İran-Azərbaycan münasibətlərində müşahidə olunan gərginliyin aradan qalxması Ermənistana böyük zərbə oldu. Ermənistan hakimiyyətinin bununla bağlı böyük gözləntiləri və xüsusi maraqları var idi. Ermənistan üçüncü tərəflərin dəstəyi ilə Azərbaycanın suveren ərazilərinə müdaxilə etmək imkanından məhrum oldu.
Məsələ ondadır ki, yaranmış gərginliklə əlaqədar İranın geri çəkilməyə məcbur edilməsi, Azərbaycanın haqlı tərəf olmasının təsdiqlənməsi Ermənistana böyük zərbə oldu. Ermənistanın İranla dəhliz yaratmaq, iqtisadi kooperasiyanı daha da inkişaf etdirmək cəhdləri və bununla bağlı gözləntiləri iflasa uğradı. Nəzərə almaq lazımdır ki, Ermənistanın İranla iri miqyasda iqtisadi münasibətlər qurmaq maraqları var idi. İstəyirdilər ki, İran vasitəsilə Azərbaycana müəyyən siyasi təzyiqlər göstərsinlər. Göründüyü kimi, Ermənistanın bütün bu gözləntiləri iflasa uğradı. Beləliklə, sərhəd gərginliyi ilə əlaqədar proseslərin İranın sonda geri çəkilməsi ilə nəticələnməsi Azərbaycanın həm də Ermənistan üzərində qazandığı növbəti qələbədir. Bu da Ermənistanın planlarının puça çıxması deməkdir. O baxımdan bütün bunları ekspertlər necə dəyərləndirir?
“İranın ali rəhbərliyi çox düzgün təhlillər aparandan sonra bu qənaətə gəldi ki...”
Məsələyə münasibət bildirən millət vəkili, politoloq Elman Nəsirov buna bir necə prizmadan yanaşdı: “Azərbaycan-İran münasibətlərində müşahidə edilən gərginlik aradan qalxır. Prezident İlham Əliyevin müəyyən etdiyi xarici siyasət kursunda ikitərəfli münasibətlər prioritetdir. İkitərəfli münasibətlər isə qonşularla münasibətlər birliyində dayanır. Bu məntiqlə yanaşdıqda, cənab Prezidentin müəyyən etdiyi siyasətdə İran qonşu dövlət olaraq Azərbaycan üçün prioritet istiqamətlərdən biridir. Ona görə də müəyyn səbəblərdən yaranmış gərginliyin aradan qaldırılması İranın milli mənafeyinə uyğun idi. Təbii ki, sözügedən gərginliyin mövcud olmasından ən çox sevinən tərəf Ermənistan idi. Ermənistan istəyirdi ki, Azərbaycan-İran münasibətlərində mövcud olan gərginlik daha da inkişaf etsin və geridönməz hal alsın. Ancaq onların bu istəkləri puç oldu. İranın ali rəhbərliyi çox düzgün təhlillər aparandan sonra bu qənaətə gəldi ki, belə bir siyasət ənənəvi İran-Azərbaycan dostluq münasibtlərinə uyğun gəlmir. Bundan İran itirəcək. Münasibətlərin yoluna düşməsi Ermənistanda böyük məyusluq yaradıb. O mənada ki, onların planları reallaşmadı. Ona görə də Ermmənistanın düşdüyü bu şəraitdə yeganə çıxış yolu əməkdaşlıqdır. Revanşizm Ermənistanı məhv edir, əməkdaşlıq isə bu ölkəni inkişafa aparır. Prezident İlham Əliyev Zəngilan ictimaiyyəti ilə görüşündə dedi ki, əməkdaşlıqla bağlı Ermənistandan müsbət impulslar gəlir. Artıq onlar kommunikasiyaların açılmasına yönəlik bəzi addımlar atırlar”.
Bir sözlə, millət vəkili hesab edir ki, ən optimal yol əməkdaşlıqdır.
Vidadi ORDAHALLI
