Azərbaycan-İran münasibətlərində yeni tendensiya müşahidə olunur. Artıq İran öz səhvlərini etiraf edib, geri çəkilməyə başlayıb.
Azərbaycan haqlı olaraq İran iş adamlarının ermənilərin yaşadığı ərazilərlə qanunsuz əlaqələrə son qoymasını tələb etmişdi. İranın aidiyyəti orqanlarının həmkarlar ittifaqlarına, şirkətlərə müvafiq tövsiyələr verməsi, bu problemə son qoyulacağı barədə öhdəlik götürülməsi Azərbaycanın haqlı tələblərinin icra olunduğunu bir daha nümayiş etdirdi.
Azərbaycan bir daha sübut etdi ki, heç kim onunla diktat və təzyiq dilində danışa, ona öz iradəsini qəbul etdirə bilməz.
Cərəyan edən proseslər həm də Azərbaycanın daxilində xarici qüvvələrə xidmət edən, onlarla əlaqədə olan şəxslərin, təşkilatların, formalaşmış şəbəkənin ifşa olunmasını şərtləndirdi. Bir daha göründü ki, bəzi şəxslər, qurumlar hər an Azərbaycan xalqının milli maraqlarını qurban verməyə, ölkəmizi istəməyən xarici qüvvələrlə işbirliyinə getməyə, öz xalqına və vətəninə qarşı çıxış etməyə hazırdır. Son proseslərin İranla bağlı olan bir şəbəkənin ifşası baxımından nə dərəcədə önəmi oldu?
“Təmizləmə davam etməlidir, mövsümi xarakter daşımamalıdır”
lahiyyatçı Tural İrfan “Bakı-Xəbər”ə açıqlamasında bildirdi ki, belələrinin davamlı ifşa olunması, onların barəsində tədbirlər görülməsi zəruridir: “İran heç vaxt müstəqil siyasət yürütməyib. Hər zaman Rusiyadan asılı olan siyasətə üstünlük verib. Azərbaycanla münasibət gərginləşəndən sonra da Rusiyaya üz tutdu. Lakin Moskvadan istədiyi dəstəyi ala bilmədi. Rusiya ilə Türkiyənin arasında ortaq mövqenin olması buna yol vermədi. Bundan sonra İran yumşalmağa məcbur oldu. Belə olan təqdirdə Azərbaycanın həm də imkanı yarandı ki, iranyönümlü agentura şəbəkəsini məsuliyyətə cəlb etsin. Çox təqdirəlayiq bir addımdır. Çünki uzun illərdi ki, bu şəbəkə mövcud olub. Müəyyən maraqlar nəzərə alındığı üçün onların zərərsizləşdirilməsi baş vermirdi. Son dövrlərdə həm də Türkiyənin bizə verdiyi hüdudsuz dəstək bu cür addımların atılmasını mümkün etdi. Hesab edirəm ki, təmizləmə davam etməlidir, mövsümi xarakter daşımamalıdır. Onlar birbaşa bizim dövlətçiliyimiz üçün təhdid yaradırlar. İranın buradakı şəbəkəsi yalnız hakimiyyətə qarşı deyil, birbaşa dövlətçiliyimizin əleyinə yönələn şəbəkədi. Bunun da arxasında onların ciddi maraqları durur. Bura İslam inqilabını ixrac etmək istəyirlər, həmçinin bizim ərazilərimizi İranınkı sayırlar. Molla cildinə salınmış bu şəbəkə ilə bağlı atılan addımlara bütün ictimaiyyət dəstəyini ifadə etməlidir. Bu vəziyyət bizim üçün həm də bir test rolunu oynadı. Öz dostlarımızı və düşmənlərimizi yaxşı tanıdıq”.
Məhəmmədəli QƏRİBLİ
