İbrahim Rüstəmli: “Ermənistanda baş verən hadisələrə, oradakı revanşist, başıpozuq dəstələrin məsuliyyətsiz bəyanatlarına diqqət yetirsinlər”
Azərbaycanın Müdafiə nazirinin təsdiq etdiyi 2021-ci il üçün hazırlıq planına əsasən oktyabrın 25-dən N saylı hərbi hissədə hərbi təlim toplanışının keçirilməsi və ehtiyatda olan bir qrup hərbi vəzifəlinin təlimə cəlb ediləcəyi barədə xəbər Ermənistanda kəskin ajiotaj yaradıb. Artıq sosial şəbəkələrdə, çoxsaylı üzvləri olan teleqram kanallarında, saytlarda onlar təlaş keçirdiklərini yazırlar və qeyd eidrlər ki, 44 günlük müharibə başlayanda da Azərbaycan ehtiyatda olan hərbi vəzifəliləri təlimə cəlb edib.
Erməniləri əndişəyə salan isə müharibənin yenidən başlanması qorxusudur. Bunu özləri yazırlar. Azərbaycan sülhdən danışır, Ermənistan əhalisinin xeyli hissəsi isə müharibə təlaşındadır. Azərbaycanda ehtiyatda olan hərbi vəzifəlilərin təlimə cəlb edilməsi Ermənistanı sözün həqiqi mənasında qarışdırıb.
- “...Ermənilər təşvişə düşmək əvəzinə...”
Hərbi ekspert İbrahim Rüstəmli “Bakı-Xəbər”ə bildirdi ki, Ermənistan yalançı ajiotaj yaratmaqdansa, daxilindəki revanist qüvvələrin ağzını yığsın və sülhə maraq göstərsin, Azərbaycanın ərazi bütövülüyü tanısın: “Əslində, hazırda ermənilərin təlaş içində olması onların kütləvi psixoz və depressiya vəziyyətində olmasının göstəricisdir. Amma yaxşı olardı ki, ermənilər Azərbaycanda baş verən hadisələrə diqqət yönəltməkdənsə, Ermənistanda baş verənlərə, oradakı revanşist, başıpozuq dəstələrin məsuliyyətsiz bəyanatlarına diqqət yetirsinlər. Bu bəyanatlar, bu informasiyalar Azərbaycana gəlib çıxır və informasiyaların içi təhdidlə, müharibə çağırışları ilə doludur. Ona görə də, Azərbaycan bu gün öz ərazisində hər hansı bir iş görürsə, hər hansı bir hərbi təlim həyata keçirirsə, yaxud ehtiyatda olan zabitləri yenidən təlimə çağırırsa, bu, Azərbaycanın öz daxili işidir, daxilində baş verən proseslərdir, bunun Ermənistana heç bir aidiyyəti yoxdur. Ancaq bir ölkə vaxtilə onun torpağını işğal edən qonşusundan və onun daxilindəki revanşist qüvvələrdən müharibə çağırışları eşidirsə nə etməlidir? Bizim xalqımız da, dövlətimiz də, Prezidentimiz də müharibə istəməyib, sülh istəyib. 30 il müddətində bu münaqişənin sülh yolu ilə həllinin tərəfdarı olduq. Amma bir nəticə olmadı. Çünki Ermənistanın sabiq müdafiə naziri Tonoyan xarici ölkələrdən birində bəyanatla çıxış etdi ki, bizim Azərbaycana qarşı yeni savaşımız başlayacaq. Sonra Paşinyan içib Cıdır düzündə on minlərlə könüllü erməni əsgərinin müharibəyə hazır olduğunu və yeni başlanacaq müharibəyə qatılmaq istədiklərini bəyan etdi. Bütün bunlardan sonra artıq Azərbaycanın çıxış yolu qalmadı. Eyni zamanda da Tovuz cəbhəsində generalımızın, polkovnikimizin, onlarla yanaşı bir neçə zabitimizin Ermənistanın təxribatı nəticəsində həyatını itirməsi və sair kimi bütün baş verənlər Azərbaycan üçün müharibədən başqa seçim qoymadı”.
İ.Rüstəmli qeyd edir ki, Ermənistanda insanların qorxu və təlaş hissinin bu şəkildə qabardılması onu göstərir ki, indinin özündə də onların mövqeyi dəyişməyib, onlar yenə də müharibə havasındadır. “Bu da Azərbaycanı öz ordusunun daim döyüş hazırlığını yüksəltməyə sövq edir. Ona görə də, yaxşı olar ki, ermənilər təşvişə düşmək əvəzinə, yenidən Ermənistanın daxilində baş verənlərə baxsınlar, revanşist bəyanatların qarşısını alsınlar, Azərbaycanla və Türkiyə ilə barışıq şəraitində yaşamağı, Azərbaycanın qələbəsini qəbul etsinlər, ərazi bütövlüyünü tanısınlar. Nə qədər ki, Ermənistanda bu cür revanşist qüvvələr, Azərbaycanın ərazi bütövlüyünü tanımaq istəməyənlər, Azərbycanın gücünü başa düşməyən, sinirməyənlər olcaq, Azərbaycan da daim öz ordusunu gücləndirəcək. Çünki ordunu gücləndirmək Azərbaycanın milli və dövləti maraqları çərçivəsindədir. Azərbaycan öz milli maraqlarını qoruyur və öz milli maraqlarından kənara çıxmır. Bu mənada yaxşı olar ki, Ermənistan öz mətbəxindəki səliqəsizliyi, dağınıqlığı yığışdırsın” - deyə İ.Rüstəmli qeyd etdi.
İradə SARIYEVA
