istəyi baş nazir Nikol Paşinyanın Azərbaycanla bağlı tutduğu mövqe ilə bağlıdır. Blokun planlarını “Hayastan” fraksiyasının rəhbəri Seyran Ohanyan təqdim edib: “Aşkar və hansısa kölgə prosesləri gedir, onun qarşısını almaq bizim ümumi işimiz olmalıdır.
Bu hakimiyyət erməni xalqının və dövlətçiliyimizin maraqlarına xidmət etmir”. Parlamentdəki “Hayastan” müxalifət blokunun sədr müavini İşxan Saqatelyan isə hazırkı hakimiyyətin Ermənistanın yeni ərazilərini Azərbaycana verəcəyindən narahat olduqlarını qeyd edib. Onun sözlərinə görə, Paşinyanın vəd etdiyi sülh erası Ermənistanın həyati maraqlarının ziyanına başa çatacaq və onlar “Zəngəzur dəhlizi”ni "başqa mətləblə" qəbul edəcəklər:
“Biz inanırıq ki, baş verənlər yeni təslim sazişi olacaq, yəni Ermənistan yeni güzəştlərə gedəcək. Bunun qarşısını almaq üçün ümumerməni qüvvələr tərəfindən milli müqavimət formalaşdırılmalıdır ki, bütün dünyaya, o cümlədən indiki şər hakimiyyətinə ölkəmizdə müqavimət olduğunu, xalqımızın bu proseslə razılaşmadığını və mübarizəyə çıxdığını göstərək".
Hakim fraksiya üzvü Qaqik Melkonyan isə deyib ki, cümə günü Ermənistanın baş naziri Nikol Paşinyanın öz komandasını ərazi güzəştlərinə getmək niyyətində olmadığına inandırıb: “Biz dünən baş nazirlə görüşdük, belə bir qorxu yoxdur, heç kim yeni ərazilərdən imtina etmək fikrində deyil. Əgər biz sülh istəyiriksə, bu o deməkdirmi ki, biz ərazilərdən imtina edirik? Müharibə istəyiriksə, əraziləri alırıqmı? Sadəcə maraqlıdır, onlar müharibə istəyirlər, yoxsa sülh?”.
Ermənistan müxalifəti bu etirazların fonunda nəyəsə nail ola bilərmi?
Politoloq Rəşad Bayramov Ermənistanda baş verən prosesləri iki aspektdən izah etdi: “Doğrudan da, Moskvanın vasitəçiliyi ilə proses gedir. Yəqin ki, Ermənistanı götürdüyü öhdəlikləri yerinə yetirməyə həm də Moskva məcbur edir. Çünki Rusiya başqa oyunçuları çevrəyə buraxmaq istəmir. Özünün də ərsəyə gətirdiyi razılaşmadan Minsk Qrupu formatı adı altında ABŞ və Fransanın da divident götürməsinə qarşıdır. Buna görə də Ermənistanın nazı ilə oynamır. Onun qarşısında sərt tələblər qoyur. Paşinyan bu təzyiqləri azaltmaq üçün belə mitinqlərin keçməsində maraqlı ola bilər. Bu baxımdan mitinqlərin də effekti Ermənistana edilən təzyiqlərə adekvat olacaq. Bu suni etiraz dalğasıdır. Daha çox Moskvaya göstərməyə hesablanıb. Səmimilik ona görə yoxdur ki, Ermənistan əhalisi müharibə, növbəti qarşıdurmanı istəmir. Əgər revanşist əhval-ruhiyyə hakim olsaydı, onda gərək Paşinyanı müharibəni uduzduğuna görə dar ağacından asaydılar. Biz isə tarixdə nadir olan hadisənin şahidi olduq. Xalq yenidən Paşinyana səs verdi. Çünki revanşistlərin səmimiyyətinə inanmır. Ermənistan rəhbərliyi və onun mandat aldığı xalq sülh və inkişaf istəyir. Ancaq bunu da əllərində olanı vermədən qazanmağa can atırlar. Təbiidir ki, mümkün deyil. Çünki onun üzərinə götürdüyü öhdəliklər dövrün və yaranmış realıqların tələbidir. Müharibə etməyə gücü və həvəsi olmayan ölkə bunlarla razılaşmağa borcludur”.
Ekspertin sözlərinə görə, Ermənistan müxalifəti səmimi aksiya keçirmək niyyətində olsa belə, ətrafına lazımi səviyyədə elektorat cəlb edə bilməyəcək: “Çünki sadə xalq bilir ki, Ermənistanı bu dalana salan məhz Köçəryan kimilərdi”.
Məhəmmədəli QƏRİBLİ
