Türkiyənin İstanbul şəhərində keçirilən Türk Şurasının mediaforumunda Azərbaycanla bağlı vacib mesajların verildiyinin şahidi olduq.
Qürurverici hadisədir ki, Türk Şurasının mediaforumunun əsas mövzularından biri məhz Qarabağ mövzusu, Azərbaycanın Qarabağda əldə etdiyi zəfər və ortaya qoyduğu reallıqlar oldu. Tədbirdə iştirak edən media təmsilçilərimiz bildirirlər ki, xarici ölkələrin nümayəndələri azərbaycanlılara yaxınlaşaraq Qarabağ zəfəri ilə bağlı suallar ünvanlayır. Nəzərə çarpan budur ki, Azərbaycanın Qarabağdaki möhtəşəm qələbəsini bütün türk dünyası öz qələbəsi hesab edir.
Türkiyə Prezidenti Administrasiyasının Kommunikasiya İdarəsinin təşkilatçılığı ilə keçirilən Türk Şurasının mediaforumunda panel çıxışlarında təmsilçilərimiz müəyyən təkliflər irəli sürüblər. Azərbaycan tərəfi olaraq bizim də verdiyimiz əsas təkliflərdən biri türkdilli ölkələrin və xalqların ortaq media platformunun yaradılmasıdır. Bunun qlobal müstəvidə istər Avropa, Asiya, istərsə də Afrika miqyasında bir sıra nümunələri var. Artıq Azərbaycanın və digər bütün türkdilli dövlətlərin birgə, ortaq media platformasının, agentliyinin yaradılması və beynəlxalq səviyyədə digər media qurumları ilə hərtərəfli əməkdaşlıq etməsi mühüm faktordur. Qarabağ zəfərinin türkdilli ölkələrin media inteqrasiyasına nə kimi təsiri olacaq?
Jurnalistlərin Həmkarlar İttifaqının sədri, media eksperti Müşfiq Ələsgərli “Bakı-Xəbər”ə açıqlamasında bildirdi ki, 2020-ci ilin sentyabr-noyabr aylarında aparılmış 44 günlük Vətən müharibəsi dövründə Azərbaycan informasiya siyasətini çox yüksək formada qurdu: “Həm Prezident İlham Əliyevin transmilli KİV-lərə açıqlamaları, həm ayrı-ayrı ölkələrin hadisəyə marağı və geniş informasiya təminatı, həm də yerli KİV-in intensiv çalışmaları informasiya savaşında Azərbaycanın üstünlüklərini təmin etmiş oldu. Bütün bu prosesdə diqqət çəkən, xüsusi işarə ilə keçən bir xətt də var idi ki, bu da qeyd edilən prosesdə Türkiyə mediasının Azərbaycana dəstəyindən ibarətdir. Türkiyə mediası 44 gün ərzində Azərbaycanda oldu və Azərbaycanın yanında oldu: bütün potensialını ortaya qoyaraq nə etdiyimizi, nə etmək istədiyimizi, nələrlə üzləşdiyimizi dünyaya çox səhih şəkildə göstərdi. İki ölkə mediasının bu cür təmasları, sıx əməkdaşlığı və əldə etdiyi yüksək nəticə artıq yeni modeldir, yeni örnəkdir. Bu təcrübə göstərdi ki, qardaş ölkələrin media qurumları, qeyri-hökumət təşkilatları əməkdaşlıq etsələr, can yandırsalar, ciddi nəticələr əldə edə bilirlər, ölkələrimizə töhvə verə bilirlər. Həmin nümunənin örnək olaraq digər Türkdilli dövlətlərə nümunə kimi göstərilməsi təsadüfi deyil. Türkdilli xalqların sivil toplum quruluşlarının, xüsusilə media təşkilatlarının əməkdaşlıq modellərinin qurulması yönündə ideyalar yeni deyil. Hələ yüz il öncə fərqli variantda ortaya çıxan bu ideya son 30 ildə, yəni Azərbaycan da daxil olmaqla, bir sıra türkdilli dövlətlərin müstəqillik qazanmalarından sonra daha da aktuallaşıb, ideyanın gerçəkləşdirilməsi üçün mexanizmlər axtarılıb. Son 2 il ərzində görülən işlərin üstünlüyü budur ki, ideyanın gerçəkləşdirilməsi üçün konkret mexanizmlər tapılıb, tətbiq edilir və nəticə verir. Diqqət yetirsək görərik ki, son 2 il ərzində bu yöndə təqribən 6-ya yaxın böyük formatlı tədbirlər keçirilib, proqramlar hazırlanıb. İstanbulda keçirilən Türkdilli Dövlətlərin Əməkdaşlıq Şurasının (Türk Şurası) media forumu konkret proqramları müzakirəyə çıxardı və tətbiqi üçün təkliflər təqdim etdi. Qazaxıstan, Qırğızıstan, Özbəkistan, Macarıstan, Türkmənistan kimi dövlətdən media təmsilçilərinin foruma qatılması bu konsepsiyanın geniş arealda yayıldığını təsdiqləyir. 44 günlük Vətən müharibəsi zamanı Azərbaycanla Türkiyə mediasının müştərək hərəkət etmələri güclü həmrəyliyin nümayişi idi və yüksək nəticələr verdi. İndi bu əməkdaşlıq digər türkdilli dövlətlərə nümunə kimi göstərilir və daha da inkişaf etdirilməsi üçün müzakirələr aparılır. Forumun panellərindən birinin "Birlikdən doğan Zəfər: Qarabağ" mövzusuna həsr edilməsi təsadüfi deyil. II Qarabağ savaşında da Türkiyə-Azərbaycan mediasının müştərək hərəkəti və əldə etdikləri nəticələr gələcəkdə digər türkdilli dövlətlərin media qurumlarının əməkdaşlığı üçün yaxşı nümunə olacaq”.
Məhəmmədəli QƏRİBLİ
